Katli tijtekipanouaj Jehová tijchiuaj kampeka tiitstosej sansejko ininuaya tochampoyouaj, uan tikinpaleuiaj tokalnechkauaj nojkia kiampa ma kichiuakaj. Tijpatiitaj tiitstosej ininuaya pampa tijmatij toTeotsij kichijki ma tiitstokaj ininuaya tochampoyouaj (Génesis 2:​21-​24; Efesios 3:​14, 15). Tlen Biblia tetlajtolmaka tlauel kinpaleuijtok miakej maseualmej tlen kampa ueli euaj ma itstokaj sansejko uan ika pakilistli iuaya ininsiua o ininueue.

¿Tlake kinpaleuia Jehová itlajtoltemakauaj nochipa ma itstokaj sansejko ininuaya ininchampoyouaj?

Jehová itlajtoltemakauaj kichiuaj kampeka kichiuasej tlen Biblia tetlajtolmaka, pampa ni kinpaleuia kuali ma mouikakaj ininuaya ininsiua o ininueue, uan nojkia kuali ma kiniskaltikaj ininkoneuaj (Proverbios 31:10-​31; Efesios 5:⁠22–​6:4; 1 Timoteo 5:8). Tlen Biblia tetlajtolmaka nochi uelis kinpaleuis, maske sekij amo kipiaj sanse ininreligión (1 Pedro 3:​1, 2). Ma tikitakaj tlake kiijtojtokej se keskij maseualmej kema ininsiua o ininueue mochijkej se tlen Jehová itlajtoltemakauaj.

  • “Ipan nopa achtoui chikuasej xiuitl ika timosenkajtoyaj san timokualaniyayaj uan amo kuali tijyolmatiyayaj. Kema Ivete mochijki se tlen Jehová itlajtoltemakauaj, pejki tlauel teiknelia uan kipixki ueyi iyolo. Tlen kichijki techpaleuijtok nojua ma tiitstokaj sansejko.” (Clauir, itstok Brasil)

  • “Kema noueue Chansa pejki momachtia ininuaya Jehová itlajtoltemakauaj, na tlauel nikualanki, pampa nimoiljuiyaya Jehová itlajtoltemakauaj kichiuayayaj ma mokualanikaj o ma moxelokaj maseualmej ininuaya ininchampoyouaj. Nama nijmati nopa amo nelia, pampa nikitstok kenijkatsa Biblia techpaleuijtok ma tiitstokaj sansejko.” (Agness, itstok Zambia)

Nojkia, kema titlajtolmoyauaj tikinmachtiaj maseualmej kenijkatsa Biblia uelis kinpaleuis ipan ininnemilis. Tikinixtomiliaj ika Biblia tlamachtili kej ni:

  • ¿Kenijkatsa uelis tijmatis iuaya ajkia uelis timosenkauas?

  • ¿Kenijkatsa uelis inkisenkauasej kuesoli?

  • ¿Kenijkatsa uelis kuali timouikas iuaya mosiua o moueue itatauaj?

  • ¿Kenijkatsa uelis inkitekiuisej kuali inmotomij?

  • ¿Tlake inmechpaleuis ayokmo ximokualanikaj?

  • ¿Kenijkatsa uelis inmotlapojpoljuisej?

  • ¿Kenijkatsa uelis inkintlalnamiktisej inmokoneuaj?

¿Timokualanis iuaya mosiua o moueue tlaj timochiuas se tlen Jehová itlajtoltemakauaj?

Kemantika sekij kena mokualaniaj. Ipan xiuitl 1998, katli tekitij ipan empresa de investigación Sofres kiijtojkej 1 tlen 20 katli mosenkajtokej peuaj kipiaj kuesoli kema se tlen inijuantij kipatla ireligión.

Jesús kiijtok kemantika itokilijkauaj kipiaskiaj kuesoli ininuaya ininchampoyouaj (Mateo 10:32-​36). Nopa Will Durant, katli momachtia tlen uejkajkia panok kiijtok ipan nopa Imperio Romano “miakej kinteljuiyayaj Cristo itokilijkauaj pampa kiijtouayayaj san kinxeloyayaj maseualmej ika ininchampoyouaj”. * Ipan ni tonali kemantika nojkia techteljuiaj pampa moiljuiaj san tikinxelouaj maseualmej o tijchiuaj ma mokualanikaj. ¿Nelnelia Jehová itlajtoltemakauaj kichiuaj ma mokualanikaj maseualmej ininuaya ininchampoyouaj o ayokmo ma itstokaj sansejko?

Ueyi kali Tribunal Europeo de Derechos Humanos (TEDH)

Kema kinteljuijkej Jehová itlajtoltemakauaj kichiuaj maseualmej ma mokualanikaj o ayokmo ma itstokaj sansejko ininuaya ininchampoyouaj, katli tekitij ipan Tribunal Europeo de Derechos Humanos kiijtojkej kemantika onka kuesoli pampa katli amo kitekipanoua Jehová “amo kikaua se tlen ichampoyouaj ma kichiua tlen kineltoka yon amo kitlepanita tlen kineltoka”. Uan nojkia kiijtojkej: “Nochi maseualmej kipiaj ni kuesoli ininuaya ininchampoyouaj pampa amo sanse ininreligión; ni kuesoli amo san kinpano Jehová itlajtoltemakauaj”. * Uan maske sekij amo kinpaktia tlen tijneltokaj uan tlauel kualanij, Jehová itlajtoltemakauaj tijchiuaj kampeka tijneltokasej tlen Biblia techtlajtolmaka: “Amo kema xikinkuepilikaj tlen inmechchiuilijtokej tlen axkuali. [...] Hasta kampa inuelij, xiitstokaj ika yejyektsi ika nochi tlakamej” (Romanos 12:17, 18).

¿Kenke Jehová itlajtoltemakauaj mosenkauaj san iuaya seyok katli nojkia se tlen Jehová itlajtoltemakauaj?

Biblia kiijtoua moneki timosenkauasej san iuaya seyok “tlen nojkia kineltoka toueyiteko”, yeka tojuantij san timosenkauaj iuaya seyok katli nojkia kitekipanoua Jehová pampa tijneltokaj tlen Biblia technauatia (1 Corintios 7:​39). Tlen toTeotsij technauatia tlauel techpaleuia. Nopa pilamochtsi Journal of Marriage and Family, xiuitl 2010, kiijtok kema “kipiaj sanse ininreligión katli mosenkajtokej uan sentik kichiuaj tlen kineltokaj”, tlauel kinpaleuia kuali ma mouikakaj. *

Jehová itlajtoltemakauaj amo kiniljuiaj katli itstokej ipan ininreligión ma kinkauakaj ininsiua o ininueue tlaj amo kitekipanoua Jehová. Biblia kiijtoua: “Intla ama se tlakatl kineltoka toTeko uan kipia isiua tlen axkineltoka, uan isiua kineki mokauas iuaya, ma mokaua. Nopa tlakatl ma axkikajteua. Uan intla se siuatl tlen ama kineltoka toTeko kipia iueue tlen axkineltoka, uan iueue kineki mokauas iuaya, ma mokaua. Nopa siuatl ma axkikajteua” (1 Corintios 7:​12, 13). Tojuantij nojkia tijneltokaj ni tlanauatili.

^ párr. 17 Xikita nopa amochtli César y Cristo, tomo II, iamayo 647.

^ párr. 18 Xikita Testigos de Jehová de Moscú contra Rusia, iamayo 26 uan 27, párrafo 111.

^ párr. 20 Xikita pilamochtsi Journal of Marriage and Family, volumen 72, número 4 (agosto 2010), iamayo 963.