Kej nopa kiijtok se siuapil katli kipixtoya 13 xiuitl kema kimakakej se pilchichitsij. Uan se siuatl kiijtoua kipatlak inemilis kema itata kimakak se computadora kema eliyaya pilichpokatsi. Uan se tlakatl katli namanok mosiuajtik kiijtoua nopa tarjeta tlen isiua kiijkuiljuilik kema kiaxitijkej se xiuitl ika mosenkajtoyaj san ya nopa tlauel kuali tlen kimakatokej ipan nochi inemilis.

Sejse xiuitl, miakej maseualmej tlauel kichiuaj kampeka kitemosej se “kuali” tlamantli tlen kimakasej se ininuampo o se tlen ininchampoyouaj ipan nopa tonali tlen inijuantij kipatiitaj. Uan miakej kinekij ma kiyolmatikaj kej katli tikijtojkej ipan achtoui párrafo kema kinmakasej se tlenijki. ¿Tijnekiskia kiampa ma kiyolmati katli tijmakas se tlamantli o ta tijyolmatis nopa kema mitsmakasej se tlenijki?

Uelis nochi tijnekiskiaj nopa, pampa tijmatij tlauel kuali kiyolmatis katli kiselis nopa tlamantli, uan nojkia katli temakas kuali kiyolmatis. Biblia kiijtoua: “Más pakilistli kiselia tlen temaka se tlenijki, uan axkeja tlen kiselia” (Hechos 20:35). Uan nojua tlauel yolpaki katli temaka kema kiita katli kiselik nopa tlamantli tlauel kitlaskamatilia.

¿Tlake uelis tijchiuasej tlaj tijnekij titemakasej se tlenijki tlen kichiuas ma tiyolpakikaj tojuantij uan nojkia katli tikinmakasej? Uan tlaj amo tiuelij titemakaj se “kuali” tlamantli, ¿tlake uelis tijchiuasej tlaj tijnekij ma kipatiitakaj tlen titemakaj?