Ipan sábado 1, metstli marzo, 2014, 823 Jehová itlajtoltemakauaj mosentilijkej kampa mochiua uejueyi tlanechikolistli ne altepetl Benín (Nigeria) pampa kinekiyayaj kiilnamikisej se tlamantli tlen tlauel ipati. Ipan Nigeria kichijtokej 3,000 kali kampa mosentiliaj Jehová itlajtoltemakauaj ika se programa tlen kinpaleuia ma kichijchiuakaj kali kampa mosentiliaj, ipan altepemej kampa amo tlauel tlatominpiaj. Nopa programa pejki ipan 1999.

Achtouia

Ipan nopa tonali, moilnamijki kenijkatsa ipan xiuitl 1920 ipan Nigeria pejkej kichiuaj kampeka kitemosej kanke uelis mosentilisej Jehová itlajtoltemakauaj. Achtouia mosentiliyayaj techaj o kemantika tlaxtlauayayaj kampa mosentiliyayaj. Kiijtojkej achtouia, ipan xiuitl 1935, mosentiliyayaj ipan se kali tlen kichijchijtoyaj ne altepetl Ilesha. Ipan xiuitl 1938 onkayaya san 14 tlanechikoli, uan kema tlamito xiuitl 1990, tlauel momiakilijtoya pampa onkayaya 2,681 tlanechikoli. Yeka miakej amo kipantiyayaj kanke mosentilisej. Ipan se keski kali mosentiliyayaj chikuasej tlanechikoli. Ipan sekinok altepemej, nopa kali kampa mosentiliyayaj amo uejueyi eliyaya, yeka amo kinaxiliyaya, yeka sekij mokauayaya kalixpa ijkatokej uan san monechkauiyayaj ipan ventanas kiampa ueliyayaj kikakij nopa tlamachtili. Sekij tlanechikoli mosentiliyayaj techaj o ipan escuelas.

Nama

Ipan 1990, nopa ueyi kali Betel tlen Jehová itlajtoltemakauaj pejki kintlanejtia tomij se keskij tlanechikoli, nopa tomij kikixtiyayaj tlen se fondo tlen inijuantij kichijtoya. Kiampa ueliskia kichiuasej sekinok kali kampa mosentiliskiaj Jehová itlajtoltemakauaj. Ipan 1997, nopa Comités Regionales de Construcción kinpaleuijtoyaj se 105 tlanechikoli ma kichijchiuakaj o ma kikualchijchiuakaj kali kampa mosentiliyayaj. Ipan xiuitl 1997-1999, kichijchijkej 13 kali kampa mosentiliaj Jehová itlajtoltemakauaj. Se kali kichijchiuayayaj san ipan chikome o ipan 15 tonali.

Maske kichijchijtoyaj miak kali kampa mosentiliskiaj Jehová itlajtoltemakauaj, nojua monekiyaya kichijchiuasej sekinok pampa tlauel momiakilijtoyaj Jehová itlajtoltemakauaj ipan Nigeria. Ipan abril tlen 1998, nopa ueyi kali Betel kiijtok monekiyaya se 1,114 kali kampa mosentiliskiaj.

Ipan nopa tlanechikoli tlen mochijki ne altepetl Benín, Don Trost, se katli kiyakana ueyi kali Betel ipan Nigeria, kiijtok: “¡Miak tekitl monekiyaya! Yeka timotlajtlaniyayaj: ‘¿Kenijkatsa tijchiuasej?’”. Ni monankilik ipan 1999, kema se chikuasej o chikueyi toikniuaj, katli kichijchiuaj kali kampa timosentiliaj o Grupos de Construcción de Salones del Reino, pejkej kinpaleuiaj tlanechikoli tlen onka ipan ni altepetl. Ipan 14 xiuitl tlen panotok, kichijchijkej sejse metstli 17 kali kampa mosentiliaj Jehová itlajtoltemakauaj, pampa nopa kali amo kitlaliliyayaj tlauel miak tlamantli.

Don Trost kiniljuik tlauel kuali tekititoyaj, uan nojkia kiijtok nojua poliuiyaya mochiuas miak tekitl. Ipan 2013, kipano se 8,000 maseualmej mochijkej Jehová itlajtoltemakauaj ne Nigeria. Yeka Don Tro0st kiijtok: “Teipa nojua monekis ma mochijchiua se 100 kali, sejse xiuitl”. Ipan 2013 itstoyaj se 351,000 Jehová itlajtoltemakauaj ne Nigeria uan onkayaya kipano se 5,700 tlanechikoli.