¿KENIJKATSA tetlajtolsenkauasej? Sekij moiljuiaj panotiasej sejsentsitsij iixpa toTeotsij kampa kintlajtolsenkauas, uan moiljuiaj sekij kiselisej tlen kuali kema itstosej ne iluikak, uan sekij kintlatsakuiltisej uan nochipa kintlaijiyouiltijtosej. Biblia amo kiijtoua kej nopa kintlajtolsenkauasej, pampa ipan nopa Tonali amo aka majmauis uan san motemachisej ipan toTeotsij.

Ipan Apocalipsis o Revelación 20:11 uan 12, apóstol Juan kiijtok: “Nikitak se ueyi silla tlen chipauak uan toTeko moseuiyaya nepa. Uan iixtla ya polijki Tlaltipaktli uan nochi tlen eltoya ipan iluikaktli uan ayok mopantik ipan niyon se lugar. Uan nikinitak nochi mijkatsitsij tlen uejueyij uan pilsiltsitsij moketstoyaj iixtla nopa ueyi silla. Uan kintlapok nochi amatlapouali. Uan kitlapok seyok amatlapouali tlen [...] kipixki inintoka tlakamej tlen itstosej para nochipa. Uan toTeko kintlajtolsenkajki nochi nopa mijkatsitsij ika tlen ijkuilijtok ipan nopa sekinok amatlapouali pampa kipixkej nochi tlen kichijtoyaj”.

Maske Jehová yaya tetlajtolsenkaua, ipan Hechos 17:31 apóstol Pablo kiijtok Jehová “kitlalijtok se tonal kintlajtolsenkauas nochi tlakamej keja xitlauak ika se tlakatl”. Ya  kitlapejpenik Jesús ma tetlajtolsenkaua (Juan 5:22). ¿Kema peuas tetlajtolsenkauas, uan keski tonali uejkauas?

Ipan Apocalipsis kiijtoua kema tlamis Armagedón, peuas tetlajtolsenkauasej, uan uajka kitlamiltisej nochi tlen Satanás kinnauatia (Apocalipsis 16:14, 16; 19:19–20:3). a Satanás iuaya amo kuali iajakauaj kintsakuasej mil xiuitl, uan ipan nopa xiuitl, nopa 144,000 tetlajtolsenkauasej uan ‘tlanauatisej iuaya Cristo’ (Apocalipsis 14:1-3; 20:1-4; Romanos 8:17). Uajka, kema tetlajtolsenkauasej, amo uejkauas san se tonali uan se youali, uejkauas mil xiuitl.

Ipan mil xiuitl Jesús “kintlajtolsenkauas nochi tlakamej tlen yoltokej uan tlen miktokej” (2 Timoteo 4:1). “Tlen yoltokej”, kiijtosneki nopa “miak tlakamej [o maseualmej]” katli amo mikisej ipan Armagedón (Apocalipsis 7:9-17). Juan nojkia kinitak “mijkatsitsij [...] moketstoyaj iixtla nopa ueyi silla” kampa tetlajtolsenkauaj. Uan Jesús kiijtok katli ‘miktokej uan tlen kintlalpachojtokej, kikakisej uan pankisasej’ kema moyolkuisej (Juan 5:28, 29; Hechos 24:15). Uan, ¿ika tlake kintlajtolsenkauasej nochi maseualmej?

Apóstol Juan nojkia kiitak ‘motlapok amatlapouali’, uan “toTeko kintlajtolsenkajki nochi nopa mijkatsitsij ika [...] nochi tlen kichijtoyaj” (Apocalipsis 20:12). Uajka, ¿ijkuilijtok tlen kichijkej achtouia? Amo. ToTeotsij amo kintlajtolsenkauas ika tlen kichijkej kema ayamo mikiyayaj. Pampa Biblia kiijtoua “kema se maseuali miki momakixtia tlen itlajtlakoljuaj” (Romanos 6:7, TNM). Tlen kichijkej achtouia poliuis, uan san kintlajtolsenkauasej ika tlen sampa kichiuasej. Uajka, nopa amatlapouali kiijtosneki yankuik tlanauatili tlen toTeotsij temakas. Katli moyolkuisej uan katli momanauisej ipan Armagedón, nochipa itstosej  tlaj kineltokasej toTeotsij itlanauatiljuaj uan tlen kinnauatis ipan nopa mil xiuitl. Uajka, nochi kintlajtolsenkauasej ika tlen kichiuasej ipan nopa Tonali o ipan nopa mil xiuitl.

Kema tetlajtolsenkauasej, monekis tlauel miakej ma tlamachtikaj pampa miakej kipeualtisej momachtisej toTeotsij iTlajtol, kineltokasej uan “kipeualtisej kichiuasej tlen xitlauak” (Isaías 26:9). Maske panos ni, amo nochi tlaneltokasej. Ipan Isaías 26:10 kiijtoua: “Yonke tikinnextilia teiknelijkayotl nopa tlakamej tlen fiero ininyolis, axmoxitlauaj. Kisenuikiliaj kichiuaj tlamantli tlen axkuali ipan nopa tlali kampa sekinok kichiuaj tlen xitlauak. Uan axkichiuilisej cuenta moueyitilis, toTeko”. Ni maseualmej kintsontlamiltisej kema kintlajtolsenkauasej (Isaías 65:20).

Kema tlamis tetlajtolsenkauasej, katli momanauisej nelia kuali itstosej pampa ayokmo elisej tlajtlakolejkej (1 Corintios 15:24-28). Teipa, sampa kinyejyekosej kema kimajkauasej Satanás uan kitemolis tekajkayauas (Apocalipsis 20:3, 7-10). Katli amo kichiuasej tlen Diablo kineki, kiitasej ni: “Tlen itstokej xitlauakej iixpa toTeko moaxkatisej nopa tlali tlen yajaya kinmakas, uan nepa itstosej para nochipa” (Salmo 37:29). Uajka, katli temachmej kiselisej tlen kuali ipan nopa Tonali kema tetlajtolsenkauasej.