Ir al contenido

¿ToTeotsij itstok kampa ueli?

¿ToTeotsij itstok kampa ueli?

Tlen Biblia kiijtoua

ToTeotsij kiita nochi tlen pano uan kitekiuia ichikaualis ika tlen ya kineki kichiuas (Proverbios 15:3; Hebreos 4:13). Biblia amo tlamachtia toTeotsij itstok kampa ueli o ipan tlen ueli tlamantli. Biblia tlamachtia toTeotsij eli se tonaltsi uan itstok ipan iluikak.

  • ¿Kenijkatsa eli toTeotsij? ToTeotsij eli se tonaltsi (Juan 4:24). Yeka, amo ueli tikitaj (Juan 1:18). Nojkia, Biblia kiijtoua toTeotsij kipia kampa itstok, uan amo kiijtoua itstok kampa ueli (Isaías 6:1, 2; Apocalipsis 4:2, 3, 8).

  • ¿Kanke itstok? Biblia kiijtoua toTeotsij itstok iluikak (1 Reyes 8:30). Ni kiijtosneki amo itstok ipan Tlaltipaktli yon sejkanok, ya itstok ipan iluikak. Ipan Biblia kiijtoua: “Se tonali iiluikaejkauaj toTeko [Jehová, TNM] * ualajkej para moixnextisej iixpa”, ni kinextia toTeotsij kipixtok kampa itstok ipan iluikak (Job 1:6).

Tlaj toTeotsij amo itstok kampa ueli, ¿nelnelia uelis techmokuitlauis?

Kena. Maske itstok iluikak kampa tlatsejtseloltik ya kitekipachoua tlen kinpano maseualmej. Kinpaleuia maseualmej katli kiita kichiuaj kampeka kineltokasej (1 Reyes 8:39; 2 Crónicas 16:9). ¿Kenijkatsa kinextia kitekipachoua tlen techpano uan techmokuitlauia?

  • Kema timomaijtouaj: Jehová nimantsi techtlakakilia kema timomaijtouaj (2 Crónicas 18:31).

  • Techyolchikaua kema timokuesouaj: “ToTeko itstok ininnechka tlakamej tlen mokuesouaj. Uan kinmakixtia tlen mokuesouaj ika inintlajtlakoljuaj” (Salmo 34:18).

  • Kema techtlajtolmakaj: Ika Biblia, Jehová techmaka tlalnamikilistli uan techiljuia tlake ojtli moneki tijtokilisej (Salmo 32:8).

Tlen sekinok kineltokaj kema moiljuiaj toTeotsij itstok kampa ueli

Tlen sekinok kineltokaj: ToTeotsij itstok ipan nochi tlen kichijchijtok.

Tlen melauak: ToTeotsij amo itstok ipan Tlaltipaktli yon ipan tlen kichijchijtok (1 Reyes 8:27). Biblia kiijtoua sitlalimej uan sekinok tlamantli kinextia “iueyitilis toTeko” (Salmo 19:1). Maske kiampa kiijtoua, nopa amo kiijtosneki toTeotsij itstok ipan tlamantli tlen ya kichijchijki, sanse kej katli kimachijchiua se tlaixkopinkayotl amo itstok ipan tlen kichijchiua. Uan ika tlen kimachijchiua kena uelis tijmatisej kenijkatsa eli nopa maseuali, yeka ika tlen toTeotsij kichijchijki nojkia uelis tikitasej tlake kuajkuali tlamantli kinextia, kej chikaualistli, tlalnamikilistli uan tlaiknelili (Romanos 1:20).

Tlen sekinok kineltokaj: Tlaj toTeotsij amo itstok kampa ueli, uajka amo kipia nochi chikaualistli uan amo ueli kimati nochi tlen pano.

Tlen melauak: ToTeotsij itonal tlauel kipia miak chikaualistli. Uan ika ichikaualis, uelis kimatis nochi tlamantli tlen pano uan kichiuas tlen ueli tlamantli maske amo itstos nopaya (Salmo 139:7).

Tlen sekinok kineltokaj: ToTeotsij itstok kampa ueli pampa Salmo 139:8 kiijtoua: “Intla nitlejkos hasta iluikak para nimotlatis, ta nopano tiitstok. Uan intla niaskia ipan nopa ueyi tlakoyoktli kampa itstokej mijkatsitsij, ta nepa tiitstok”.

Tlen melauak: Ni texto amo kiijtosneki toTeotsij itstok kampa ueli. Nika kinextia ya techpaleuis maske kampa ueli tiitstosej.

^ párr. 3 Biblia kiijtoua toTeotsij itoka Jehová.