Rosa kiijtoua: “Ipa nijpixtok se kokolistli tlen kichiua nochipa tlauel ma nitlakayokuajkualo. Kej panotia tonali, ayokmo kuali niitstok”. Ya tlauel kitekipachouayaya se tlamantli: kema momachtiyaya, amo ueliyaya kuali moyoliljuia ipan Biblia yon ipan sekinok tlamachtili. Ya tlauel kiyolchikajki tlen kiijtok Jesús ipan Mateo 19:26: “ToTeko [...] nochi ueli kichiua”. Rosa kiitak ueliskia momachtis Biblia uan amatlajkuiloli maske san kitlakakiliskia, * pampa kemantika amo ueli tlapoua pampa tlauel tlakayokuajkualo. Ya kiijtoua: “Tlaj amo nijchiuaskia nopa, amo tleno nechpaleuiskia kuali ma nitlaneltoka”.

Kema Rosa tlauel motekipachoua pampa ayokmo ueli kichiua tlen achtouia kichiuayaya, tlauel kiyolchikaua tlen kiijtoua 2 Corintios 8:12: “Intla se tlakatl temakas iofrenda ika iyolo, uajka toTeko kiselis nopa ofrenda keja tlen nopa tlakatl kipia, yonke miak o kentsi. Yajaya axinmechtlajtlania xitemakakaj tlen axinkipiaj”. Inoj kipaleuia ma kiilnamiki toTeotsij tlauel yolpaki, pampa kichiua nochi tlen yajati kichiuas.

Diana, katli ipa tikijtojtoyaj, kiijtoua: “Kema mijki noichpoka, katli kipixtoya 18 xiuitl, nelia tlauel nimokuesok, nimoiljuiyaya ayokmo ueliskia niitstos  uan ayokmo kema kuali niitstoskia”. Ya tlauel kiyolchikajki Salmo 94:19, kampa se toTeotsij itekipanojka uikak: “Kema san nimoyoliljuia tlen miak kuesoli uan san ya nopa nijmati, ta tinechyoltlalia. Tinechchiuilia ma nimotemachi ipan ta uan tinechmaka pakilistli”. Ya nojua kiijtoua: “Nimomaijtok uan nikiljuik Jehová ma nechpaleui nijchiuas se keski tlamantli tlen nechpaleuiskia amo tlauel ma nimokueso”.

Ya pejki kichiua se tekitl tlen tlauel kiyolpakiltiyaya. Teipa kimatki eliyaya kejuak nopa crayones tlen ika tlapaj konemej: maske postektokej, nojua tlapaj. Maske kiyolmatiyaya kejuak postektoya, nojua ueliskia kinpaleuis sekinok. Ya kiijtoua: “Maske achtouia amo nikitstoya, kema nikinmachtiyaya sekinok ika Biblia uan nikinixtomiliyaya textos tlen ika ueliskia nikinyolchikauas, nikitak Jehová na nechyolchikauayaya”. Ya kiijkuilok inintoka se keskij toTeotsij itekipanojkauaj katli nojkia tlauel mokuesojkej. ¿Tlake kiyekok? “Nochi inijuantij tlauel momaijtouayayaj”. Uan nojkia kiyekok “amo uelis timoyolchikauas tlaj amo tijpouas Biblia”.

Biblia nojkia kipaleuijtok Diana ipan seyok tlamantli: ma mosentlali ipan tlen kiselis teipa uan amo ipan tlamantli tlen panok. Tlauel kiyolchikaua tlen kiijtoua Hechos 24:15: “Nijneltoka toTeko kinyolitia [maseualmej] tlen ya miktokej, tlen kuajkualmej uan tlen axkuajkualmej”. ¿Nelia motemachia Jehová kiyolkuis iichpoka? Xikita kenijkatsa tlanankilia: “Temachtli nijmati sampa nikitas noichpoka. NoTata Jehová ya kiixtlalijtok nopa tonali kema sampa timoitasej. Ueli nimoita niitstok iuaya ipan xochimili uan nijyolmati sanse kej kema nikitak ipan nopa tonali kema tlakatki”.