¿Keyej tataman tein kijkuilojkej Mateo uan Lucas keman ika tajtouaj ijkuak Jesús okichpilok katka?

Tein moajsi itech Mateo uan Lucas keman ika motajtoua Jesús keman okichpilok katka tataman porin Mateo okachi ika tajtoua José uan Lucas okachi ika tajtoua María.

Mateo tetapouia toni kichiuak José keman kimatik ke María kokoxkayetoya, ke se ángel kimelauilij itech se takochitalis tein panotoya uan keniuj kichiuak tein ángel kiluij (Mat. 1:19-25). Mateo no kimelaua ke se ángel kiluij José itech okse takochitalis maj cholouani Egipto iniuan ichankauan uan ke yejua tatakamatik. Uan no, kijtoua ke itech okse takochitalis se ángel kinauatij maj mokepa Israel uan ke mokepak uan mokaltalij Nazaret (Mat. 2:13, 14, 19-23).

Sayoj ke, Lucas kijtoua ke ángel Gabriel kikalpanoj María uan ke María kiitato Elisabet uan kiueyichiuak Jiova ika seki tajtolmej (Luc. 1:26-56). No kijtoua tein Simeón kiluij María ika tein kijyouiskia Jesús. Uan keman ika tajtoj tein panok keman Jesús kipiaya 12 xiujmej uan yajki templo iniuan ichankauan, Lucas kijtoua tein kijtoj María, amo tein kijtoj José. Uan no, kijtoua keniuj momachilij María ika nochi nejon tein panok (Luc. 2:19, 34, 35, 48, 51). Nejin kinextia ke Mateo okachi ika tajtoua tein kinemilij uan tein kichiuak José, uan Lucas okachi ika tajtoua tein kinemilij uan tein kichiuak María.

No tataman kemej kitekpankej akonimej katkaj ininuejkaujtatuan. Mateo kijtoua akonimej katkaj iuejkaujtatuan José uan kinextia ke Jesús kinamikia kiselis tanauatil kemej tekiuaj ijkon kemej David, porin katka itakpakoneuj José. ¿Keyej? Porin José pouia iniuan ichankauan tekiuaj David itechkopa semej ikoneuan, Salomón (Mat. 1:6, 16). Sayoj ke Lucas kijtoua akonimej katkaj iuejkaujtatuan María uan kinextia ke Jesús yekmelauj katka ichankauj tekiuaj David uan kinamikia kiselis tekiuajyot (Rom. 1:3). ¿Keyej? Porin María pouia iniuan ichankauan tekiuaj David itechkopa okse ikoneuj, Natán (Luc. 3:31, 32). Sayoj ke, komo iichpoch Helí katka María, ¿keyej Lucas kijtoua ke katka José? Porin keman motekpanayaj teuejkaujtatuan itech tajkuilolmej sayoj ixnesiaj inintokay takamej. Yejua ika, keman Lucas kijtoua ke José katka ikoneuj Helí, moajsikamatia ke katka imontikauj (Luc. 3:23).

Kemej Mateo uan Lucas kijtojkej akonimej katkaj ininuejkaujtatuan José uan María, kiyeknextiaj ke Jesús katka Mesías akin moijtojka ualaskia. Nochin kimatiaj ke Jesús ualeuaya itech ichankauan David, uan nion fariseos uan saduceos uelik kijtojkej ke amo. Axkan, nejon tokaymej semi techpaleuiaj maj mochikaua totakuaujtamatilis uan techpaleuia maj tikneltokakan ke Dios kichiuas tein motenkaua.