Ir al contenido

¿Nelnelia itstok toTeotsij?

¿Nelnelia itstok toTeotsij?

Tlen Biblia kiijtoua

Biblia kiijtoua toTeotsij nelnelia itstok. Nojkia kiijtoua tlaj tijnekij timotemachisej ipan toTeotsij moneki tijtekiuisej totlalnamikilis uan amo tijneltokasej tlen sekinok religiones tlamachtiaj (1 Juan 5:20; Romanos 12:1). Ma tikitakaj se keski tlamantli tlen Biblia kiijtoua tlen kinextia nelnelia itstok toTeotsij.

  • Kema tikitaj nochi tlen onka kuali kikualtlalijtokej uan itstokej katli yoltokej, kinextia se akajya kichijchijtok. Biblia kiijtoua: “Nochi kaltinij kipiaj ajkeya kinchijchijtok, pero toTeko Dios, yajaya tlen kichijchijtok nochi tlen onka” (Hebreos 3:4). Maske ni amo ouij se kikuamachilis, katli tlauel ixtlamatij kena kineltokaj. *

  • Maseualmej kinekij kimatisej kenke tiitstokej uan tlauel motekipachouaj kema amo kimatij ni tlamantli. Ni amo san kiijtosneki tlen kinekij kimatisej, nojkia kiijtosneki kinekij kiueyichiuasej uan kiixmatisej toTeotsij, pampa “kimatij moneki momachtisej toTeotsij iTlajtol” (Mateo 5:3, TNM; Apocalipsis 4:11). Ni tlamantli kinextia katli techchijchijki tlauel techiknelia pampa kineki ma tikixmatikaj uan ma tiyolpakikaj (Mateo 4:4).

  • Miak tlajtolpanextili tlen moijkuilok ipan Biblia nelnelia moaxitik miak xiuitl teipa. Kema moaxitik nochi tlen moijtojtoya, kinextia maseualmej amo kiijtojkej nopa tlajtolpanextili (2 Pedro 1:21).

  • Katli kiijkuilojkej Biblia kuali kiixmatiyayaj se keski tlamantli tlen ixtlamatinij kimatkej teipa. Se neskayotl, maseualmej katli uejkajkia itstoyaj moiljuiyayaj Tlaltipaktli eltoya ipani se elefante, se kuapitso, se toro o ipan seyok tlapiali. Maske kiampa moiljuiyayaj, Biblia kiijtoua toTeotsij “kikuapilok san ajakatipa” ni Tlaltipaktli (Job 26:7). Uan Biblia nojkia kiijtoua Tlaltipaktli eli “tolontik” (Isaías 40:22). Miakej maseualmej kiijtouaj toTeotsij kiniljuik nopa tlakamej nochi tlen kiijkuilojkej, yeka kimatkej ni tlamantli.

  • Biblia kinankilia miak tlajtlanili tlen mochiuiliaj maseualmej katli amo kineltokaj tlaj nelnelia itstok toTeotsij, kej ni tlajtlanili: Tlaj toTeotsij kipia kuali iyolo uan kipia miak chikaualistli, ¿kenke onka tlen amo kuali uan tlaijiyouilistli? ¿Kenke religiones kichiuaj ma tlaijiyouikaj maseualmej? (Tito 1:16). Tlen Biblia kinankilia kinpaleuis ma kineltokakaj nelnelia itstok toTeotsij.

^ párr. 2 Nopa astrónomo Allan Sandage kiijtok ni kema kamanaltik tlen nochi tlamantli tlen onka: “Nikita kuali kichijchijtokej nochi uan amo ueli nijneltoka san kej ueli mochijchijki. Monejki se akajya kuali kichijchiuas. Uan maske amo nijkuamachilia kenijkatsa eli toTeotsij, kena nijneltoka ya kichijki ma tiitstokaj uan kichijchijki sekinok tlamantli”.