“Nitemaka nejin tanauatil porin moneki monextis netasojtalis ika se yolo chipauak uan se kuali tanemilil.” (1 TIM. 1:5TNM)

NEKUIKATILMEJ 22 UAN 48

1, 2. 1) ¿Akoni techmakak totanemilil? 2) ¿Keyej timotasojkamatij tikpiaskej totanemilil?

JIOVA techchijchiuak kemej uelis tikixpejpenaskej toni tikchiuaskej. Yejuatsin techmakak totanemilil tein techpaleuia maj kuali titaixpejpenakan. Totanemilil se taman tein totech moajsi uan tein kemej yeskia techiluia toni kuali uan toni amo kuali (xikonita kampa kijtoua “Tein okachi momelaua”). Komo kuali tikmachtiaj totanemilil, techpaleuis maj tikchiuakan tein kuali uan maj tikixtopeuakan tein amo kuali. Keman Jiova techmakak totanemilil, kinextij ke techtasojta uan ke kineki maj tiyolpakikan.

2 Seki taltikpakneminij amo kiixmatij itanauatiluan Biblia, maski ijkon kichiuaj tein kuali uan kiixtopeuaj tein amo kuali (xikonixtajtolti Romanos 2:14, 15). ¿Keyej? Porin inintanemilil kiniluia ke seki taman kuali yetok uan okseki amo kuali yetok. Komo taltikpakneminij amo kipiaskiaj inintanemilil tein kiniluiskia toni kuali uan toni amo kuali, okachi mochiuaskia tein amo kuali. Yejua ika uelis timotasojkamatiskej maj Jiova techmakani tinochin totanemilil.

¿Keniuj techpaleuia totanemilil maj kuali titaixpejpenakan?

3. ¿Keniuj tapaleuis itech nechikol komo kuali tikmachtiaj totanemilil?

 3 Tel miakej taltikpakneminij amo kimachtiaj inintanemilil. Sayoj ke tejuan tiknekij tikmachtiskej uan ijkon techpaleuis maj tikmatikan toni kuali uan toni amo kuali. Techpaleuis maj tikmachtikan komo tikixtajtoltiaj Biblia uan timomachtiaj tein ompa kijtoua. Sayoj ke moneki tikchiuaskej okseki taman. No moneki tiktasojtaskej itanauatiluan Dios uan titakuaujtamatiskej ke techpaleuiaj. Yejua ika tatitanil Pablo kijtoj: “Nitemaka nejin tanauatil porin moneki monextis netasojtalis ika se yolo chipauak uan se kuali tanemilil uan takuaujtamatilis maj monexti amo ika takajkayaualis” (1 Tim. 1:5TNM). Komo kuali tikmachtiaj totanemilil uan tiktakamatij, titapaleuiskej maj nochin kuali mouikakan itech nechikol. No okachi tiktasojtaskej Jiova uan okachi iuan titakuaujtamatiskej. Uan no, tiknextiskej ke kuali iuan timouikaj uan ke tiknekij tikyolpaktiskej. Ijkon moitas keniuj yekmelauj titamatij.

4. ¿Toni moneki tikchiuaskej komo tiknekij tikmachtiskej totanemilil?

4 Komo tiknekij tikmachtiskej totanemilil, amo sayoj moneki tikixtajtoltiskej Biblia uan tikelnamikiskej tanauatilmej uan miak taman tein ompa kijtoua. Moneki nochipa timomachtiskej, tiknemiliskej tein tikixtajtoltiaj uan tiktajtaniskej Jiova maj techpaleui maj tikchiuakan ijkon kemej timomachtiaj. Keman timomachtiaj Biblia, tiknekij okachi kuali tikixmatiskej Jiova. Tiknekij tikmatiskej keniuj tamati, toni kiuelita uan toni amo kiuelita. Komo okachi tikmachtiaj totanemilil, okachi titanemiliskej kemej Dios.

5. ¿Toni tikitaskej itech nejin tamachtilis?

5 Xa uelis timotajtaniskej: “¿Keniuj techpaleuia totanemilil maj kuali titaixpejpenakan? ¿Keniuj uelis tiknextiskej ke tikpoujkaitaj inintanemilil okseki tokniuan? ¿Uan keniuj techpaleuia totanemilil maj tikchiuakan tein kuali?”. Itech nejin tamachtilis tikitaskej keniuj komo kuali tikmachtiaj totanemilil uelis techpaleuis itech eyi taman. Yekinika, keman timopajtiskej. Ojpatika, keman timoixpetaniskej. Uan expatika, keman ika titajtoskej tein tikneltokaj.

KEMAN TIMOPAJTIAJ

6. ¿Toni xa monekis tikixpejpenaskej komo timokokouaj?

6 Biblia techmaka tayolmajxitilis tein techpaleuia maj amo techkui seki taman kokolis. Kemej neskayot, techiluia maj amo tikchiuakan tein techijtakoua uan maj kuali tikixejekokan kanachi titakuaskej uan kanachi titatayiskej (Prov. 23:20; 2 Cor. 7:1). Tein melauj, maski tiktakamatiskej tein Biblia tayolmajxitia, tiksentokaskej tikokolispeuaskej uan tiueuentsintiaskej. Yejua ika, komo timokokouaj, xa monekis tikixpejpenaskej keniuj timopajtiskej. Itech seki uejueyi altepemej, tokniuan hasta ueli kiixpejpenaj ox amo mopajtiskej itech kaltapajtiloyan ta ika okseki taman pajti tein onkas, kemej xiujpaj. Miakej tokniuan kintajkuilouiliaj tokniuan itech sucursales kampa tajtanij ox itaixpantijkauan Jiova uelis kiseliskej oso amo seki taman tapajtilis.

7. ¿Toni techpaleuis maj kuali tikixpejpenakan keniuj timopajtiskej?

 7 Tokniuan itech sucursales uan tayekananij itech nechikol amo kipiaj tanauatil techiluiskej toni tapajtilis uelis tikseliskej, maski tikintajtaniskej (Gál. 6:5). Sayoj ke tayekananij kemaj uelis techpaleuiskej maj kuali titaixpejpenakan. ¿Keniuj? Keman techelnamiktiskej tein Dios techiluia itech Biblia. Kemej neskayot, uelis techelnamiktiskej ke Dios kinnauatia itekitikauan maj amo kikuikan esti (Hech. 15:29). Ika nejin tanauatil tikajsikamatij ke amo uelis tikseliskej tapajtilis kampa techtaliliskej esti oso semej naui taman tein kisa keman kixejxelouaj esti. ¿Uan uelis tikseliskej tein kikixtiliaj nejon naui taman tein kipia esti? Sejse tokniuj moneki kiixpejpenas nejin ijkon kemej kiluia itanemilil. Seki tokniuan inintanemilil kiniluia ke uelis kiseliskej uan oksekin ke amo. * ¿Toni okseki tajkuilolmej itech Biblia uelis techpaleuiskej maj kuali tikixpejpenakan katiyejua tapajtilis tikseliskej?

8. ¿Keniuj techpaleuia Filipenses 4:5 keman tikixpejpenaj keniuj timopajtiskej?

8 Axkan amo moixmati keniuj se kipajtis seki kokolismej. Sayoj ke seki taltikpakneminij xa kiyekijtoskej ke kiixmatij se taman tapajtilis tein ika uelis se kipajtis se kokolis. Maj timoyekpiakan. Proverbios 14:15 kijtoua ke taltikpaknenkej akin kinextia tamatilis amo kineltoka nochi tein kiluiaj, ta achto kuali kinemilia toni kiixpejpenas kichiuas. Uan no, Pablo kijtoj ke akin kichiuaj kemej Cristo moneki kuali taixejekoskej (Filip. 4:5TNM). Komo ijkon tikchiuaj, nochipa tiktayekanaltiskej tikueyichiuaskej Dios uan amo semi techtekipachos tapajtilis. Amo tiknekij sayoj totech titanemiliskej (Filip. 2:4). Tikmatij ke kemej titajtakouanij, tiksentokaskej tikokolispeuaskej. Yejua ika, maj timochikauakan tiktayekanaltiskej itech tonemilis tiktekitiliskej Jiova (xikonixtajtolti Filipenses 1:10).

¿Tiktemouaj tikinchikaujkauiskej oksekin maj no taixpejpenakan kemej tejuan? (Xikonita párrafo 9)

9. 1) ¿Keniuj techpaleuia Romanos 14:13, 19 keman tikixpejpenaskej keniuj timopajtiskej? 2) ¿Toni uelis panos komo amo tiktakamatij tein Pablo tayolmajxitij?

9 Itech ne uejkauj xolal Roma, seki tokniuan  kinijijtouayaj oksekin porin amo tanemiliayaj kemej yejuan ika seki taman takual uan seki iluimej. Sayoj ke ika nejon kichiuayaj maj itech nechikol amo kuali mouikanij. Yejua ika, Pablo kiniluij: “Seki taneltokani kachi kinpouaj sekin tonalme uan kinemiliaj ke semi mouistik. Oksekin taneltokani kiyolnemilijtinemij ke amo teyi se tonal den kachi mouistik. Ta, nochi tonal mosenneuiliaj. Ika ya nojon cada se taneltokke moneki ma kuali kimati tech nitalnamikilis ke kox nochi kiyolpaktia Dios ten yejua kichiutinemi” (xikonixtajtolti Romanos 14:5, 13, 15, 19, 20). Nejin techmachtia ke moneki kuali titaixejekoskej uan tikpoujkaitaskej tein kinemiliaj okseki tokniuan uan amo tiktemoskej maj tanemilikan kemej tejuan. Komo amo tiktakamatij tein Pablo tayolmajxitij, ¿toni uelis panos? Ke uelis tikinyolxokoliskej tokniuan uan tikchiuaskej maj amo kuali mouikakan itech nechikol. Itech se ueyi altepet, se takat uan se siuat namikuanij kitemouayaj kichiuaskej maj okseki tokniuan kikouanij seki taman pajti uan maj kikuanij sayoj seki taman takual. Sekin ijkon kichiujkej, sayoj ke oksekin amo. Nejon amo tapaleuij kemej kichiayaj, uan miakej tokniuan kualankej. ¿Keyej mochiuak nejon kuejmol? Porin nejin namikuanij amo kuali taixejekojkej. Yejuan ueliaj kiixpejpenayaj ox tayiskiaj nejon pajti uan sayoj kikuaskiaj seki taman takual. Sayoj ke keman kitemojkej maj oksekin no kichiuanij nejon, kichiujkej maj tokniuan amo kuali mouikanij itech nechikol.

Maj timochikauakan tiktayekanaltiskej itech tonemilis tiktekitiliskej Jiova

10. ¿Keyej moneki tikpoujkaitaskej tein oksekin kiixpejpenaskej kichiuaskej? (Xikonita taixkopin ipeujyan tamachtilis.)

10 Kemansa xa amo kuali tikitaskej tein kichiuas se tokniuj itech se taman tein iselti moneki kiixpejpenas, kemej keniuj mopajtis. Sayoj ke amo moneki tikijijtoskej nion tiktemoskej tikchiuaskej maj kipata itanemilil. Tokniuj xa moneki okachi kuali kimachtis itanemilil (1 Cor. 8:11, 12). Oso xa tejuan monekis maj okachi kuali tikmachtikan totanemilil. Sejse moneki kiixpejpenas tein kichiuas uan kiselis tein kiualkuilis nejon.

KEMAN TIMOIXPETANIAJ

11, 12. ¿Keniuj techpaleuiaj Eclesiastés 3:4 uan Gálatas 5:19-21 maj kuali tikixpejpenakan keniuj timoixpetaniskej?

11 Tinochin moneki tiuetskaskej uan timoixpetaniskej, porin ijkon techchijchiuak Jiova (Ecl. 3:4). Sayoj ke komo tiknekij maj neixpetanilis techpaleui, moneki timoyekpiaskej ika toni neixpetanilis tikixpejpenaj uan kanachi tiempo tikuij. ¿Keniuj totanemilil techpaleuia maj kuali titaixpejpenakan?

“¿Nechiluia notanemilil komo teisa tein nikchiuasneki amo kuali yetok?”

12 Biblia kijtoua maj amo keman tikchiuakan tein amo kuali, kemej tiauilnemiskej, tikinueyichiuaskej tiotsitsin, tiktekitiltiskej naualot, timoteuiskej, tiyaskej iluimej kampa motelchiua tein amo kuali oso titauanaskej. Pablo kijtoj ke akin kichiuaj nejon amo kiseliskej iTekiuajyo Dios (Gál. 5:19-21TNM). Yejua ika, maj timotajtanikan: “¿Nechkaua notanemilil maj nimoixpetani ika neauiltilis kampa moita tateuilis oso kampa kinextia ke se altepet okachi kuali, oso tein kichiua maj nitateui? ¿Nechkaua  notanemilil maj nikita películas kampa monextia ke kuali maj se auilnemi, maj se tauana oso maj se kitekitilti naualot?”.

13. ¿Keniuj techpaleuiaj 1 Timoteo 4:8 uan Proverbios 13:20 maj kuali tikixpejpenakan keniuj timoixpetaniskej?

13 Maj tikitakan okseki tajkuilolmej itech Biblia tein uelis techpaleuiskej maj kuali tikixpejpenakan keniuj timoixpetaniskej. Kemej neskayot, miakej uelis kinemiliskej ke keman se mauiltia tepaleuia maj kuali se momachili uan maj kuali se moajsi, yejua ika moneki maj se kiixtali tonalmej keman se mauiltis. Uan 1 Timoteo 4:8 kiteajsikamatiltia ke se kichiuas nejon tepaleuia. Sayoj ke ¿komo tikuelitaj timauiltiskej iniuan miakej? ¿Moajsi se tayolmajxitilis tein moneki tiktakamatiskej? Kemaj. Proverbios 13:20 kijtoua: “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij kipias ouijkayot”. Kemej tikitaj, komo tiknekij kuali tikixpejpenaskej keniuj uan akoni iuan timoixpetaniskej, moneki tikmachtiskej totanemilil ika Biblia.

14. ¿Keniuj kinpaleuij tein tayolmajxitia Romanos 14:2-4 seki kalyetouanij?

14 Maj tikitakan tein kinpanok seki tokniuan namikuanij akin monotsaj Christian uan Daniela. Christian kijtoua ke se tonal keman taueyichiuayaj kemej kalyetouanij ika tajtojkej neixpetanilis iniuan ome ininichpochuan. Kijtojkej ke onkak seki neixpetanilis tein kuali uan seki tein amo kuali. No ika tajtojkej akonimej kuali iniuan se mouikas. Ompa, se ininichpoch kijtoj ke itech kaltamachtiloyan, seki telpochmej akin itaixpantijkauan Jiova kichiuaj seki taman tein yejua kiita ke amo kuali yetok. Uan no, kijtoj ke nejon kichiuaya maj no kinekini kichiuas kemej yejuan. Itatuan kiluijkej ke sejse taltikpaknenkej moneki kitekitiltis itanemilil uan kiixpejpenas toni kichiuas uan akoni iuan mouikas (xikonixtajtolti Romanos 14:2-4).

Maj tikmachtikan totanemilil ika Biblia, uan nejon techpaleuis maj amo timokalakikan itech ouijkayomej (xikonita párrafo 14)

15. ¿Keniuj techpaleuia Mateo 6:33 maj tikixpejpenakan keniuj tikuiskej totiempo?

15 ¿Toni tikonita ke okachi moneki? ¿Tionyas nechikolmej, tiontetapouis kuali tanauatilmej uan tionmomachtis Biblia, oso  tionmoixpetanis? Jesús kitemakak se tayolmajxitilis tein uelis techpaleuis maj tikixpejpenakan kanachi tiempo timoixpetaniskej. Yejua kijtoj ke moneki tiksentokaskej tiktemoskej yekinika iTekiuajyo Dios. Uan no kijtoj: “No xiktemokan ne yekchipaukanemilis ten Dios kuelita. Uan ijkon Yejuatsin namechyolmajxitis uan nankiseliske nochi ten monekis” (Mat. 6:33). Keman tikixpejpenaskej keniuj tikuiskej totiempo, totanemilil monekiskia techelnamiktis nejin tayolmajxitilis tein kijtoj Jesús.

KEMAN IKA TITAJTOSKEJ TEIN TIKNELTOKAJ

16. ¿Toni moneki techolinis totanemilil maj tikchiuakan?

16 Komo kuali tikmachtiaj totanemilil, amo sayoj techiluis maj amo tikchiuakan tein amo kuali, ta no techiluis maj tikchiuakan tein kuali, kemej tikteixmatiltiskej kuali tanauatilmej. Totanemilil techolinis maj tikintapouikan taltikpakneminij keniuj tamati Dios, kajkalpan uan kampa yeski timoajsiskej. Yejua nejon kipanouaya Pablo. Yejua kijtoj ke monekia kisentokas tanojnotsas porin kimachiliaya ke ijkon monekia kichiuas (1 Cor. 9:16). Komo tikchiuaj kemej yejua, tikchiujtoskej tein moneki uan totanemilil amo techkuejmolos. Uan no, Pablo kijtoj ke keman tikteixmatiltiaj kuali tanauatilmej, tiktemouaj maj inintanemilil taltikpakneminij kiseli nejon kuali tanauatilmej (2 Cor. 4:2).

17. ¿Toni kichiuak se ichpoch akin kuali kimachtijka itanemilil?

17 Maj tikitakan tein kipanok se tokniuj siuat akin monotsa Jacqueline. Keman kipiaya 16 xiujmej, itech kaltamachtiloyan se tonal momachtijkej ke nemilis iselti peuak. Yejua semi kiuelitaya tanankilis, sayoj ke nejon tonal itanemilil amo kikauak maj semi tanankiliani. ¿Keyej? Porin amo kinekia kipaleuis nejon tamachtilis. Yejua ika kiixtalij kimelauilis itamachtijkauj tein kineltoka. Jacqueline semi kimoujkaitak maj itamachtijkauj kuali kinankiliani uan no kiluij maj ika tajtouani ininixpan nochin akin iniuan momachtiaya keniuj mochijchiuak nochi tein onkak. Yejua semi kuali momachilij porin itanemilil tein kimachtijka ika Biblia kipaleuij maj kichiuani tein kuali. ¿No mitsonpaleuia motanemilil xikonchiua tein kuali?

18. ¿Keyej semi moneki maj kuali tikmachtikan totanemilil?

18 Komo timomachtiaj Biblia, itech titanemiliaj tein timomachtiaj uan tikchiuaj itech tonemilis, tikpiaskej se tanemilil tein kuali tamachtil. Nejin motelneki, porin techpaleuis maj tiktakamatikan itanauatiluan uan itamachtilisuan Jiova itech tonemilis. ¿Melauj ke nochin akin tikchiuaj kemej Cristo ijkon tiknekij tikchiuaskej?

^ párr. 7 Xikonita tamachtilis “Preguntas de los lectores” itech La Atalaya 15 de junio de 2004 páginas 29 hasta 31, uan amatajkuilol “Xiksentokakan itech inetasojtalis Dios”, páginas 215 hasta 218.