Ir al contenido

Ir al índice

 TLAMACHTILI TLEN IKA PEUA: ¿MITSPAKTISKIA TIJMATIS TLAKE TLAMACHTIA BIBLIA?

Titlamachtiaj ika Biblia ipan nochi Tlaltipaktli

Titlamachtiaj ika Biblia ipan nochi Tlaltipaktli

Jehová itlajtoltemakauaj kinixmatij pampa tlajtolmoyauaj. ¿Tijmatiyaya nojkia tlamachtiaj ika Biblia ipan nochi Tlaltipaktli?

Ipan 2014, kipano chikueyij millones Jehová itlajtoltemakauaj kinmachtijkej ika Biblia sejse mestli nechka 9,500,000 maseualmej ipan 240 uejueyi altepemej. * Uan tlen nopa uejueyi altepemej ipan se 140, amo itstokej miakej kej katli kinmachtijkej ika Biblia.

Pampa Jehová itlajtoltemakauaj kinekij tlamachtisej, sejse xiuitl kichiuaj nechka 1,500 millones amatlajkuiloli, kej Biblias, amochtli uan pilamochtsitsij ipan se 700 tlajtoli. Ika ni tekitl tlen amo aka kichiua, katli nojkia kineki tlajtolmoyauas uelis momachtis ika se tlajtoli tlen ya kinekis.

 TLEN MONEKI KIMATISEJ KATLI KINEKIJ MA TIKINMACHTIKAJ IKA BIBLIA.

¿Kenijkatsa titlamachtiaj?

Timomachtiaj miak tlamachtili tlen Biblia kiixtoma. Ipan Biblia kiijtoua ajkia toTeotsij, kenijkatsa ya, tlake itoka, kanke itstok uan tlaj uelis timouampojchiuasej iuaya. Katli tikinmachtiaj tikinnextiliaj ipan Biblia kanke monankilia ni uan sekinok tlamantli tlen kinekij kimatisej.

Yeka, tijtekiuiaj se amochtli tlen kipia 224 iamayouaj tlen motokaxtia ¿Tlake nelnelia tlamachtia Biblia? * Ika ni amochtli titepaleuiaj ma kikuamachilikaj tlamachtili tlen amo ouij. Kiixtoma tlamachtili tlen toTeotsij, tlen Jesús, kenke titlaijiyouiaj, kenijkatsa kinyolkuisej mijkatsitsij, kenijkatsa timomaijtosej uan miak sekinok tlamachtili.

 ¿Kanke uan kema titlamachtiaj?

Ta uelis tikijtos kanke uan kema tijneki timomachtis.

¿Tiuejkauaj kema titlamachtiaj?

Miakej kinekij ma kinmachtikaj se hora sejse semana. Tlaj amo uelis timomachtis se hora, uelis mitsmachtisej san se 10 o 15 minutos, kej sekinok kichiuaj.

¿Titlainamaj?

Amo. Kema titlamachtiaj amo titlainamaj uan tlen tijtekiuiaj amo tijnamakaj, pampa Jesús kiniljuik itokilijkauaj: “San tlapik niinmechmaka ni chikaualistli, uajka axkema xitlainamakaj” (Mat. 10:8).

¿Keski tonali nechmachtisej?

Uelis uejkauas tlen ta tijnekis. Nopa amochtli ¿Tlake nelnelia tlamachtia Biblia? kipia 19 tlamachtili. Ta uelis tikijtos kenijkatsa tijneki timomachtijtias.

¿Monekis nimochiuas se tlen Jehová itlajtoltemakauaj?

Amo. Tojuantij tijtlepanitaj tlen sekinok kineltokaj. Tlaj kimatisej tlen kiijtoua Biblia, kinpaleuis kuali kitlapejpenisej ipan tlake religión itstosej.

 ¿Kanke uelis nikasis sekinok tlamachtili?

Ipan Internet kampa jw.org/nah tikitas tlamachtili kampa nesi tlen tijneltokaj uan tlen tijchiuaj.

¿Kenijkatsa uelis nitlajtlanis ma nechmachtikaj?

^ párr. 4 Kinmachtiaj ininseltitsitsij o san se keskij sansejko.

^ párr. 9 Ni kichijtokej Jehová itlajtoltemakauaj. Mochijtok kipano 230 millones ipan kipano 260 tlajtoli.