Ir al contenido

Ir al índice

Xikita tlen kuali kichiuaj sekinok

Xikita tlen kuali kichiuaj sekinok

Tlen amo moneki tijchiuas

Tlaj timoueyimatij uelis titechikoitasej. Se akajya katli moueyimati moiljuia kuali kichiua nochi tlamantli. Moiljuia san ya tlauel ipati uan kintlatsintlajmajkaua katli amo elij kej ya. Nochi uelis kiampa tijchiuasej. Nopa Encyclopædia Britannica kiijtoua: “Miakej maseualmej katli euaj ipan se altepetl moueyimatij pampa moiljuiaj san inijuantij ajuiyak inintlakualis, kuali kej moyoyontiaj, kuali tlen momajtokej kichiuaj, kuali tlen kineltokaj uan san inijuantij kuali kichiuaj sekinok tlamantli”. ¿Tlake uelis tijchiuasej tlaj amo tijnekij timoueyimatisej?

Tlen Biblia tetlajtolmaka

“Sejse inmojuantij xikinitakaj nochi sekinok keja más uejueyi kej ta” (FILIPENSES 2:3).

¿Tlake kiijtosneki? Tlaj amo tijnekij timoueyimatisej, moneki timoechkapantlalisej. Tlaj amo timoueyimatij, tikilnamikisej sekinok uelij kichiuaj se keski tlamantli tlen tojuantij amo tiuelij. Maske kampa ueli tieuaj, amo aka tlauel pankisa.

Ma tikitakaj tlen kipanok Stefan. Ya moskaltik ipan se altepetl kampa kinchikoitayayaj katli amo eliyayaj tlen nopa altepetl, pampa inijuantij amo kipaleuiyayaj sanse partido político, teipa ayokmo kinchikoitak.  Ya kiijtoua: “Tlaj amo tijnekij titechikoitasej moneki tikilnamikisej sekinok uelij kichiuaj tlamantli tlen tojuantij amo tiuelij. Na amo niueli nijchiua nochi tlamantli uan uelis nijyekos tlen sekinok kichiuaj”.

Tlen uelis tijchiuas

Xikilnamiki ta nojkia timokuapoloua uan sekinok uelij kichiuaj tlen ta amo ueli tijchiua. Amo ximoiljui maseualmej katli euaj ipan se altepetl kichiuaj sanse tlamantli.

Amo nimantsi ximoiljui amo kuali tlamantli tlen se maseuali, achtoui ximotlajtlani ni:

Xikilnamiki sekinok uelij kichiuaj sekij tlamantli tlen ta amo tiueli tijchiua.

  • ¿Nelia amo kuali tlen kichiua nopa maseuali o na amo nimomajtok nijchiuas tlen ya kichiua?

  • ¿Kiita nopa maseuali tlamantli tlen amo kuali nijchiua?

  • ¿Tlake tlamantli kichiua nopa maseuali tlen na amo ueli nijchiua?

Tlaj kuali timoyoliljuis ipan ni tlajtlanili uan tikitas kenijkatsa tieli, mitspaleuis ayokmo xijchikoita nopa maseuali uan tijpatiitas nopa kuajkuali tlamantli tlen kichiua.