JOSÉ, katli euayaya Arimatea, monejki kinextis amo majmauiyaya kema kinojnotsato Poncio Pilato, pampa nochi kimatiyayaj nopa tlanauatijketl romaejketl tlauel tochontik eliyaya. Monekiyaya kitlajtlanis Pilato ma kimaka Jesús itlakayo uan kiampa kitlaliskia kampa kinamikiyaya. José amo kimatiyaya tlake panoskia kema monojnotsato iuaya Pilato. Kema nopa tlanauatijketl kiiljuijkej Jesús ya miktoya, kiiljuik José ma kichiua tlen moiljuijtoya. Maske José tlauel mokuesojtoya, nimantsi yajki kampa kimiktijtoyaj Jesús (Mar. 15:42-45).

  • ¿Ajkia eliyaya José, katli euayaya Arimatea?

  • ¿Nojkia kitokiliyaya Jesús?

  • ¿Kenke moneki tijmatisej tlen kichijki?

 ITSTOYA IPAN SANEDRÍN

Ipan pilamochtsi Marcos kiijtoua José eliyaya “se tekiue ipan nopa ueyi tlasentilistli uan nochi tlakamej kitlepanitayayaj”. Nopa ueyi tlasentilistli eliyaya nopa Sanedrín, katli kinyakanayaya judíos, kintlajtolsenkauayaya, kiijtouayaya tlake tlanauatili kichiuasej uan kenijkatsa kiueyichiuasej toTeotsij (Mar. 15:1, 43). Uajka José eliyaya se katli kinyakanayaya judíos, yeka uelki monojnotsa iuaya nopa tlanauatijketl. Uan nojkia tlauel tlatominpiayaya (Mat. 27:57).

¿Amo timajmaui tikijtos tieli Jesús itokilijka?

Maske katli itstoyaj ipan Sanedrín kikualankaitayayaj Jesús uan tlanauatijkej ma kimiktikaj, “José eliyaya se kuali tlakatl uan [kipixtoya] xitlauak iyolo iixtla toTeko” (Luc. 23:50). José amo eliyaya kej inijuantij, pampa ya xitlauak monejnemiltiyaya uan kichiuayaya kampeka kineltokas toTeotsij itlanauatiljuaj. Uan “nojkia kichiayaya ma tlanauati toTeko ipan Tlaltipaktli”, uelis yeka mochijki Jesús itokilijka (Mar. 15:43; Mat. 27:57). Uelis José kipatiitayaya tlen melauak uan tlen xitlauak, yeka kipaktik tlen Jesús tlamachtiyaya.

ICHTAKATSI MOCHIJKI JESÚS ITOKILIJKA

Juan 19:38 kiijtoua José “kitokilik Jesús ichtakatsi pampa kinmakasiyaya nopa tlayakankaisraelitajmej”. ¿Kenke kinmakasiyaya? Pampa kikualankaitayayaj Jesús, uan kimatiyaya tlaj se akajya kiijtoskia tlaneltoka ipan ya kikixtiskiaj tlen sinagoga (Juan 7:45-49; 9:22). Kema se akajya kikixtiyayaj, nochi judíos kikualankaitayayaj uan ayokmo mouikayayaj iuaya. José amo kiijtok tlaneltokayaya ipan Jesús, pampa tlaj kichiuaskia, ayokmo ueliskia itstos ipan Sanedrín uan ayokmo kitlepanitaskiaj.

Amo san José kiampa kipanok. Juan 12:42 kiijtoua “sekij tlayakankaisraelitajmej nojkia kineltokakej [Jesús], pero axaka kiiljuiyayaj pampa kinmakasiyayaj nopa fariseos. Kimatiyayaj ayok kinkauiliskiaj ma kalakikaj ipan israelita teopamitl”. Nicodemo, katli nojkia itstoya ipan Sanedrín, nojkia tlaneltokak ipan Jesús (Juan 3:1-10; 7:50-52).

José kena eliyaya Jesús itokilijka, maske amo kiijtouayaya ininixpa sekinok. Amo kinamikiyaya kiampa kichiuas, pampa Jesús kiijtojtoya: “Intla se tlakatl nechneltoka uan teyolmelaua para nechneltoka, na nojkia nikiljuis noTata nepa iluikak para yajaya noaxka. Pero ajkeya teyolmelaua para axnechneltoka, uajka na nojkia nikiljuis noTata nepa iluikak para yajaya axnoaxka” (Mat. 10:32, 33). Maske José amo kiijtok amo tlaneltoka ipan Jesús, ya nojua majmajki uan amo kiijtok eliyaya itokilijka. ¿Uan tlake tijchiuaj tojuantij?

Biblia kiijtoua se kuali tlamantli tlen José kichijki: amo kinpaleuik katli itstoyaj ipan Sanedrín kema kinejkej kimiktisej Jesús (Luc. 23:51). Sekij kiijtouaj José  amo itstoya kema Jesús kitlajtolsenkajkej. Uan maske itstoskia nopaya uan kiyolkokojtoskia tlen kichiuiliskiaj, amo ueltoskia kipaleuis.

KITLAPEJPENIK TLAKE KICHIUASKIA

Kema Jesús kimiktijkej, José ayokmo majmauiyaya uan mosentlalijtoya kinextis eliyaya Jesús itokilijka. Tijmatij nopa pampa ipan Marcos 15:43 kiijtoua: “Uajka José mosemakak uan kalakito kampa Pilato uan kitlajtlanito itlakayo Jesús”.

Maske Pilato ayamo kimatiyaya, José kena kimajtoya Jesús ya miktoya pampa uelis kiitak kema kimiktijkej. Yeka kema kiiljuik Pilato ma kimaka Jesús itlakayo, Pilato achtoui kinejki kimatis “intla ya miktoya” (Mar. 15:44). Tlaj José kiitak kenijkatsa Jesús tlaijiyouik ipan nopa kuauitl, ¿kipaleuik nopa ma motlalnamikti uan ayokmo ma majmaui kiijtos eliyaya Jesús itokilijka? Uelis kena kipaleuik uan kiyololinik ma kichiua tlen kinamiki. Ayokmo ichtakatsi eliskia Jesús itokilijka.

KITLALIK JESÚS ITLAKAYO KAMPA KINAMIKIYAYA

Judíos inintlanauatil kiijtouayaya tlaj se akajya kichiuayaya se tlamantli tlen ika kinamikiyaya kimiktisej, monekiyaya kitokasej itlakayo kema ayamo kalakiyaya tonati (Deut. 21:22, 23). Uan romaeuanij momajtoyaj kikauaj inintlakayo ipan nopa kuauitl, uan kikauayayaj nopaya ma nempoliui o kinmajkauayayaj kampa sekinok mijkatsitsij kinmajkauayayaj.  José amo kinekiyaya kiampa ma kichiuilikaj Jesús itlakayo. Nechka kampa Jesús kimiktijkej, José kipixtoya se tlakoyoktli tlen amo aka kitekiuijtoya. Nopa kinextia José amo kipixtoya miak xiuitl asitoya ipan Jerusalén uan namanok kistoya tlen Arimatea, * uan uelis ipan nopa tlakoyoktli kintlaliskia ichampoyouaj inintlakayo (Luc. 23:53; Juan 19:41). José kinextik kuali iyolo pampa kinejki kitlalis Jesús itlakayo kampa yaya kitokaskiaj, uan nojkia kichijki ma moaxiti nopa tlajtolpanextili kampa kiijtouayaya Mesías itlakayo “kitlalijkej ipan itekakaua se tlakatl tlen rico” (Is. 53:5, 8, 9).

¿Tijpatiita seyok tlamantli uan amo tijpatiita kuali timouikas iuaya Jehová?

Pilamochtsitsij Mateo, Marcos, Lucas uan Juan kiijtoua kema kitemouijkej Jesús itlakayo, José kipijki ika se kuali yoyomitl tlen itoka lino uan kitlalik ipan nopa tlakoyoktli (Mat. 27:59-61; Mar. 15:46, 47; Luc. 23:53, 55; Juan 19:38-40). Nojkia kiijtoua san Nicodemo kipaleuik José, kiuikak tlaajuiyajkayotl tlen kitlalilijkej ipan Jesús itlakayo. Nopa omej tlakamej kipixtoyaj se kuali tekitl, yeka uelis se keskij itekipanojkauaj kinpaleuijkej kitlananasej uan kitlalisej Jesús itlakayo ipan tlakoyoktli. Tlauel ipati tlen inijuantij kichijkej, pampa kema se akajya kiitskiyaya se mijkatsi, chikome tonali kejuak sokiyo itstoya uan nochi tlen kiitskiyaya nojkia kejuak kisokiuiyaya (Núm. 19:11; Hag. 2:13). Tlaj kiampa itstoyaj, amo monechkauijkej kema maseualmej kichijkej nopa iljuitl Pascua (Núm. 9:6). Maske José kimatiyaya sekinok ueliskiaj kikualankaitasej pampa kitlalik Jesús itlakayo ipan tlakoyoktli, ya mosentlalijtoya kiijiyouis tlen panoskia uan kinextis eliyaya se Jesús itokilijka.

¿TLAKE PANOK TEIPA?

Biblia ayokmo kiijtoua tlake panok ika José, san kiijtoua kema kitlalik Jesús itlakayo ipan tlakoyoktli, yeka sekij uelis motlajtlaniaj: “¿Tlake kichijki teipa?”. Maske amo tijmatij, tlen tikitstokej ipan ni tlamachtili kinextia teipa kinextik kena eliyaya Jesús itokilijka. Kema panok miak tlaouijkayotl, kinextik kuali tlaneltokayaya uan ayokmo majmauiyaya. Tlauel kuali tlen kichijki.

Tlen José kipanok techpaleuia ma tikitakaj tlaj tlauel tijpatiitaj toteki, tlen tijpiaj, tochampoyouaj o tlen tojuantij tijnekij tijchiuasej, uan amo tijpatiitaj kuali timouikasej iuaya Jehová uan tielisej Jesucristo itokilijkauaj.

^ párr. 18 Uelis nopa altepetl Arimatea elki tlen achtouia kitokaxtiyayaj Ramá, tlen nama kitokaxtiaj Rentis (Rantis), uan mokaua se 35 kilómetros ika noroeste tlen Jerusalén. Nopaya euayaya tlajtolpanextijketl Samuel (1 Sam. 1:19, 20).