Ir al contenido

Ir al índice

 TLAMACHTILI TLEN IKA PEUA: ¿NOJKIA TIJSELIS TLEN TOTEOTSIJ TECHMAKATOK?

Techmakatokej se tlamantli tlen nelia tlauel ipati

Techmakatokej se tlamantli tlen nelia tlauel ipati

JORDAN kimakaj se sacapuntas tlachijchiuali kej se barco. Maske nesi amo tlauel patiyo, ya tlauel kipatiita. Ya kiijtoua: “Russell, katli tlauel kuali mouikayaya ininuaya nochampoyouaj, nechmakak nopa tlamantli kema nieliyaya niokichpil”. Kema mijki, Jordan kimatki Russell nochipa itstoya iuaya iueyitata uan ininuaya itatauaj, pampa kema kipixkej miak tlaouijkayotl, ya nochipa kinpaleuik. Jordan kiijtoua: “Nama kuali nijmati ajkia elki Russell, yeka tlen nechmakak, maske amo ueyi, nojua tlauel nijpatiita”.

Tlen kipanok Jordan kinextia sekinok uelis moiljuisej amo tleno ipati se tlamantli tlen techmakatokej. Maske kiampa moiljuiaj, tojuantij kena tijpatiitaj, uan uelis amo kema tijpatiitasej seyok tlamantli kej katli techmakakej. Tojuantij nojkia techmakatokej se tlamantli tlen nelia tlauel ipati, uan amo kema techmakasej seyok kej nopa tlamantli. Biblia techiljuia: “ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa” (Juan 3:16).

¡Tlen techmakatokej uelis kichiuas ma tiitstokaj nochipa! ¿Onka seyok tlamantli tlen nelia tlauel ipati? Maske miakej amo kipatiitaj, Cristo itokilijkauaj kena tlauel tijpatiitaj (Salmo 49:8; 1 Pedro 1:18, 19). ¿Kenke toTeotsij kinmakak nochi maseualmej iKone inemilis?

Apóstol Pablo kiijtok kenke: “Tlajtlakoli pejki ipan Tlaltipaktli pampa san se tlakatl tlajtlakolchijki. Uan [...] nojkia pejki miki[li]stli. Uajka ama miki[li]stli techasi nochi titlakamej” (Romanos 5:12). Adán tlajtlakolchijki kema amo kineltokak toTeotsij uan mijki. Yeka, pampa tlajtlakolchijki, nama nochi maseualmej mikij.

“Intla se tlakatl tlajtlakolchiua, kipantia miki[li]stli keja itlaxtlauil, pero toTeko Dios techmaka se regalo kema tijneltokaj toueyiteko Jesucristo, uan nopa regalo eltok yolistli yankuik para nochipa” (Romanos 6:23). ToTeotsij kinejki kinmakixtis maseualmej, yeka kiualtitlanki iKone ma temaktiliki inemilis katli eliyaya  xitlauak. Ika imikilis, tlen nojkia kiiljuiaj ‘tlaxtlauiliʼ, nochi katli tlaneltokasej ipan Jesús uelis itstosej nochipa (Romanos 3:24).

ToTeotsij tlauel kinteochiuas katli kuali kitekipanouaj pampa Jesús temaktilik inemilis. Yeka Pablo kiijtoua: “Ma tijtlaskamatikaj toTeko Dios pampa techmakatok Cristo, nopa regalo tlen nelia ueyi” (2 Corintios 9:15). Nopa ‘tlaxtlauili’ nelia tlauel ipati, uan maske tijnekiskiaj, amo tiuelij tikijtouaj kenijkatsa tlauel yejyektsi nopa “regalo”. Maske toTeotsij kinmakatok maseualmej miak tlamantli, ¿kenke san Cristo imikilis nelia tlauel ipati? ¿Kenke amo sanse ika sekinok tlamantli tlen techmakatok? * Uan, ¿tlake moneki tijchiuasej pampa techmakatokej nopa tlamantli? Timitstlaneuij xijpoua nopa sekinok ome tlamachtili ipan ni pilamochtsi, kiampa tikitas kenijkatsa Biblia kinankilia ni eyi tlajtlanili.

^ párr. 8 Jesús “motemaktilik uan mijki topampa” (1 Juan 3:16). Maske iselti kinejki temakas inemilis, toTeotsij ipa mosentlalijtoya temakas nopa ‘tlaxtlauili’. Yeka, ipan nochi tlamachtili tlen tikitstiasej, kinextis kenijkatsa toTeotsij yaya temakak nopa ‘tlaxtlauili’.