Ir al contenido

Ir al índice

¡Tlen uelis techpaleuis!

¡Tlen uelis techpaleuis!

Miakej maseualmej kichijtokej tlen Biblia tetlajtolmakaj uan nopa kinpaleuijtok ayokmo ma techikoitakaj. Tojuantij toselti amo uelis tijkauasej titechikoitasej. Uajka, ¿onka se tlamantli tlen uelis techpaleuis?

Se kuali tlanauatijkayotl

Nochi tlen panotok kinextijtok tlanauatianij amo ueltok kichiuaj maseualmej ayokmo ma techikoitakaj. Uajka, ¿nochipa itstosej katli techikoitaj?

Tlaj se tlanauatijketl kineki maseualmej ayokmo ma techikoitakaj, moneki kichiuas ni:

  1. 1. Kinpaleuis maseualmej ma kipatlakaj tlen moiljuiaj uan tlen kiyolmatij.

  2. 2. Kichiuas maseualmej ayokmo ma kinyolkoko tlen kinchiuilijkej, kiampa ayokmo tekualankaitasej.

  3. 3. Kintekimakas san katli amo techikoitaj.

  4. 4. Kichiuas ma moiknelikaj maseualmej katli kampa ueli euaj.

Biblia kiijtoua toTeotsij kitlalijtok se tlanauatijkayotl tlen uelis kichiuas nochi ni tlamantli, kiiljuiaj “toTeotsij iTlanauatijkayo” (Lucas 4:43, TNM).

Xikita tlake kichiuas nopa tlanauatijkayotl.

1. Kuali techmachtis

Katli itstosej ipan Tlaltipaktli “kipeualtisej kichiuasej tlen xitlauak” (ISAÍAS 26:9).

“Nochi kichiuasej tlen xitlauak, onkas tlaseuilistli uan nochi itstosej ika temachili para nochipa” (ISAÍAS 32:17).

¿Tlake kiijtosneki? ToTeotsij iTlanauatijkayo kinmachtis maseualmej san tlen kuali. Kema tijmatij tlake tlamantli kuali uan tlake amo o tlake eli xitlauak o tlake amo, techpaleuia kuali ma tikinitakaj sekinok. Nochi maseualmej kimatisej moneki timoiknelisej maske kampa ueli tieuaj.

2. Techyolseuis

“Uan toTeko kinuachilis nochi ininixayo. Uan ayok kema aki mikis, niyon mokuesos, niyon chokas, niyon mokokos pampa ya panotos nochi ni tlamantli tlen achtouia eltoya ipan nopa achtoui Tlaltipaktli” (APOCALIPSIS 21:4).

¿Tlake kiijtosneki? ToTeotsij iTlanauatijkayo kinpaleuis ayokmo ma moyolkokokaj katli kinchikoitakej, yeka inijuantij ayokmo kinkualankaitasej katli kinchikoitakej.

 3. Se kuali tlanauatijketl

“Axtetlajtolsenkauas san keja nesis para melauak, pero axmelauak. Uan axtetlajtolsenkauas keja tlen ueli tlajtoli tlen nemi ipan tekamak. Yajaya kintlajtolsenkauas keja xitlauak para yajuantij tlen teikneltsitsij” (ISAÍAS 11:3, 4).

¿Tlake kiijtosneki? Jesús tlanauatis ipan toTeotsij iTlanauatijkayo, tlen eltok iluikak uan kema tlanauatis ipan Tlaltipaktli kichiuas tlen xitlauak uan amo techikoitas. Uan Jesús amo san kinpatiitas katli euaj ipan se altepetl. Nojkia uelis kichiuas nochi ma moyakanakaj ika itlanauatiljuaj maske kampa ueli itstokej.

4. Sansejko tiitstosej

ToTeotsij iTlanauatijkayo kichiuas nochi maseualmej ma kipiakaj sanse inintlalnamikilis, ma moiknelikaj uan sansejko ma itstokaj (FILIPENSES 2:2).

¿Tlake kiijtosneki? Maseualmej katli kinnauatis toTeotsij iTlanauatijkayo amo san kiijtosej moikneliaj, inijuantij nelnelia moiknelisej, yeka nochi itstosej sansejko.