Jehová itlajtoltemakauaj tijmatij nopa tlamachtili uan tlanauatili tlen eltok ipan Biblia uelis techpaleuis kuali ma tijtlapejpenikaj tlake tijchiuasej uan kiampa kuali tiitstosej (Isaías 48:17, 18). Maske tojuantij amo tikijkuilojkej ni tlamachtili, kena tijneltokaj. Ma tikitakaj se keski tlamantli tlen kinextia kenijkatsa tikitaj kema se akajya kineki nemis iuaya seyok pampa kineki mosenkauas iuaya. *

  • Katli ya mosenkajtokej moneki nochipa itstosej sansejko (Mateo 19:6). Jehová itlajtoltemakauaj kimatij san moneki nemisej iuaya se akajya tlaj nelnelia kinekij mosenkauasej.

  • Tlaj se telpokatl o se ichpokatl ayamo kinamiki mosiuajtis o monamiktis pampa amo kipia miak xiuitl, amo moneki nemis iuaya se akajya. San uelis mosenkauasej kema ya tlalnamiktosej, pampa kiampa ayokmo san kinekisej motekasej ininuaya sekinok (1 Corintios 7:36).

  • Se tlakatl o se siuatl amo kinamiki nemis iuaya se akajya san pampa moiljuia ya kiixpolok itoka kampa nesi mosenkajtok, pampa toTeotsij san kiita kuali se akajya ma kiixpolo itoka kampa nesi mosenkajtok tlaj isiua o iueue momekatik. San kiampa kena kualtiaskia sampa monamiktis o mosiuajtis (Mateo 19:9).

  • Cristo itokilijkauaj katli kinekij mosenkauasej moneki kichiuasej san ininuaya katli nojkia kineltokaj toTeotsij (1 Corintios 7:39). Jehová itlajtoltemakauaj san mosenkauaj ininuaya toikniuaj katli ya moatsonpoliuiltijtokej uan amo ininuaya katli san momachtiaj Biblia (2 Corintios 6:14). ToTeotsij amo kipaktia itekipanojkauaj ma mosenkauakaj ininuaya katli amo kineltokaj (Génesis 24:3; Malaquías 2:11). Uan nopa ixtlamatinij kiitstokej kenijkatsa katli mosenkajtokej uan kineltokaj sanse tlamantli, tlauel kuali itstokej. *

  • Telpokamej moneki kinneltokasej inintatauaj (Proverbios 1:8; Colosenses 3:20). Telpokamej katli itstokej ininuaya inintatauaj moneki kichiuasej tlen inijuantij kiniljuiaj. Tlaj kiniljuisej keski xiuitl moneki kiaxitisej uan kiampa nemisej iuaya se akajya uan tlake amo kinamiki kichiuasej, moneki kinneltokasej.

  • Biblia kiijtoua: “Sejse tojuantij tijpiaj toteki para tijmokuitlauisej tlen tojuantij tonemilis” (Gálatas 6:5). Yeka, maske toselti uelis tijtlapejpenisej tlaj tijnekij tinemisej iuaya se akajya, nochipa moneki tikilnamiktosej tlen Biblia tetlajtolmaka. Miakej kiniljuiaj toikniuaj katli kuali tlalnamikij ma kintlajtolmakakaj (Proverbios 1:5).

  • Miakej san tlajtlakolchiuaj kema kisaj ininuaya katli kiixtokaj. Biblia kiijtoua tlauel amo kuali kema se momekatia. Ni amo kiijtosneki san kema motekaj ininuaya sekinok, se momekatis nojkia kiijtosneki kema mopipitsouaj uan mochichij kampa amo kinamiki (sexo oral), kema mochiuiliaj miak tlamantli ipan inintsinteno (sexo anal) o kema moijitskiaj kampa amo kinamiki (1 Corintios 6:9-11). ToTeotsij tlauel kikualankaita tlaj se akajya katli nemi iuaya seyok uan amo mosenkajtok iuaya motsoponiaj uan moijitskiaj, maske amo motekaj sansejko (Gálatas 5:19-21). Biblia nojkia kiijtoua tlauel amo kuali nopa “fiero tlajtoli” tlen moiljuiaj maseualmej pampa kinekij motekasej sansejko (Colosenses 3:8).

  • Toyolo tlauel tekajkayaua (Jeremías 17:9). Ueliskia kichiuas se akajya ma tlajtlakolchiua maske kimati amo kuali tlen kichiua. Yeka tlaj se akajya nemi iuaya seyok pampa moixtokaj, amo moneki itstosej ininselti pampa ininyolo ueliskia kinyoltilanas ma tlajtlakolchiuakaj. Kualtiaskia itstosej ininuaya sekinok o kiiljuisej se akajya ma itsto ininuaya kiampa amo kichiuasej tlen amo kinamiki (Proverbios 28:26). Cristo itokilijkauaj kimatij tlauel mauilili tlaj mosenkauaskiaj iuaya se akajya katli kiixmatkej ipan Internet, pampa amo kuali kiixmatij (Salmo 26:4).

^ párr. 2 Ipan sekij altepemej maseualmej momajtokej mosenkauasej maske kemantika amo kiixmatij ajkia iuaya mosiuajtisej o monamiktisej. Biblia amo kiijtoua tlaj tlakatl uan se siuatl achtoui moneki moixmatisej tlaj kinekij mosenkauasej.

^ párr. 6 Ipan nopa pilamochtsi Marriage & Family Review kiijtoua ixtlamatinij “ika expa kiitakej kenijkatsa katli ya uejkajtok mosenkajtokej (uelis kipano 25 xiuitl) tlauel kuali itstokej pampa mosenkajkej ininuaya katli kipiaj sanse religión uan kineltokaj sanse tlamantli” (Volumen 38, número 1, página 88, 2005).