¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:

¿Kenke tetajmej katli san asitokej ipan se altepetl moneki kiitasej tlake tlajtoli kikuamachiliaj ininkoneuaj tlaj kinekij kinpaleuisej kuali ma tlaneltokakaj?

Uelis konemej kiyekosej nopa tlajtoli tlen kamanaltij kampa momachtiaj o kampa itstokej. Tlaj amo san se tlajtoli kikuamachiliaj, tlauel kinpaleuis. Tetajmej moneki kitlapejpenisej ipan tlake tlanechikoli moneki yasej, tlaj kampa kamanaltij inintlajtol o kampa kitekiuiaj nopa tlajtoli tlen nopa altepetl kampa asitokej. Moneki kiitasej ipan tlake tlajtoli ininkoneuaj kikuamachilisej tlen Biblia tlamachtia uan kiampa kuali tlaneltokasej. Tetajmej achtoui kichiuasej tlen kinpaleuis ininkoneuaj kuali ma tlaneltokakaj (w17.05, iamayo 9-11).

Jesús kitlajtlanik Pedro: “¿Tinechiknelia más keja ne sekij?”. ¿Ajkia o tlake eliyayaj nopa “sekij”? (Juan 21:15)

Jesús kamanaltitoya tlen nopa michimej katli kinitskijtoyaj nopaya uan nojkia nopa tekitl tlen kipixtoya Pedro kej michtlajtlamajketl. Kema mijki Jesús, Pedro sampa kichijki iteki. Cristo itokilijkauaj moneki kiitasej tlaj tlauel kipatiitaj ininteki (w17.05, iamayo 22, 23).

¿Tlake kichijki Elias Hutter pampa kinejki kinpaleuis katli kinmachtiyaya ma kiyekokaj hebreo?

Ya kinekiyaya kinpaleuis amo ouij ma kiixmatikaj nopa tlajkuiloli tlen mopatla ipan hebreo. Yeka se keski tlajtoli yajyayauik kiijkuilok uan sekinok amo. Nopa tlajtoli tlen nejmaxtik kiijkuilok ika yayauik letras, uan nopa sekinok tlajkuiloli (prefijos uan sufijos) tlen ika motskiyaya, kiijkuilok ika letras tlen amo yayauik. Nopa Traducción del Nuevo Mundo de las Santas Escrituras (con referencias) kichiua sanse tlamantli ika nopa notas tlen kipia (wp17.2, iamayo 11, 12).

¿Tlake kipaleuis se Cristo itokilijka ma kimati tlaj kinamiki kipias se pistola, se rifle o seyok tlamantli tlen ika momanauis?

Jehová tlauel kipatiita maseualmej ininnemilis. Kema Jesús kiniljuik itokilijkauaj ma kipiakaj se espada, amo kinekiyaya kiniljuis ika nopa momanauiskiaj (Luc. 22:36, 38). ToTeotsij itekipanojkauaj ‘kitejtejtsonaj inintepos tlen ika tlateuiyayaj’ uan kichijchiuaj tepostli tlen ika tekitisej. Tlauel kipatiitaj nemilistli uan amo tlamantli tlen kipiaj. Kitlepanitaj tlen sekinok moiljuiaj uan kichiuaj kampeka kuali monejnemiltisej (2 Cor. 4:2) (w17.07, iamayo 31, 32).

¿Kenke Mateo uan Lucas amo kiijkuilojkej sanse tlamantli tlen Jesús kema eliyaya okichpil?

Mateo mosentlalik kiijkuilos tlen kipanok José. Ya kiijkuilok tlake kichijki José kema kimatki María tlanemiltiyaya uan kema iluikaejketl Gabriel kiiljuik ma yakaj Egipto uan teipa ma tlakuepilikaj. Uan Lucas mosentlalik kiijkuilos tlen kipanok María. Ya kiijkuilok tlake panok kema María kipaxaloto Elisabet uan tlake kichijki kema Jesús mokajki ipan teokali (w17.08, iamayo 32).

¿Tlake tlamantli ueltoskia kichiuas amo ma tijpiakaj Biblia?

Kej panotiajki tonali, nopa tlajtoli tlen motekiuik ipan Biblia ayokmo kiijtosnekiyaya sanse kej kema moijkuilok. Tekichiuanij kipatlakej tlajtoli tlen motekiuiyaya. Uan miakej amo kinekiyayaj ma motlajtolkuepa (w17.09, iamayo 19-21).

¿Tlake tlaiknelili tlen tlauel ipati moneki tijnextisej?

Nopa tlaiknelili tlen moyakana ika tlen Biblia tlanauatia. Kitokaxtiaj agápe uan ni tlaiknelili nelia tlauel ipati. Maske tijnextiaj kema kuali timouikaj iuaya se akajya, tlauel tijnextiaj ika tlen tijchiuaj kema tikinpaleuiaj sekinok, uan tijchiuaj ika nochi toyolo uan amo pampa tijnekij tijselisej se tlenijki (w17.10, iamayo 7).