“¡Nijchixtoya 19 xiuitl!”. ¿Tlake kichixtoya toikni? Nopa Traducción del Nuevo Mundo de las Escrituras Griegas Cristianas ika itlajtol Bengalí. Miakej maseualmej nojkia kiampa kiijtouaj kema kinmakaj Traducción del Nuevo Mundo ika inintlajtol. ¿Tijmati tlake achtoui moneki mochiuas uan kiampa uelis tijpiasej Biblia ika totlajtol?

 Achtoui, kintlapejpeniaj se keskij toikniuaj katli tlajtolkuepasej uan kichiuaj kej kiniljuiaj toikniuaj Katli kiitaj kenijkatsa moijkuiloua amatlajkuiloli. ¿Keski tonali moneki uan kiampa motlajtolkuepas Biblia? Toikni Nicholas Ahladis, katli tekiti Kampa kitlajtolkuepaj amatlajkuiloli ipan Warwick (Nueva York), kiijtoua: “Moneki kiitasej keskij tlajtolkuepanij tlapaleuisej ipan ni tekitl, tlaj ouij nopa tlajtoli uan tlaj katli kipouasej kimatij kenijkatsa itstoyaj o tlake kichiuayayaj uejkajkia. Nojkia tlaj nopa tlajtoli mopatla ipan sekinok pilaltepetsitsij. Katli tlajtolkuepaj kemantika uejkauaj se o eyi xiuitl kitlajtolkuepaj nopa Escrituras Griegas Cristianas, uan se naui xiuitl o pano kitlajtolkuepaj nochi Biblia. Uan ipan tlajtoli señas nojua tlauel uejkaua.

 Kema motlajtolkuepa Biblia amo san tlapaleuiaj katli kitlajtolkuepasej. Nojkia moneki kintemosej sekinok toikniuaj katli kipouasej uan kitlachilisej kenijkatsa kakisti. Kemantika kintemouaj toikniuaj katli sejkanok euaj. Tlen inijuantij kiijtouaj tlauel tlapaleuia pampa uelis nojua kuali kitlajtolkuepasej, kiampa kuali kikuamachilisej. Se toikni katli eua Sudáfrica uan kinmachtia katli kitlajtolkuepaj Biblia, kiijtoua: “Tlajtolkuepanij kimatij kipiaj se ueyi tekitl tlen tlauel ipati iixpa Jehová uan nojkia ininuaya katli kipouasej iTlajtol”.

 Kema tlamij tlajtolkuepaj moneki kititlanisej ipan imprenta, kiampa uelis kikixtisej Biblias. Uelis mochiuas ni tekitl tlaj nopa imprentas kipiaj ni matlaktli tlamantli: amatl, tinta, tlen ika moixpantsakuas, tlen ika motlatskiltis, tlen ika kipikisej ipantsajka, película de plata, cintas, cabezadas, cartón para lomo, uan seyok tlen kipaleuis ma motskito. Ipan 2019 motekiuik kipano 20 millones de dólares tlen ika mokojki ni tlamantli. Nojkia ipan nopa xiuitl toikniuaj tekitikej kipano 300,000 horas kema kichijchijkej uan kititlankej Biblias.

 Kenke tijtekiuiaj miak tonali uan tomij uan kiampa mochiua ni tekitl? “Pampa Biblia eli nopa amochtli tlen tlauel ipati tlen tijchijchiuaj”, kiijtoua Joel Blue katli tekiti Kampa kitlachiliaj kampa mochijchiua amatlajkuiloli. Nojkia kiijtoua: “Tijnekij kuali ma nesi pampa tijueyichiuaj Jehová uan nojkia tlen tijmoyauaj”.

 Nojkia tijchijchiuaj Traducción del Nuevo Mundo katli kinpaleuia katli amo uelij tlachiaj. Nopa Traducción del Nuevo Mundo ipan braille uelis tijpantis ipan 10 tlajtoli. Kema kichijchiuaj se Biblia ika braille uejkauaj 8 horas, uan tlaj nochi pilamochtsitsij tlen nopa Biblia sansejko tijtekpanaj iueueyaka eli 2,3 metros. Nojkia tijchijchiuaj Biblias tlen uelis kitekiuisej katli kintsaktokej pampa inijuantij san kinkauiliaj ma kitekiuikaj amochtli tlen ipantsajka kichijtokej ika amatl.

 Nopa Traducción del Nuevo Mundo asi ipan ininyolo katli kipouaj. Ma tikitakaj tlen panok ipan se tlanechikoli kampa kamanaltij kiluba ipan La Tombe (República Democrática del Congo). Ni pilaltepetsi iuejkaka kipano 1,700 kilómetros tlen nopa ueyi altepetl. Toikniuaj san kipixtoyaj se Biblia ika tlajtoli kiluba uan kipixtoya tlajtoli tlen ayokmo motekiuia. Kema kikualchijchiuayayaj se tlamachtili tlen kipanoltiskiaj ipan tlanechikoli, san motlanejtiyayaj nopa Biblia pampa san setsi kipixtoyaj. Ipan agosto 2018 nochi toikniuaj tlen nopa tlanechikoli kiselijkej Traducción del Nuevo Mundo ika inintlajtol kiluba, kej nama kamanaltij.

 Se tosiuaikni katli kamanalti alemán kiijtoua tlen nopa Traducción del Nuevo Mundo tlen moyankuilik: “Nama ayokmo nikijtoua: ‘¡Moneki nijpouas Biblia!’. Nama nimoiljuia: ‘¿Kema nojua uelis nijpouas Biblia?’ ”. Se tlakatl katli tsaktok kiijkuilok: “Nechmakakej nopa Traducción del Nuevo Mundo uan nechpaleuijtok ma nijpatla nonemilis. Achtouia amo nijkuamachiliyaya Biblia, uan nama kema pejki nijpoua ni traducción, nijkuamachilik. Nechpaktiskia nojua nikinixmatis Jehová itlajtoltemakauaj uan kenijkatsa uelis nielis se tlen inijuantij”.

 Katli kipouaj Traducción del Nuevo Mundo tlauel kitlaskamatij nopa tomij tlen temakaj maseualmej ika nochi ininyolo pampa kiampa ueli mochijchiua ni amochtli. Tlaj ta tijneki titemakas tomij, uelis tijchiuas kej nesi ipan donate.jw.org. Tlauel tiinmechtlaskamatiliaj pampa intemakaj tlen inkipiaj ika nochi inmoyolo.