Elij se keskij Cristo itokilijkauaj katli kuali tlalnamikij uan kiyakanaj nochi tlen kichiuaj Jehová itlajtoltemakauaj ipan nochi Tlaltipaktli. Inijuantij kichiuaj ome tekitl:

•   Kitlachiliaj kema moijkuiloua nochi tlamachtili tlen nesi ipan amatlajkuiloli, tlen moixtoma ipan tlanechikoli uan kampa kinmachtiaj Jehová itlajtoltemakauaj (Lucas 12:42).

•   Kiyakanaj nochi tlen kichiuaj Jehová itlajtoltemakauaj kej tlajtolmoyaualistli uan kiitaj kuali ma motekiui tlen sekinok temakaj ika nochi ininyolo.

 Katli kinyakanaj Jehová itlajtoltemakauaj kichiuaj kej “nopa tlayolmelauanij uan ueuejtlakamej” tlen Jerusalén. Kema itstoyaj nopa achtoui Cristo itokilijkauaj, inijuantij kiijtouayayaj tlake mochiuaskia ipan tlanechikoli (Hechos 15:2). Kej nopa tlakamej tlen uejkajkia itstoyaj, Katli kinyakanaj Jehová itlajtoltemakauaj amo tlanauatiaj ipan tlanechikoli. Momachtiaj Biblia uan kikauaj ma kinyakana, nojkia kimatij Jehová kitekitlalijtok Jesucristo ma kiyakana tlanechikoli (1 Corintios 11:3; Efesios 5:​23).

¿Tlake inintoka Katli kinyakanaj Jehová itlajtoltemakauaj?

 Katli kinyakanaj Jehová itlajtoltemakauaj elij, Kenneth Cook Jr, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane uan Jeffrey Winder. Nochi tlatekipanouaj ipan Ueyi Kali Betel ne Warwick (Nueva York).

¿Kenijkatsa mosentikapaleuiaj Katli kinyakanaj Jehová itlajtoltemakauaj?

 Katli kinyakanaj Jehová itlajtoltemakauaj kichijtokej chikuasej comités tlen techpaleuia ma tijchiuakaj toteki. Ni tlakamej tlapaleuiaj ipan se o ome comité.

•   Katli kinyakanaj tlen kichiuaj sekinok comités. Kitlachiliaj nochi ma mochiua kej tekichiuanij tlanauatiaj uan kiitaj kenijkatsa tepaleuisej kema tetlasojsoljuilia se tlamantli, kema Jehová itlajtoltemakauaj kinpano tlen amo kuali uan kema amo kinekij kinkauasej ma monechikokaj o ma tlajtolmoyauakaj.

•   Katli kintlapejpeniaj ajkia tlapaleuisej. Kiyakanaj tlen kichiuaj Jehová itlajtoltemakauaj katli tekitij ipan nochi kali Betel.

•   Katli kiyakanaj tlen mochiua ika amatlajkuiloli. Kiyakanaj kema kichijchiuaj uan kititlanij amatlajkuiloli, kema kisenkauaj se yankuik kali kampa mosentiliaj, kampa tlajtolkuepaj uan sekinok kali Betel.

•   Katli kiyakanaj tlajtolmoyaualistli. Kiyakanaj tlen mochiua kema momoyaua nopa “kuali tlamachtili” tlen toTeotsij iTlanauatijkayo (Mateo 24:14).

•   Katli kiitaj kenijkatsa techmachtisej. Kiijkuilouaj tlen moixtoma ipan tlanechikoli, kampa kinmachtiaj Jehová itlajtoltemakauaj uan ipan grabaciones uan videos.

•   Katli kiijkuilouaj amatlajkuiloli. Kiijkuilouaj tlamachtili tlen nesi ipan amatlajkuiloli uan kampa titlamachtiaj ipan Internet, nojkia kiyakanaj nochi tlen mochiua kampa tlajtolkuepaj.

 Maske miak tekitl mochiua ipan sejse comité, Katli kinyakanaj Jehová itlajtoltemakauaj monechikouaj sejse semana uan kiampa kiitaj tlake nojua poliui kichiuasej Jehová itlajtoltemakauaj ipan nochi Tlaltipaktli. Kema monechikouaj kipouaj Biblia, kikauaj toTeotsij itonal ma kinyakana uan sansejko kiitaj tlen kichiuasej (Hechos 15:25).

¿Ajkia inijuantij kinpaleuiaj Katli kinyakanaj Jehová itlajtoltemakauaj?

 Ipan sejse comité itstokej se keskij Cristo itokilijkauaj katli amo kitlauelkauaj toTeotsij, kuali tlapaleuiaj uan kimatij kenijkatsa kichiuasej nopa tekitl tlen mochiua kampa kintekitlalijtokej (1 Corintios 4:2). Nochi katli tlapaleuiaj monechikouaj sejse semana. Maske inijuantij amo kitlapejpeniaj tlen mochiuas, kena kiijtouaj tlen moiljuiaj uan kiitaj kenijkatsa uelis tlapaleuisej, uan nojkia kichiuaj tlen kitlapejpenik nopa comité uan kiitaj kenijkatsa kisa nopa tlamantli. Kemantika Katli kinyakanaj Jehová itlajtoltemakauaj kiniljuiaj ma kinpaxalokaj sekinok Jehová itlajtoltemakauaj ipan sekinok altepemej o ma tlamachtikaj ipan nopa tlanechikoli tlen mochiua sejse xiuitl o kema tlamij momachtiaj ipan Galaad.