¿Namanok mijki se katli tikiknelia? Ni tlamachtili mitspaleuis xikixnamiki tlen mitspano.

Ipan ni tlamachtili tikitasej se keski tlamantli.

•  ¿Kenke tlauel amo kuali nijyolmati?

•  ¿Tlake nechpaleuis nikitas kej kinamiki tlen nijyolmati?

•  Tlen telpokamej uan ichpokamej kiijtouaj

 ¿Kenke tlauel amo kuali nijyolmati?

 Miakej maseualmej tlauel mokuesouaj kema miki katli kiikneliaj uan kiampa kiyolmatij miak tonali.

 “Mojmostla nikilnamiki noueyitata. Uan maske ya panotok ome xiuitl ika mijki, nojua nichoka kema nikamanalti tlen ya” (Olivia).

 “Noueyinana nochipa nechyololiniyaya ma nijchiua tlen nimosentlaliyaya, pero mijki uan ayokmo kiitak. Yeka kema nijchiua tlen nimosentlalia tlauel nimokuesoua pampa ya ayokmo itstok” (Alison).

 Se maseuali uelis kiyolmatis miak tlamantli kema miki se katli kiiknelia. Tikitasej se keski neskayotl:

 “Kema mijki no tio amo ueliyaya nijneltoka, kiampa nijmatki miak tonali. Amo kema miktoya se tlen nochampoyouaj, yeka tlauel amo kuali nijyolmatki” (Nadine).

 “Kema mijki noueyitata, nikualanki iuaya. Pampa tikiljuijtoyaj ma momokuitlaui uan ya amo kiampa kichijki” (Carlos).

 “Tlen nochi tochampoyouaj san nosiuaikni uan na amo tiitstoyaj kema mijki toueyitata. Teipa nimotlajtlakoltik. Pampa amo uelki nijnojnotsa kema ayamo mikiyaya” (Adriana).

 “Se touampo iuaya isiua kipixkej se accidente uan mijkej. Yeka kema se tlen nochampoyouaj yauiyaya kanajya, tlauel nimajmauiyaya pampa nimoiljuiyaya nojkia ueliskia kinpanos tlen amo kuali” (Jared).

 “Kipia eyi xiuitl mijki noueyinana, uan nechyolkokoua pampa amo niitstoya miak tonali iuaya” (Julianna).

 Kualanij, motlajtlakoltiaj, majmauij, moyolkokouaj uan amo kineltokaj tlen panotok... Kiampa kiyolmatij kema miki se katli tlauel kiikneliyayaj. Tlaj kiampa timomachilia, xikilnamiki, ika yolik kuali timomachilijtias. Pero ¿tlake uelis mitspaleuis ayokmo tlauel ximokuesojto?

 ¿Tlake nechpaleuis nikitas kej kinamiki tlen nijyolmati?

 Xijpouili tlen tijyolmati se mouampo. Biblia kiijtoua se kuali touampo techpaleuia “kema onka tlaouijkayotl […] keja eliskia se toikni” (Proverbios 17:17). Tlaj tijpouilia se akajya tlen tijyolmati, tlauel mitspaleuis.

 “Kema se akajya miki tlauel timokuesos. Uelis amo tijnekis tijpouilis se akajya tlen tijyolmati. Tlaj kiampa tijchiua uelis timoiljuis amo kema kuali tijyolmatis. Yeka tlauel mitspaleuis tlaj tikamanaltis iuaya se akajya” (Yvette).

 Xikilnamiki nopa maseuali. Biblia kiijtoua: “Se tlakatl katli kuali” o se maseuali katli kichiua tlen kuali “kipia tlen kuali ipan iyolo” (Lucas 6:45, Nueva Biblia al Día). Uelis tikijkuilos se keski kuali tlamantli tlen kichiuayaya nopa maseuali o uelis tijsentilis se keski tlaixkopinkayomej.

 “Nikijkuilok nochi tlen nouampo nechnextilik kema ayamo mikiyaya; kiampa nojua nikilnamikiskia. Pampa kiampa nijchijki, nechpaleuik amo tlauel ma nimokuesojto” (Jeffrey).

 Xijchiua tlen kipaleuis motlakayo. Biblia kiijtoua tlaj tijchiuaj ejercicio tlauel techpaleuis (1 Timoteo 4:8). Yeka xijchiua kampeka kuali titlakuas, tijchiuas ejercicio uan kuali tikochis.

 “Kema miki se katli tikiknelia, kemantika ayokmo tijnekis tijchiuas se keski tlamantli. Yeka, xijchiua kampeka kuali titlakuas uan kuali tikochis” (Maria).

 Xikinpaleui sekinok. Biblia kiijtoua: “Más pakilistli kiselia tlen temaka se tlenijki, uan axkeja tlen kiselia” (Hechos 20:35).

 “Xikinpaleui sekinok maseualmej katli nojkia mijki se katli kiikneliyayaj. Nopa kichiuas xikilnamiki sekinok nojkia tlaijiyouijtokej” (Carlos).

 Xijpouili toTeotsij tlen tijyolmati. Biblia kiijtoua Jehová techtlakakilia “kema timomaijtouaj” (Salmo 65:2). Nojkia kiijtoua “kinyolchikaua tlen kipiaj yolkuesoli uan kinpajtia kampa mokokojtokej” (Salmo 147:3).

 “Xikiljui Jehová ma mitspaleui kuali tijyolmatis. Maske kemantika nojua timokuesos ya nochipa mitspaleuis” (Jeanette).

 Amo ximoiljui nima kuali tijyolmatis. Xikilnamiki amo nochi sanse kiyolmatij kema miki se katli kiikneliaj. Biblia kiijtoua kema Jacob moiljuik miktoya ikone “axuelki moyoltlalia” kema sekinok kinekiyayaj kiyolchikauasej (Génesis 37:35). Yeka amo kenijki tlaj amo nima kuali tijyolmatis.

 “Maske ya panotok 15 xiuitl kema mijki noueyinana, miak tlamantli kichiua nojua ma nikilnamiki” (Taylor).

 Ximoiljui timoikxipostejki. Tlauel mitskokoua uan moneki panos tonali para timochikauas, yeka tepajtijketl mitsiljuia kenijkatsa timomokuitlauis uan kenijkatsa uelis tijpaleuis motlakayo nima ma mochikaua.

 Nojkia kiampa pano kema miki katli tikikneliaj eli kej kema “timoikxipostekij”. Moneki panos miak tonali uan kiampa ika yolik kuali tijyolmatisej. Yeka xijpia moyolo. Xikita tlake uelis mitspaleuis tlen ni tlamachtili.