Se domingo tiotak, Kenneth uan Filomena, akin nemij ompa Curazao, kikalpanotoj se takat uan se siuat akin namikuanij akin kinmachtiayaj ika Biblia.

Kenneth kijtoua: “Keman tiajsikej ininchan, tikitakej ke tatsaktoya uan inincarro amo yetoya. Sayoj ke teisa nechyololinij maj niknotsa siuat ika teléfono”.

Siuat tanankilij uan kijtoj ke inamik yajka tekitito. Sayoj ke, niman keman kimatik ke Kenneth uan Filomena moajsiaj ikalixpan, kintatapouilij uan kinpanoltij.

Niman kiitakej ke siuat chokatoya. Keman Kenneth kichiuak se netataujtil tein ika peuaskiaj momachtiskej Biblia, siuat oksepa peuak choka. Yejua ika Kenneth uan Filomena ika netasojtalis kitajtanijkej toni kipanouaya.

Siuat kiniluij ke kinemilijtoya momiktis nejon tiotak uan kijkuilojtoya se carta kampa monauatijtoya iuan inamik, sayoj ke amo kitamij porin Kenneth tanotsak. Kintapouij ke motayokoltiaya, yejua ika kiixtajtoltilijkej seki textos itech Biblia tein kiyolchikaujkej. Nejon tajtolmej kimakixtijkej.

Kenneth kijtoua: “Tiktasojkamatilijkej Jiova maj techkauani maj tikpaleuikan nejin siuat akin tajyouijtoya uan okachiok maj techyololiniani maj tiknotsakan, xa itechkopa se ángel oso ika iespíritu”. *

¿Yekmelauj Dios kipaleuij Kenneth uan Filomena itechkopa se ángel oso iespíritu oso ichikaualis ijkon kemej yejuan kinemiliaj? ¿Oso sayoj kinemilij tanotsas?

Amo uelis senkis tikijtoskej ke melauak. Tein tikmatij yejua ke Dios inintechkopa ángeles techpaleuia maj tikixmatikan. Biblia kijtoua ke Dios itechkopa se ángel kiixyekanak Felipe se imomachtijkauj Jesús hasta kampa moajsia se ueyichiujkej etíope akin kitemouaya kiixmatis Dios (Hechos 8:26-31).

Miakej taneltokalismej tamachtiaj ke ángeles yekmelauj nemij uan ke sekin yolkualmej uan tapaleuiaj maj mochiua itanejnekilis Dios oso tematampauiaj. Miakej amo sayoj kineltokaj ke yekmelauj nemij ángeles, ta no ke semi techpaleuiaj. Sayoj ke, no moajsij akin amo inintech taneltokaj.

¿Yekmelauj nemij ángeles? Komo ijkon, ¿kani ualeujkej? ¿Toni kijtoua Biblia ika ángeles? ¿Techpaleuiaj? Maj tikitakan.

^ párr. 8 Biblia kijtoua ke itokay Dios yejua Jiova (Salmo 83:18).