¿Timoiljuia ouij tijchiuasej tlen Jehová kineki?... Miakej maseualmej kiijtouaj kena ouij. Biblia kiijtoua kena uelis tijchiuasej tlen Jehová kineki. Kej nopa kichijki se telpokatl katli motokaxtik Josías. Ya nochipa kichijki kampeka kichiuas tlen Jehová kipaktiyaya. Josías kichijki tlen kuali pampa kinpixki kuali iuampoyouaj katli kipaleuijkej kuali ma kitekipano Jehová. Ma tikitakaj tlake kichijkej Josías uan iuampoyouaj.

Amón, katli tlanauatiyaya ipan altepetl Judá eliyaya Josías itata. Amón kichiuayaya tlen tlauel amo kuali uan kinueyichiuayaya teteyomej. Kema Amón mijki, Josías pejki tlanauatia. ¿Tijmati keski xiuitl kipixtoya Josías? ¡San chikueyi xiuitl! ¿Timoiljuia nojkia kichijki tlen amo kuali kej itata?... Amo, ya amo kichijki nopa.

Sofonías teiljuiyaya ayokmo ma kinueyichiuakaj teteyomej

Kema Josías eliyaya se pilokichpiltsi kinekiyaya kichiuas tlen Jehová kipaktiyaya. Yeka nochipa kintlapejpenik iuampoyouaj katli nojkia kiikneliyayaj Jehová,  uan inijuantij kipaleuijkej ma kichiua tlen Jehová kinekiyaya. ¿Ajkia inijuantij eliyayaj Josías iuampoyouaj?

Se motokaxtik Sofonías, katli eliyaya se Jehová itlajtolpanextijka. Ya kiniljuiyaya judáeuanij ayokmo ma kinueyichiuakaj teteyomej pampa toTeotsij kintlatsakuiltiskia. Josías kineltokak tlen Sofonías kiijtok, yeka nochipa san Jehová kiueyichijki uan amo teteyomej.

Seyok Josías iuampo motokaxtik Jeremías. Inijuantij uelis kipiayayaj sanse ininxiui, uan kema moskaltijkej, nejnechka eltoya ininchaj. Jeremías uan Josías nochipa moyolchikauayayaj, pampa kinekiyayaj kineltokasej Jehová uan kichiuasej tlen ya kipaktiyaya. Inijuantij tlauel kuali mouikakej, yeka kema Josías mijki, Jeremías kiijkuilok se uikatl kampa neski kenijkatsa tlauel mokuesouayaya.

Josías uan Jeremías moyolchikauayayaj, kiampa kuali kitekipanojkej Jehová

¿Tlake techmachtia tlen kichijki Josías?... Kema Josías nojua eliyaya se pilokichpiltsi, kinejki kineltokas Jehová. Yeka mouampojchijki san ininuaya katli nojkia kiikneliyayaj toTeotsij, kiampa kipaleuiskiaj ma kichiua tlen Jehová kinekiyaya. Uan ta, ¿nojkia tijneki tijchiuas tlen Jehová kineki? Uajka moneki timouampojchiuas san ininuaya katli nojkia kiikneliaj Jehová, kiampa mitspaleuisej xijchiua tlen toTeotsij kineki.