Amo, Jehová itlajtoltemakauaj amo moneki titemakasej diezmo. Nochi tikixtlauaj ika tomij tlen toikniuaj temakaj ika nochi ininyolo. Uajka, ¿kenke sekij momajtokej temakaj diezmo uan kenke Jehová itlajtoltemakauaj amo kichiuaj?

Nopa Tlanauatili katli toTeotsij kinmakak israeleuanij kiijtouayaya monekiyaya kinmakasej sacerdotes nopa diezmo. Biblia kiijtoua Cristo itokilijkauaj ayokmo moneki kichiuasej tlen kiijtoua nopa Tlanauatili. Yeka, ipan ni tonali amo aka kinamiki kichiualtisej ma temaka diezmo (Hebreos 7:5, 18; Colosenses 2:13, 14).

Jehová itlajtoltemakauaj amo titemakaj diezmo yon seyok tlakajkaualistli. Tojuantij tijchiuaj kej nopa achtoui Cristo itokilijkauaj, inijuantij tlapaleuiyayaj ipan tlanechikoli pampa temakayayaj tomij ika nochi ininyolo, tlajtolmoyauayayaj uan amo tlainamayayaj kema tlamachtiyayaj ika Biblia.

Tijchiuaj kej kiijtoua ni texto: “Sejse inmojuantij moneki temakas keja ipa moyoliljuijtok para temakas. Amo xitemakakaj ika kuesoli, niyon pampa seyok inmechfuerzajuia, pampa toTeko kiiknelia tlen temaka ika pakilistli” (2 Corintios 9:7).