Tlen kiijkuilok Lucas 9:1-62

  • Kiniljuia nopa 12 apóstoles kenijkatsa tlajtolmoyauasej (1-6)

  • Herodes amo kimati tlake moiljuis tlen Jesús (7-9)

  • Jesús kintlamaka 5 mil tlakamej (10-17)

  • Pedro kiijtoua Jesús eli nopa Cristo (18-20)

  • Jesús kiijtoua nechka mikis (21, 22)

  • Tlen moneki kichiuas se katli kineki kitokilis Jesús (23-27)

  • Jesús kipatla kej nesi (28-36)

  • Kichikaua se telpokatl katli kipia se amo kuali ajakatl (37-43)

  • Sampa kiijtoua nechka mikis (43-45)

  • Itokilijkauaj mokualaniaj pampa kinekij kimatisej ajkia más ueyi (46-48)

  • “Katli amo inmechkualankaita, inmechpaleuia” (49, 50)

  • Amo kiseliaj Jesús ipan se pilaltepetsi tlen Samaria (51-56)

  • ¿Kenijkatsa timochiuas itokilijka Jesús? (57-62)

9  Uajka kinsentilik nopa 12 apóstoles uan kinmakak chikaualistli uan tlanauatili para kinkixtisej amo kuali ajakamej,* uan nojkia para kinchikauasej maseualmej. 2  Uan kintitlanki ma tekamanaljuikaj tlen iTlanauatijkayo Dios uan ma kinchikauakaj katli mokokouayayaj. 3  Kiniljuik: “Amo tleno xijuikakaj kema inyasej ipan ojtli, yon kuatopili, yon kuetlaxmorral kampa inmotlatejtemiliaj, yon pantsi yon tomij; nojkia amo xijuikakaj ome inmoyoyo. 4  Kema inkalakisej ipan se kali, nopaya ximokauakaj* hasta kema inkisteuasej tlen nopa altepetl. 5  Pero tlaj ipan se altepetl amo inmechseliaj, kema inkisasej ximoikxitsejtselokaj para ma tepeui tlaltejpoktli,* kiampa kiitasej kichiuaj tlen amo kuali”. 6  Uajka inijuantij kistejkej uan yajkej ipan sejse pilaltepetsi, tematiltijtinenkej nopa kuali tlamachtili uan kampa ueli kinchikauayayaj katli mokokouayayaj. 7  Herodes,* katli eliyaya gobernador ipan nopa tlali, kikajki nochi tlen panoyaya, uan amo kimatiyaya tlake moiljuis, pampa sekij kiijtouayayaj Juan moyolkuitoya; 8  sekinok kiijtouayayaj Elías sampa monextijtoya, uan sekij kiijtouayayaj moyolkuitoya se tlen nopa teokamanalouanij* katli uejkajkia itstoyaj. 9  Herodes kiijtouayaya: “Tlaj na nijkechtsontejki Juan, ¿ajkia eli ni tlakatl katli nijkaki kichiua nochi ni tlamantli?”. Yeka kitemoliyaya kenijkatsa kiitas. 10  Kema apóstoles tlakuepilijkej, kipouilijkej Jesús nochi tlen kichijtoyaj. Uajka ya kinuikak iyoka, nechka se altepetl tlen kiiljuiaj Betsaida. 11  Pero miakej maseualmej kimatkej uan kitokilijkej. Ya kuali kinselik uan pejki kinkamanaljuia tlen iTlanauatijkayo Dios, uan kinchikajki katli mokokouayayaj. 12  Kema tiotlakixki, nopa 12 apóstoles kinechkauijkej uan kiiljuijkej: “Xikiniljui ni maseualmej ma yakaj ipan pilaltepetsitsij uan kampa tlatojtokaj tlen nechka mokaua, ma kitemotij kanke mokauasej uan nojkia tlen kikuasej, pampa tlauel uejka kampa tiitstokej”. 13  Pero ya kiniljuik: “Inmojuantij xikintlamakakaj”. Inijuantij kinankilijkej: “Nikaj san tijpixtokej makuili pantsi uan ome michimej; tlaj tijneki ma tikintlamakakaj, uajka monekiskia tojuantij tijkouatij tlakualistli para nochi tikintlamakasej”. 14  Nopaya itstoyaj se 5 mil tlakamej. Pero ya kiniljuik itokilijkauaj: “Xikiniljuikaj ma moseuikaj ika grupos, se 50 maseualmej ipan sejse grupo”. 15  Uan ya nopa kichijkej: kiniljuijkej nochi ma moseuikaj. 16  Uajka ya kikuik nopa makuili pantsi uan nopa ome michimej, ajkotlachixki uan kichijki se tlamaijtoli.* Teipa kitlajkoitak nopa pantsi uan pejki kinmaka itokilijkauaj ma kinmajmakakaj maseualmej. 17  Nochi tlakuajkej uan ixuikej. Teipa kisentilijkej 12 kuachikiuitl temitok ika tlakualistli tlen mokajki. 18  Teipa, kema Jesús momaijtouayaya iselti, itokilijkauaj kinechkauijkej uan ya kintlatsintokik: “¿Ajkia kiijtouaj maseualmej nieli?”. 19  Inijuantij kinankilijkej: “Juan Katli teAtsonpoliuiltiyaya. Pero sekinok kiijtouaj tiElías. Uan sekij kiijtouaj moyolkuitok se teokamanalojketl katli uejkajkia itstoya”. 20  Ya kiniljuik: “Uan inmojuantij, ¿ajkia inkiijtouaj nieli?”. Pedro kinankilik: “Ta tieli nopa Cristo, katli Dios* kiualtitlanki”. 21  Uajka Jesús xitlauak kinnauatik amo aka ma kiiljuikaj, 22  uan nojkia kiniljuik: “Katli Eli iKone Se Maseuali* moneki kiijiyouis miak tlamantli, uan amo kiselisej katli kinyakanaj judíos, sacerdotes katli kipiaj tlanauatili yon escribas;* nojkia moneki kimiktisej uan ipan eyi tonali moyolkuis”. 23  Teipa nochi kiniljuik: “Tlaj se akajya kineki nechtokilis, ayokmo ma kichiua san tlen ya kineki, mojmostla ma kiuika nopa kuauitl tlen ika tlaijiyouis* uan nochipa ma nechtokili. 24  Pampa katli kineki kimanauis inemilis, kipolos, uan katli kipolos inemilis pampa nechneltoka, kimanauis. 25  ¿Kenijkatsa kipaleuia se akajya tlaj moaxkatis nochi tlen onka ipan Tlaltipaktli pero iselti motlaijiyouiltia o kipoloua inemilis? 26  Pampa tlaj se akajya pinaua kiijtos nechixmati uan kineltoka notlajtol, Katli Eli iKone Se Maseuali nojkia pinauas kiijtos kiixmati kema ualas ika iueyitilis, uan ika iueyitilis iTata uan ángeles tlen tlatsejtseloltikej”. 27  Pero temachtli niinmechiljuia, se keskij katli nikaj itstokej amo mikisej hasta kiitasej iTlanauatijkayo Dios”. 28  Kiampa panok. Kema panotoya se chikueyi tonali ika kiijtok ni tlajtoli, kinuikak Pedro, Juan uan Santiago, uan tlejkok ipan se tepetl para momaijtoti. 29  Kema momaijtouayaya, Jesús kipatlak kej nesiyaya ixayak uan iyoyo mochijki nelchipauak hasta petlaniyaya. 30  Uan nimantsi monextijkej omej tlakamej katli kamanaltiyayaj iuaya: eliyayaj Moisés uan Elías. 31  Kema monextijkej, petlaniyayaj, uan pejkej kiijtouaj kenijkatsa Jesús yaskia uan kenijkatsa nopa moaxitiskia ipan Jerusalén. 32  Pedro uan katli itstoyaj iuaya nojua kochuiuitixtoyaj; pero kema kuali isakej* kiitakej iueyitilis Jesús uan nopa omej tlakamej katli ijkatoyaj inakastla. 33  Uan kema ni tlakamej ya kikajteuayayaj Jesús, Pedro kiiljuik: “Tlamachtijketl, ¡kuali pampa nikaj tiitstokej! Ma tijchijchiuakaj eyi pilxajkaltsitsij: se para ta, se para Moisés uan seyok para Elías”. Amo kimatiyaya tlake kiijtouayaya. 34  Pero kema nojua kiijtouayaya ni tlamantli, motlalik se mixtli uan pejki kintsakua. Kema nopa mixtli kintsajki, momajmatijkej. 35  Uajka ipan nopa mixtli kakistik se akajya kiijtok: “Ni eli noKone, katli nijtlapejpenijtok. Xijtlakakilikaj”. 36  Kema kakistik nopa tlajtoli, Jesús mokajki iselti. Inijuantij amo tleno kiijtojkej uan ipan nopa tonali amo aka kipouilijkej yon tleno tlen kiitstoyaj. 37  Ika ualmostla,* kema ixtemokej tlen nopa tepetl, miakej maseualmej yajkej kinamikitoj. 38  Uajka se tlakatl katli itstoya kampa nopa miakej maseualmej, kitsajtsilik: “¡Tlamachtijketl, nimitstlajtlania xikitati nokone! Ya iyojtsi nokone. 39  Xikita, se amo kuali ajakatl kalaki ipan ya, uan chikauak kuatsajtsiteua. Nopa amo kuali ajakatl kichiua chikauak ma uiuipika uan ma kamaposoni. Uan kema ika ouij kikaua, nokone mokaua tlauel kokojtok. 40  Nikintlajtlanik motokilijkauaj ma kikixtikaj, pero inijuantij amo uelkej”. 41  Uajka Jesús kinankilik: “¡Ni maseualmej amo kuali ininyolo uan amo tlaneltokaj! ¿Keski tonali moneki niitstos inmouaya uan niinmechijiyouijtos? Xijualika nikaj mokone”. 42  Uan kema nopa telpokatl monechkauijtiauiyaya, nopa amo kuali ajakatl kitlauisok* tlalchi uan kichijki chikauak ma uiuipika. Pero Jesús kiajuak nopa amo kuali ajakatl, kichikajki nopa telpokatl uan kimaktilik itata. 43  Nochi tlauel mosentlachilijkej kema kiitakej iueyichikaualis Dios. Kema nochi mosentlachilijtoyaj ika nochi nopa tlamantli tlen kichiuayaya, kiniljuik itokilijkauaj: 44  “Kuali xijtlakakilikaj ni tlajtoli uan xikilnamikikaj, pampa Katli Eli iKone Se Maseuali kitemaktilisej ininmako maseualmej”. 45  Pero inijuantij amo kikuamachilijkej tlen kiijtouayaya, pampa amo kinkauilijkej ma kikuamachilikaj. Uan majmauiyayaj kitlatsintokisej tlen ni tlajtoli. 46  Uajka pejkej mokualaniaj pampa kinekiyayaj kimatisej ajkia kipiayaya más tlanauatili. 47  Jesús, katli kimatiyaya tlen moiljuiyayaj ipan ininyolo, kinotski se pilokichpiltsi, kiketski inakastla 48  uan kiniljuik: “Katli kiselia se konetl kej ni pampa nechtlepanita, nojkia nechselia; uan katli nechselia, nojkia kiselia katli nechualtitlanki. Pampa katli moechkapanoua* tlen nochi inmojuantij, ya nopa eli katli más ueyi”. 49  Kema Juan kikajki ni, kiiljuik: “Tlamachtijketl, tikitakej se akajya kinkixtiyaya amo kuali ajakamej ika motoka; pero tikiljuijkej amo kiampa ma kichiua pampa amo nemiyaya touaya”. 50  Pero Jesús kinankilik: “Amo xijtsakuilikaj, pampa katli amo inmechkualankaita, inmechpaleuia”. 51  Kema monechkauiyaya nopa tonali kema kiuikaskiaj iluikak, amo kikajki yon tleno ma kitsakuili yas Jerusalén. 52  Yeka kintitlanki se keskij itokilijkauaj ma tlayakantiakaj. Inijuantij yajkej uan kalajkej ipan se pilaltepetsi kampa itstoyaj samariaeuanij para kisenkauatij kanke mokauaskia. 53  Pero katli nopaya euayayaj amo kiselijkej, pampa ya mosentlalijtoya yas Jerusalén. 54  Kema itokilijkauaj, Santiago uan Juan, kiitakej nopa, kiiljuijkej: “ToTeko, ¿tijneki ma titlanauatikaj ma temo tlitl tlen iluikak uan nochi ma kintsontlamilti?”. 55  Pero ya kinixtlachilik uan kintlakaualtik. 56  Uajka yajkej ipan seyok pilaltepetsi. 57  Kema nejnentiauiyayaj ipan ojtli, se akajya kiiljuik: “Nias mouaya kampa ta tias”. 58  Jesús kinankilik: “Kayochimej* kipiaj kanke kochisej uan totomej kipiaj inintepasol, pero Katli Eli iKone Se Maseuali amo kipia yon kanke kitlalis itsonteko”. 59  Teipa kiiljuik seyok: “Xinechtokili”. Nopa tlakatl kiiljuik: “NoTeko, xinechkaua achtoui ma nijtlalpachoti* notata”. 60  Pero ya kinankilik: “Xijkaua katli miktokej ma kintlalpachokaj ininmijkauaj. Pero ta xia uan kampa ueli xitematilti iTlanauatijkayo Dios”. 61  Uan seyok kiiljuik: “Nimitstokilis noTeko, pero achtoui xinechkaua ma nimonauatiti* ininuaya katli itstokej nokalijtik”. 62  Jesús kinankilik: “Yon se tlakatl katli tlapoxonia uan moikankuepa* para kiitas tlen kikajtia tlaika, amo uelis kalakis ipan iTlanauatijkayo Dios”.

Tlen ijkuilijtok tlatsintla

^ O “demonios”.
^ O “xikochikaj”.
^ Kanajya kiijtouaj “tlalpopoxtli”, “tlalkuanextli”.
^ Ni eli Herodes Antipas. Xikita Herodes.
^ O “profetas”.
^ Kanajya kiijtouaj “netlatlajtili”.
^ Kanajya kiijtouaj “toTeotsij”.
^ Xikita escribas.
^ Kanajya kiijtouaj “ijitakej”.
^ Kanajya kiijtouaj “Mostlaijki”, “Kema tonilik”.
^ Kanajya kiijtouaj “kikuamajkajki”.
^ Ika griego “katli más pilsiltsi”.
^ Kanajya kiijtouaj “Zorros”.
^ Kanajya kiijtouaj “ma nijtokati”.
^ Kanajya kiijtouaj “ma nimomakauati”.
^ O “ikantlachia”.

Copyrights tlen ni amatlajkuiloli