Dios kichijki ma moijkuilo Biblia uan kiijkuilojkej ika Hebreo, Arameo uan Griego. Para uelis kinpaleuis maseualmej katli itstokej ipan “nochi altepemej” moneki motlajtolkuepas iTlajtol Dios ipan miak tlajtoli (Mateo 24:​14). Nopa 27 libros tlen kipia Biblia tlen peua desde Mateo uan tlami Apocalipsis kiiljuiaj “iTlajkuilol Dios Ika Griego” pampa kema achtoui moijkuilok, kiijkuilojkej ika tlajtoli Griego uan katli kiijkuilojkej Dios kinyakanki ipan nopa achtoui siglo kema ya ualajtoya Jesús.

Nopa Biblia Tlen Yankuik Tlaltipaktli Tlen iTlajkuilol Dios Ika Griego achtoui kichijkej ika Inglés ipan 1950. Kema motlajtolkuepki, moyakankej ika nopa tlajkuiloli ika Griego tlen tlauel motekiuiyaya tlen kichijkej Westcott uan Hort, nopaya kipia nopa tlajkuiloli ika griego tlen más uejkajkia moijkuilok. Nopa Biblia Tlen Yankuik Tlaltipaktli ika inglés kichijkej kampeka kitlajtolkuepasej kej eltok ipan nopa tlajkuiloli ika Griego. Kema motlajtolkuepki ni Biblia ika nauatl (Huasteca) moyakankej ika Biblia ika inglés tlen xiuitl 2013 uan nojkia kichijkej kampeka amo kikixtilisej o kipatlasej se tlamantli.

Itoka Dios, nesi 237 imiakpa ipan Biblia Tlen Yankuik Tlaltipaktli Tlen iTlajkuilol Dios Ika Griego. Kej mochijki, kinextia tlauel kinekij ma mouejkapantlali itoka Dios uan katli kinekij momanauisej, moneki kitsajtsilisej itoka. Ipan ni Biblia, nopa tokajyotl Jehová sampa kitlalijkej kampa achtoui nesiyaya ipan nopa tlajkuiloli tlen achtoui moijkuilok (Mateo 6:9; Romanos 10:​13).

Nopa tokajyotl, Biblia Tlen Yankuik Tlaltipaktli, mokixtijtok ipan tlen Dios kitenkajtok kichiuas: se yankuik Tlaltipaktli tlen kinpaleuis nochi maseualmej (2 Pedro 3:​13). Katli kitlajtolkuepkej ni Biblia, kiikneliaj Dios katli kichijki ma moijkuilo ni Tlajkuiloli, yeka iixpa kimatij kipiaj se ueyi tekitl pampa moneki kitlalisej itlalnamikilis uan kichiuasej kampeka amo kipatlasej tlen kiijtok. Tikiljuiaj Dios ipan tlamaijtoli, ni Biblia tlen motlajtolkuepki tlauel ma kinpaleui katli kipouasej uan kichiuaj kampeka kiixmatisej “nopa tlamachtili tlen melauak” (1 Timoteo 2:4).