Ir al contenido

¿Tlake kineltokaj Jehová itlajtoltemakauaj?

¿Tlake kineltokaj Jehová itlajtoltemakauaj?

Jehová itlajtoltemakauaj tijchiuaj kampeka tijchiuasej tlen Jesús tlamachtik, kiampa kej kichijkej iapóstoles. Ipan ni tlamachtili tikitasej se keski tlamantli tlen tijneltokaj.

  1. ToTeotsij. Tijueyichiuaj san toTeotsij katli melauak, tlen ‘tlauel ueyiʼ uan tlen kichijchijki nochi tlen onka. Itoka Jehová (Salmo 83:18, TNM; Apocalipsis [Revelación] 4:​11). Ya nojkia elki iTeotsij Abraham, Moisés, uan Jesús (Éxodo 3:6; 32:11; Juan 20:17).

  2. Biblia. Tijmatij ni amochtli kipia tlamachtili tlen toTeotsij kineki ma kimatikaj nochi maseualmej (Juan 17:17; 2 Timoteo 3:​16). Nochi tlen tijneltokaj eltok ipan nopa 66 pilamochtsitsij tlen kipia Biblia, katli kiixmatij kej Nopa Achtoui Tlajtoli uan Nopa Yankuik Tlajtoli. Se tlamachtijketl katli itoka Jason BeDuhn kiijkuilok, Jehová itlajtoltemakauaj “kineltokaj uan kichiuaj tlen eltok ipan Biblia uan amo kipatlatokej se tlamachtili yon kiixtomaj kej inijuantij moiljuiaj”. *

    Maske tijneltokaj nochi tlen Biblia kiijtoua, tijmatij se keski tlapoualistli san kiixnextia se tlamantli (Apocalipsis 1:1, TNM).

  3. Jesús. Tijchiuaj tlen Jesús tlamachtik uan nojkia tijchiuaj tlen ya kichijki. Nojkia tijtlepanitaj pampa eli toTeotsij iKone uan pampa techmakixtik (Mateo 20:28; Hechos 5:​31). Kiampa tijnextiaj tielij Cristo itokilijkauaj (Hechos 11:26). Biblia amo kiijtoua Jesús yaya toTeotsij katli kipia nochi Chikaualistli yon amo tlamachtia nopa Trinidad (Juan 14:28).

  4. ToTeotsij iTlanauatijkayo. ToTeotsij iTlanauatijkayo amo eli se tlamantli tlen eltok ipan maseualmej ininyolo. Ya kitlalijtok iTlanauatijkayo ma tekichiua ne iluikak. ITlanauatijkayo kintlamiltis nochi sekinok tlanauatianij uan kichiuas tlen toTeotsij mosentlalijtok kichiuas ipan Tlaltipaktli (Daniel 2:​44; Mateo 6:​9, 10). Tijmatij ni nechka mochiuas, pampa ipan ni tonali moaxitijtok tlen Biblia kiijtok panoskia ipan “itlamia tonali” (2 Timoteo 3:​1-5; Mateo 24:​3-​14).

    Jesús tekichiua ipan toTeotsij iTlanauatijkayo. Uan ipan 1914 pejki tlanauatia (Apocalipsis 11:15).

  5. Techmakixtisej. Pampa Jesús motemaktilik, uelis techmakixtisej tlen tlajtlakoli uan mikilistli (Mateo 20:28; Hechos 4:​12). Tlen Jesús kichijki uelis techpaleuis tlaj titlaneltokasej ipan ya, tijpatlasej tonemilis uan timoatsonpoliuiltisej (Mateo 28:19, 20, TNM; Juan 3:​16; Hechos 3:​19, 20). Tlen tijchiuaj, kinextia tlaj nelnelia titlaneltokaj (Santiago 2:​24, 26). Maske tlauel tijtekipanoskiaj Jehová, ya amo techmakixtis pampa tijtlantokej, techmakixtis pampa tlauel techiknelia (Gálatas 2:​16, 21).

  6. Iluikak. Jehová, Jesús uan iluikaeuanij, itstokej iluikak kampa amo uelis tikinitasej (Salmo 103:19-​21; Hechos 7:​55). * San 144,000 maseualmej kinyolkuisej uan yasej iluikak, inijuantij tlanauatisej iuaya Jesús ipan toTeotsij iTlanauatijkayo (Daniel 7:​27; 2 Timoteo 2:​12; Apocalipsis 5:​9, 10; 14:​1, 3).

  7. Tlaltipaktli. ToTeotsij kichijki Tlaltipaktli pampa kinejki nopaya nochipa ma itstokaj maseualmej (Salmo 104:5; 115:16; Eclesiastés 1:4). ToTeotsij kinteochiuas nochi katli kineltokasej, uan kinkauas nochipa ma itstokaj ipan Xochimili kampa ayokmo mokokosej (Salmo 37:11, 34).

  8. Tlen amo kuali uan tlaijiyouilistli. Biblia kiijtoua se iluikaejketl kiijixnamijki toTeotsij. Kiampa pejki tlen amo kuali uan tlaijiyouilistli (Juan 8:​44). Ni iluikaejketl katli kitokaxtijkej Diablo uan Satanás, kichijki Adán uan Eva nojkia ma kiixpanokaj toTeotsij. Pampa inijuantij tlaijixnamijkej, nochi tlauel titlaijiyouiaj (Génesis 3:​1-6; Romanos 5:​12). ToTeotsij kikajtok ma onka tlaijiyouilistli uan tlen amo kuali pampa kiampa kinextis Satanás istlakatki kema kiijtok toTeotsij amo kuali tlanauatia. Maske kikajtok ma titlaijiyouikaj, mosentlalijtok nechka kitlamiltis tlen amo kuali.

  9. Mikilistli. Kema maseualmej mikij, ayokmo itstokej (Salmo 146:4; Eclesiastés 9:​5, 10). Katli miktokej amo tlaijiyouijtokej ipan tlitl.

    ToTeotsij kinyolkuis tlauel miakej maseualmej uan sampa itstosej (Hechos 24:15). Katli kinyolkuisej uan amo kineltokasej toTeotsij, kintsontlamiltisej uan ayokmo kema moyolkuisej (Apocalipsis 20:14, 15).

  10. Tochampoyouaj. Tojuantij tijmatij san kinamiki mosenkauasej se tlakatl iuaya se siuatl, pampa kiampa kichijki toTeotsij kema kinsansejkotilik Adán uan Eva. Uan san uelis kiixpolosej nopa amatl kampa nesi mosenkajtokej tlaj se tlen inijuantij momekatik (Mateo 19:​4-9). Tijmatij tlauel kuali tlen Biblia techtlajtolmaka uan techpaleuia ma tiyolpakikaj ika tochampoyouaj (Efesios 5:22–​6:1).

  11. Kej tijueyichiuaj toTeotsij. Tojuantij amo tijtekiuiaj kuamapeli o cruz yon tikinueyichiuaj tlaixkopinkayomej (Deuteronomio 4:​15-​19; 1 Juan 5:​21). Tlen tijchiuaj kema tijueyichiuaj toTeotsij:

  12. Kej timosentikapaleuiaj. Jehová itlajtoltemakauaj tiitstokej ipan miak tlanechikoli. Se keskij ueuejtlakamej kiyakanaj se tlanechikoli, inijuantij amo moueyimatij uan amo kintlaxtlauiaj (Mateo 10:8; 23:8). Kampa timosentiliaj amo titlajtlanij tomij yon tikiniljuiaj ma temakakaj diezmo (2 Corintios 9:7). Nochi tlen tijchiuaj tikixtlauaj ika tomij tlen Jehová itlajtoltemakauaj temakaj ika nochi ininyolo uan amo kiijtouaj ajkia inijuantij temakaj tomij.

    Ipan ueyi kali Betel tlen eltok ne Brooklyn (Nueva York) itstokej se keskij toikniuaj Katli kinyakanaj Jehová itlajtoltemakauaj, inijuantij kipia miak xiuitl kitekipanojtokej Jehová (Mateo 24:45).

  13. Sansejko tiitstokej. Maske kampa ueli tieuaj, nochi tijneltokaj sanse tlamachtili (1 Corintios 1:​10). Nojkia tijchiuaj kampeka kuali timouikasej uan amo timochikoitasej (Hechos 10:34, 35; Santiago 2:4). Uan sejse tlen tojuantij tijtlapejpeniaj tlen tijchiuasej uan tijkauaj ma techyakana tlen Biblia techtlajtolmaka (Romanos 14:​1-4; Hebreos 5:​14).

  14. Kej timonejnemiltiaj. Tijchiuaj kampeka nochipa tijnextisej nelia timoikneliaj (Juan 13:34, 35). Uan amo tijnekij tijchiuasej tlen toTeotsij amo kipaktia, yeka amo tijkauaj ma techtlalilikaj estli, pampa tlauel tijpatiitaj (Hechos 15:28, 29; Gálatas 5:​19-​21). Nojkia tijchiuaj kampeka tiitstosej ika tlaseuilistli ika nochi maseualmej, yeka amo titlateuiaj kema onka se tlauilankayotl (Mateo 5:9; Isaías 2:4). Tikintlepanitaj tekichiuanij uan tijneltokaj tlanauatili tlen kitlalijtokej kema amo kiixpano toTeotsij itlanauatiljuaj (Mateo 22:21; Hechos 5:​29).

  15. Kej timouikaj ininuaya sekinok. Jesús kiijtok: “Xikinikneli sekinok keja timoiknelia moselti”. Nojkia, kiijtok itokilijkauaj “axiaxkauaj ni Tlaltipaktli” (Mateo 22:39; Juan 17:16). Maske amo timokalakiaj ipan política yon amo tikinpaleuiaj sekinok religiones, tijchiuaj kampeka tikinchiuilisej tlen kuali nochi maseualmej (Gálatas 6:​10; 2 Corintios 6:​14). Uan tijtlepanitaj tlen sekinok kitlapejpeniaj kichiuasej (Romanos 14:12).

Tlaj nojua tijneki tijmatis tlen Jehová itlajtoltemakauaj tijneltokaj, uelis tijtemos kampa titlamachtiaj ipan Internet. Nojkia uelis titechtlajkuiljuilis ipan se kali Betel, uelis tias timonechikoti touaya nechka kampa ta tiitstok o uelis timonojnotsas iuaya se tlen Jehová itlajtoltemakauaj.

^ párr. 4 Xikita nopa amochtli Truth in Translation (La verdad en la traducción), iamayo 165.

^ párr. 10 Maske amo kuali ajakamej kinkuamajkajkej ipan Tlaltipaktli, nojua amo ueli tikinitaj (Apocalipsis 12:​7-9).