Ir al contenido

Ir al índice

 TLAMACHTILI TLEN IKA PEUA: KINEXTIJKEJ TLEN ONKA IPAN ILUIKAKTLI

¿Ajkia inijuantij itstokej ipan iluikaktli?

¿Ajkia inijuantij itstokej ipan iluikaktli?

¿Ipa timotlajtlanijtok ajkia inijuantij itstokej ipan iluikaktli uan kenijkatsa eli? Miakej nojkia kinekij kimatisej. Ipan miak xiuitl tlen panotok, maseualmej moiljuijtokej miak tlamantli. Sekij moiljuiaj nopaya itstokej katli uejkajkia itstoyaj uan moneki tikinueyichiuasej. Sekinok moiljuiaj ipan iluikaktli onka miak tlaseuilistli uan pakilistli, kampa itstokej iluikaeuanij uan maseualmej katli ya mijkej tlen kipixkej kuali ininyolo. Uan sekinok nojkia moiljuiaj nopaya itstokej miakej teotsitsij.

Miakej maseualmej kiijtouaj amo uelis tijmatisej ajkia inijuantij itstokej ipan iluikaktli pampa amo aka yajtok o ualajtok techiljuia tlake onka nopaya. Tlen kiijtouaj ni maseualmej amo nelia. Kema ayamo ualayaya ipan Tlaltipaktli, Jesucristo itstoya ne iluikak, kampa amo ueliyaya tikitaj. Se tonali kiniljuik katli tlayakanayayaj ipan religión judía: “Axniualtemok tlen iluikak para nijchiuas nopakilis. Niualtemok para nijchiuas tlen noTata kineki pampa ya nechtitlanki”. Uajka Jesús amo kinistlakauik itokilijkauaj kema kiniljuik: “Nepa iluikak kampa ichaj noTata onka miak kaltinij para ipan initstosej” (Juan 6:38; 14:2).

Jesús itata yaya toTeotsij uan motokaxtia Jehová, uan “ichaj” eltok ne iluikak (Sal. 83:18). Yeka, san Jehová uan Jesús uelis kiijtosej kenijkatsa itstokej ne iluikak. Inijuantij kinnextilijkej uan kiniljuijkej itekipanojkauaj miak tlamantli tlen iluikak. Maske itekipanojkauaj amo kochtoyaj, kinnextilijkej miak tlamantli kejuak ipan se temiktli.

Ipan nopa seyok tlamachtili moixtomas se keski textos kampa kiijtoua tlen se keskij tlakamej kiitakej kejuak ipan se temiktli. Kema moixtontias, moneki tikilnamikisej nochi tlen kiitakej kejuak ipan se temiktli amo eliyaya tlamantli tlen tojuantij ueliskia tikitskisej o tikitasej. Kema toTeotsij kinnextilik nopa tlamantli, amo kichijki ma kiitakaj tlen amo kikuamachiliskiaj, pampa nopa tlamantli san kikuamachiliaj katli nopaya itstokej. Yeka, miakpa kinnextilik tlen onka ika tlamantli tlen inijuantij kena kikuamachiliskiaj. Uajka, nochi tlen kiitakej techpaleuis ma tijkuamachilikaj ajkia inijuantij itstokej ipan nopa “miak kaltinij” tlen onka ipan iluikaktli.