Ir al contenido

¿Kiyoliti toTeotsij nochi tlamantli ika evolución?

¿Kiyoliti toTeotsij nochi tlamantli ika evolución?

Tlen Biblia kiijtoua

Amo. Biblia xitlauak kiijtoua toTeotsij kinchijchijki maseualmej uan nochi tlen yoltok, kichijchijki xiuitl tlen temaka iyol uan kichijki tlapialmej ma kinpiakaj “ininkoneuaj keja inijuantij” (Génesis 1:12, 21, 25, 27; Apocalipsis 4:11). Nojkia, Biblia kiijtoua nochi maseualmej elij ininkoneuaj Adán uan Eva (Génesis 3:20; 4:1). Ika ni tlamantli Biblia kinextia toTeotsij amo kitekiuik evolución kema kichijchijki nochi tlen onka. Uan Biblia nojkia amo kiijtoua tlaj amo melauak kema ixtlamatinij kiijtouaj miak tlamantli mopatla ipan tlapialmej o kuatinij. *

 ¿Tlake kineltokaj se keskij maseualmej?

Nopa tlajtoli evolución teística kiijtosneki miak tlamantli. Nopa Encyclopædia Britannica, kiijtoua kiijtosneki “toTeotsij kipatla se keski tlamantli tlen tlapialmej o kuatinij uan kiampa kichiua ma yoli sekinok tlamantli”.

Nojkia kiijtosneki ni tlamantli:

  • Tlapialmej uan nochi tlamantli tlen yoltoya uejkajkia mopatlatiualajtok uan kiampa mochijkej nochi tlamantli tlen nama tikitaj.

  • Se tlamantli ueli mopajpatla uan teipa ayokmo nesi kej achtouia nesiyaya. Nochi ni tlamantli kiiljuiaj macroevolución.

  • Ni tlamantli toTeotsij kichiua.

 ¿Nopa evolución eli sanse ika tlen kiijtoua Biblia?

Tlaj nopa evolución teística eliskia melauak, uajka tlen kiijtoua Génesis amo nochi eliskia melauak. Uan Jesús kiijtok nelia melauak tlen ijkuilijtok ipan Génesis (Génesis 1:26, 27; 2:18-24; Mateo 19:4-6). Biblia kiijtoua kema Jesús ayamo ualayaya ipan Tlaltipaktli, itstoya iuaya toTeotsij nepa iluikak uan kipaleuik kichijchiuas “nochi tlamantli” (Juan 1:3). Yeka kema kiijtouaj toTeotsij kichijchijki nochi tlen yoltok ika evolución amo eli sanse ika tlen Biblia tlamachtia.

 ¿Kema se keski tlamantli tlen yoltok mopatla kej nesi kiijtosneki eli evolución?

Biblia amo kiijtoua keski imiakpa mopatla se keski tlamantli tlen yoltok. Nojkia amo kiijtoua tlaj tlapialmej uan kuatinij tlen toTeotsij kinchijchijki amo mopatlaj kema momatij kampa itstokej o kema momiakiliaj. Sekij moiljuiaj kema mopatla se tlamantli eli evolución, nopa amo nelia pampa kema kiampa pano amo yoli se yankuik tlamantli.

^ párr. 1 Ni tlamantli tlen mopatla nojkia kiiljuiaj microevolución.