Keniuj semi taman kemej Jesús kinitaya akin kipiayaj lepra?

Ne uejkauj, judíos senkis kimouiliayaj se taman lepra tein semi onkaya itech nejon tonalmej. Akin kipiaya nejon kokolis tein katka semi tamouilil ueliskia mikis inakayo, kiualkuiliaya seki taman tein kijtakoskia nochipa uan kojkoyonia inakayo. Kemej amo onkaya pajti, akin mokokouayaj monekia uejka yetoskej ininselti miak tonalmej uan monekia kiniluiskej oksekin ke kipiayaj lepra (Levítico 13:45, 46).

Judíos akin taixyekanayaj itech taneltokalis kiixtalijkej okseki tanauatilmej tein amo kijtouaya itanauatiluan Dios, tein monekia kitakamatiskej akin kipiayaj lepra tein kichiuaya maj okachi tajyouikan. Tamachtianij kinnauatiayaj akin amo kipiayaj lepra maj amo motokikan iniuan akin kipiayaj nejon kokolis uan maj mouejkatilikan kemej ome metro. Uan komo taejekaya, kiniluiayaj maj mouejkatilikan kemej 45 metros. Sekin akin momachtiayaj tanauatilmej tein kipiaj judíos kijtouayaj ke Tanauatil kiteajsikamatiltiaya ke akin kipiaya lepra amo monekia nemis kampa takenkalmej, nejon kijtosnekia ke amo ueliskia nemis itech xolalmej tein kinyoualouaya tepamit. Yejua ika, keman se tamachtijkej kiitaya ke se akin kipiaya lepra moajsia itech xolal, kitetemaya uan kitsajtsiliaya: “Xiyouj kampa moneki tiyetos, uan amo xikinmaua oksekin”.

Jesús amo ijkon katka. Yejua amo kinixtopeuaya akin kipiayaj lepra, ta kinmatokaya uan hasta kinpajtiaya (Mateo 8:3).

Taixyekananij judíos, ¿toni ika moixyekanayaj keman kikauayaj maj namikuanij kitsayanakan amat ininixpan tekiuanij?

Amat tein namikuanij kitsayankej ininixpan tekiuanij kemej itech xiuit 71 uan 72.

Itech yekinika siglo, tamachtianij judíos semi moixejekoltiayaj toni ueliskia kichiuas maj namikuanij kitsayanakan amat ininixpan tekiuanij. Yejua ika, seki fariseos kiyejyekojkej Jesús ika nejin netajtanil: “¿Kox kitekaulia in tanauatil de Moisés de ke se tagat ma mosiuakaua tenika tenesi ouijkayot?” (Mateo 19:3).

Tanauatil tein Dios kimakak Moisés kikauaya maj se takat kitsayana amat ininixpan tekiuanij komo kiajsia ke inamik auilnemik (Deuteronomio 24:1). Itech itonaluan Jesús, moajsiaj ome kaltamachtiloyamej kampa tataman kemej kiajsikamatiaj nejon tanauatil. Kaltamachtiloyan Samay, kampa senkis kichiuayaj tein kineltokayaj, kijtouaya ke namikuanij sayoj ueliskiaj kitsayanaskej amat ininixpan tekiuanij komo semej auilnemia. Sayoj ke, kaltamachtiloyan Hilel, kijtouaya ke se takat ueliskia kichiuas komo motajtolteuiayaj ika tein yeski taman. Itech nejin kaltamachtiloyan kijtouayaj ke takat ueliskia kikauas isiuauj komo amo kuali takualchiuaya oso kiajsia okse siuat akin okachi kiuelitaskia.

¿Toni Jesús kinnankilij fariseos? Yejua sayoj kijtoj: “Ne tagat motajtakolmakas kuak yejua kinemilis de ke kikauas isiuau maski yejua ne isiuau amo motajtakolmaka iuan okse tagat. [...] Uan monamiktis iuan okse siuat, yejua ne motajtakolmakas” (Mateo 19:6, 9).