Nopa Watch Tower Bible and Tract Society of Pennsylvania pejki ipan xiuitl 1884 uan amo kichijkej para tomintlanisej. Kema kichijkej monejki kitlepanitasej nopa tlanauatili tlen ika moyakanaj ipan altepetl Pensilvania, Estados Unidos. Ni kichijkej pampa kiampa Jehová itlajtoltemakauaj uelij kichijchiuaj Biblias uan amatlajkuiloli tlen kimoyauaj ipan nochi Tlaltipaktli.

 Ika ni uelij kichiuaj miak tlamantli ipan “ininreligión, uelij temachtiaj uan tepaleuiaj”, uan nojkia tlauel “kimoyauaj nopa kuali tlamachtili tlen toTeotsij iTlanauatijkayo kampa Jesucristo tekichiuas”. Se akajya san uelis tekitis nopaya tlaj kitlaneuisej, uan amo pampa temaka tomij. Katli nopaya tekitij uan katli kiyakanaj tlen mochiua, san kinpaleuiaj Katli kinyakanaj Jehová itlajtoltemakauaj.

Sekinok tokajyotl tlen kitekiuiaj

 Jehová itlajtoltemakauaj amo san kitekiuiaj nopa Watch Tower Bible and Tract Society of Pennsylvania, nojkia kitekiuiaj sekinok tokajyotl ipan miak altepemej, kej “La Torre del Vigía”, “Watchtower” o sekinok tlen san kitlajtolkueptokej.

 Ika nochi ni tlamantli Jehová itlajtoltemakauaj ueltokej kichiuaj miak tlamantli. Ma tikitakaj se keski:

•   Kiijkuilouaj uan kichijchiuaj amatlajkuiloli. Biblia kichijchijtokej se 253 millones, uan nojkia mokixtijtok amatlajkuiloli ipan kipano 1,050 tlajtoli. Nojkia ipan jw.org, miakej maseualmej uelij kipouaj Biblia ipan kipano 300 tlajtoli. Uan nojkia uelij kimatij tlen Biblia kinankilia kej: “¿Qué es el Reino de Dios?”.

•   Temachtiaj. Kipiaj escuelas kampa temachtiaj ika Biblia. Ipan xiuitl 1943, pejki mochiua nopa Escuela Bíblica de Galaad de la Watchtower uan kinmachtijtokej kipano 10,000 Jehová itlajtoltemakauaj katli kintitlantokej kej misioneros o ma tlapaleuikaj nojua tlauel ma momoyajto nopa kuali tlamachtili. Nojkia, miakej maseualmej kuali kiyekouaj nopa tlamachtili tlen mopanoltia ipan tlanechikoli kampa mosentiliaj Jehová itlajtoltemakauaj. Uan nojkia kichijchijtokej se pilamochtsi ipan 136 tlajtoli tlen ika kinpaleuiaj maseualmej ma kiyekokaj tlapouasej uan tlajkuilosej.

•   Tepaleuiaj. Kinpaleuiaj katli tlaijiyouiaj kema se akajya kichiua tlen tlauel amo kuali, nojkia kinpaleuiaj kema se chikauak ajakatl o seyok tlamantli tetlasojsoljuilia. Kej kema mochijki se ueyi tlauilankayotl ipan altepetl Ruanda ipan xiuitl 1994 o kema mojmolinik tlali ipan Haití ipan xiuitl 2010.

 Maske nopa Watch Tower Bible and Tract Society of Pennsylvania, “La Torre del Vigía” uan sekinok tokajyotl tlen kitekiuiaj Jehová itlajtoltemakauaj kinpaleuijtok ma kichiuakaj miak kuajkuali tlamantli, amo san ya ni kinpaleuia ma tlajtolmoyauakaj. Nochi Cristo itokilijkauaj moneki tlajtolmoyauasej uan kinmachtisej sekinok tlen Biblia tlamachtia (Mateo 24:14; 28:19, 20). Uan motemachiaj toTeotsij kinpaleuis nojua tlauel ma tlajtolmoyauakaj (1 Corintios 3:6, 7).