Uelis sekij moiljuiaj tlaj Biblia kitlajtolkuepaskiaj sejse tlajtoli kej nopa biblias interlineales, eliskia más kuali para katli kipouas pampa kikuamachiliskia sanse kej ijkuilijtok ika hebreo, arameo uan griego. Pero amo nochipa kiampa eli. Ma tikitakaj se keski tlamantli.

• Amo onka yon se tlajtoli tlen nelnelia eli sanse kej kamanaltij uan kej kitejtekpanaj tlajtoli. Nopa maestro katli tlamachtia hebreo Samuel Driver kiijtoua nopa tlajtoli “amo san mopatla kej kamanaltij, nojkia [...] mopatla kej kitejtekpanaj tlajtoli kema kinekij kiijtosej se tlenijki”. Nochi katli kamanaltij se tlajtoli, mopatla kej moiljuiaj. Yeka nopa maestro Drive nojua kiijtoua: “Kej kitejtekpanaj tlajtoli kema kamanaltij, mopatla”.

• Yon se tlajtoli tlen nama kamanaltij eli sanse kej katli kamanaltiyayaj tlajtoli hebreo, arameo uan griego kema moijkuilok Biblia. Tlaj motlajtolkuepaskia sejse tlajtoli tekuapoloskia uan uelis mokuamachiliskia seyok tlamantli.

• Tlen kiijtosneki se tlajtoli o tlen tijnekij tikijtosej uelis mopatlas ika tlen achtoui ijkuilijtok o tlen ijkuilijtok teipa.

Onka se keski textos kampa kena uelis motlajtolkuepas kej moijkuilok achtouia ika hebreo, arameo uan griego, pero moneki tlauel kuali moitas.

Ma tikitakaj kenke kema motlajtolkuepa sejse tlajtoli uelis mokuamachilis seyok tlamantli. 

• ITlajkuilol Dios kitekiuia nopa tlajtoli kochis uan tikochis kema se akajya nelnelia kiampa kichiua o nojkia uelis san kiixnextis kema se akajya miki (Mateo 28:​13; Hechos 7:​60). Kema ni tlajtoli nesi ipan se tlapoualistli kampa kamanalti tlen mikilistli, san uelis motlajtolkuepas kej “mikis”, kiampa katli kipouasej amo kinkuapolos (1 Corintios 7:​39; 1 Tesalonicenses 4:​13; 2 Pedro 3:4).

• Ipan Efesios 4:​14 apóstol Pablo kitekiuik se tlajtoli tlen ika griego motlajtolkuepa “tlakamej mauiltiaj ika dados”. Uejkajkia ni tlajtoli motekiuiyaya kema se akajya tlakajkayauayaya ika dados, pero tlaj ipan sekinok tlajtoli nojkia kiampa motlajtolkuepaskia, amo mokuamachiliskia. Yeka, para más nima mokuamachilis tlen achtouia kinejkej kiijtosej, motlajtolkuepki “katli kinkajkayauaj sekinok”.

• Ipan Romanos 12:​11 nesi se tlajtoli ika griego, uan tlaj motlajtolkuepaskia kej nopaya kiijtoua, kiijtoskia “molontok chikaualistli”. Yeka, para mokuamachilis kej achtouia, ipan ni Biblia motlajtolkuepki “ichikaualis Dios ma kichiua tlauel xijnekikaj inkichiuasej tlen kuali”.

• Kema Jesús Tlamachtik Ipan Se Tepetl kitekiuik se tlajtoli tlen kitlajtolkuepaj kej “tlateochiualmej katli teikneltsitsij ipan ininchikaualis” (Mateo 5:3, Biblia de Jerusalén). Ipan miak tlajtoli tlaj kiampa motlajtolkuepaskia “teikneltsitsij ipan ininchikaualis” ouij mokuamachiliskia uan ueliskia moiljuisej ipan maseualmej katli amo kuali tekiti inintsonteko o se akajya katli amo kipia fuerza o amo ueli mosentlalia kichiuas se tlamantli. Pero Jesús kinekiyaya kinmachtis maseualmej tlaj kinekiyayaj yolpakisej moneki kikauasej Dios ma kinyakana uan amo kipiasej miak tlamantli (Lucas 6:​20). Yeka, nopa biblias tlen kitlajtolkuepkej “katli kiitaj para moneki Dios ma kinpaleui” o “katli kimatij moneki Dios ma kinyakana”, eli más xitlauak ika tlen achtouia moijkuilok (Mateo 5:3, nota; La Palabra de Dios para Todos).

• Ipan miak tlapoualistli nopa tlajtoli ika griego motlajtolkuepa kej “motlaxima o tekokolia” nojkia kiijtosneki sanse ika nauatl, kej kema se akajya tlauel kualani kema kimati katli kiiknelia kikajkayajtok o kema kikokolia se akajya pampa kipia tlamantli tlen ya amo kipia (Hechos 5:​17; Romanos 13:​13). Pero nopa  tlajtoli ika griego amo san kiijtosneki tlamantli tlen amo kuali, nojkia motekiuia para moijtos tlamantli tlen kuali, kej kema Jesús uan sekinok itekipanojkauaj Dios kinejkej tlaueyichiuasej kej kinamiki, yeka motekiuik nopa tlajtoli kej tlauel “kiiknelijkej o kitlasojtlakej” (Juan 2:​17; 2 Corintios 9:2).

• Ipan miak tlapoualistli nopa tlajtoli ika griego tlen motlajtolkueptok “ixayak” ipan Mateo 17:2 kiijtosneki miak tlamantli. Kej kiijtoua ipan sejse textos, ni tlajtoli uelis motlajtolkuepas kej “nesi”, “nochi Tlaltipaktli” o “kej eli” (Mateo 16:3; Hechos 17:​26; Judas 16).

Nochi tlen tikijtojkej kinextia kema motlajtolkuepa Biblia amo motekiuia san setsi tlajtoli para motlajtolkuepas se tlajtoli tlen eltok ika hebreo, arameo uan griego. Yeka, katli kitlajtolkuepaj Biblia moneki kuali moiljuisej tlake tlajtoli kitekiuisej para mokuamachilis sanse kej moijkuilok ika hebreo, arameo uan griego. Uan para amo ouij kipouasej, tlen kitlajtolkuepaj moneki kitejtekpanasej kej kamanaltij nopa tlajtoli.

Nojkia, se texto amo uelis tlauel mopajpatlas kej motejtekpantok. Tlaj se akajya katli kitlajtolkuepa Biblia kichiua san kej ya kikuamachilia, uelis kipatlas tlen kineki kiijtos nopa tlajkuiloli tlen achtoui moijkuilok. Uelis kitlalis se keski tlamantli tlen ya moiljuia kiampa kiijtosneki tlen nopa tlajkuiloli o kikixtilis se keski tlamantli tlen tlauel ipati. Yeka, maske kitlajtolkueptokej biblias san ika se keski tlajtoli tlen inijuantij kikuamachilijkej uan amo ouij se kipouas, kema kiampa kichiuaj, katli kipouaj amo kinpaleuia ma kimatikaj nopa tlamachtili tlen kipia Biblia.

Se katli tlajtolkuepa uelis kitekiuis tlen kimachtijtokej ipan ireligión kema tlajtolkuepas. Ma tikitakaj Mateo 7:​13, kiijtoua “nopa ojtli tlen patlauak teuika kampa mikilistli”. Uelis se keskij katli tlajtolkuepaj kitekiuijtokej nopa tlajtoli infierno pampa kiampa kinmachtijtokej ipan ininreligión uan amo kitekiuijtokej nopa tlajtoli kampa tetsontlamiltiaj, tlen nelnelia kiijtosneki ika tlajtoli griego.

Katli tlajtolkuepaj moneki kiilnamikisej Biblia moijkuilok para nochi maseualmej, kej katli tekitij milaj, katli kinmokuitlauiaj pilborregojtsitsij uan katli michtlajtlamaj (Nehemías 8:​8, 12; Hechos 4:​13). Yeka, se Biblia katli kuali kitlajtolkueptokej uelis kikuamachilisej nochi maseualmej katli kipiaj kuali ininyolo. Yeka, katli tlajtolkuepaj kichiuaj kampeka kitekiuisej tlajtoli tlen nima mokuamachilia uan tlen  nochi kitekiuiaj, uan amo kitekiuiaj tlajtoli tlen amo kikuamachiliaj tlen ueli maseualmej.

Ipan miak biblias tlen namanok kichijchijtokej, katli kitlajtolkuepkej mosemakakej kiixpolosej itoka Dios, Jehová, maske ipan nopa tlajkuiloli tlen achtoui kimaijkuilojkej, kena nesiyaya. Miak biblias kipatlaj nopa tokajyotl uan san kitlaliaj toTeko. Sekij hasta amo kiijtouaj tlaj Dios kipia itoka. Ipan sekinok biblias ipan Juan 17:​26 kiijtoua Jesús kej ni kiijtok kema momaijtok: “Nikinnextilijtok ajkia tieli”. Uan ipan Juan 17:6 kiijtoua: “Katli tinechmakak ipan Tlaltipaktli nikinnextilijtok ajkia tieli”. Pero tlaj tijnekij ma motlajtolkuepa kej Jesús kiijtok, kej ni eliskia “Nikinnextilijtok motoka” uan “Nikinnextilijtok motoka maseualmej katli tinechmakak ipan Tlaltipaktli”.

Nopa Biblia Tlen Yankuik Tlaltipaktli tlen achtoui kiski ika inglés, tlen ika peua kiijtoua: “Ipan iTlajkuilol Dios amo motlajtolkueptok san ika se keski tlajtoli tlen tojuantij tijkuamachilijtokej. Desde kampa peua uan kampa tlami, tijchijtokej kampeka tijtlajtolkuepasej kej moijkuilok ika tlajtoli hebreo, arameo uan griego, kiampa tijchiuaj kema ika inglés kuali kakisti uan amo mopatla tlen nelnelia kineki kiijtos”. Yeka, nopa Comité tlen nopa Biblia Tlen Yankuik Tlaltipaktli kichijtok kampeka kitekiuis tlajtoli tlen monechkauia ika hebreo, arameo uan griego uan yeka amo tijtlajtolkuepaj tlen ueliskia kichiuas amo ma mokuamachili o ma mopatla tlen nelnelia kineki kiijtos. Pampa kiampa tijchijtokej, nama tijpiaj se Biblia tlen maseualmej amo ouij kipouaj uan uelis motemachisej tlen Dios kichijki ma moijkuilo, amo mopatlatok (1 Tesalonicenses 2:​13).