Ir al contenido

Ir al índice

 TLAMACHTILI 47

Jehová kipaleuik Elías

Jehová kipaleuik Elías

Jezabel kimatki tlen kinpanotoya Baal itlajtolpanextijkauaj uan tlauel kualanki. Kititlanki se tlakatl ma kiiljuiti Elías: “Mostla nojkia timikis, kej kinpanok Baal itlajtolpanextijkauaj”. Elías tlauel majmajki uan cholok ipan uaktok tlali. Nopaya momaijtok uan kiiljuik toTeotsij: “Jehová, ayokmo nikijiyouis. Xinechkaua ma nimiki”. Elías tlauel siajtoya uan kochki itsintla se kuauitl.

Se iluikaejketl kiixitik Elías uan yolik kiiljuik: “Ximeua uan xitlakua”. Elías kiitak se pantsi malakachtik tlen eltoya ipan se keski tetinij totonik, uan se komitl tlen kipixtoya atl. Elías tlakuajki uan atlik, uan sampa kochki. Nopa iluikaejketl sampa kiixitik uan kiiljuik: “Xitlakua. Moneki tijpias chikaualistli pampa uejka tinejnemis”. Uajka Elías sampa tlakuajki. Teipa nejnenki 40 tonali uan 40 youali, uan asito ipan tepetl Horeb. Nopaya kalajki kampa tlakakauaya uan kochki. Uajka Jehová kiiljuik: “¿Elías, tlake tijchiua nikaj?”. Elías kinankilik: “Israeleuanij amo kichijtokej tlen kiijtojkej kichiuaskiaj. Kixolejkej tlaixpamitl kampa mitsmakayayaj tlakajkaualistli uan kinmiktijkej motlajtolpanextijkauaj. Uan nama nojkia kinekij nechmiktisej”.

Jehová kiiljuik Elías: “Xikisa uan ximoketsa ipan nopa tepetl”. Uajka chikauak tlaajakak, nojkia mojmolinik tlali uan teipa panok se tlitl. Teipa, Elías kikajki se akajya ika tlaiknelili kinojnotsayaya. Uajka moixtsajki ika iyoyo uan mokajki kampa itstoya. Jehová kitlajtlanilik kenke cholouayaya. Uan Elías kinankilik: “Ayokmo itstokej motlajtolpanextijkauaj, san na nimokajtok”. Jehová kiiljuik: “Amo tiitstok moselti. Nojua itstokej 7,000 maseualmej ipan Israel katli nechueyichiuaj. Xikitati Eliseo uan xikiljui nijtlapejpenijtok ma eli notlajtolpanextijka, uan yaya mitstekipatlas”. Elías nimantsi kichijki tlen Jehová kiiljuik. ¿Timoiljuia Jehová nojkia mitspaleuis tlaj tijneltokas? Kena. Tikitasej tlen panok kema tlaauaktoya.

“Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala. Xijtlajtlanikaj ma inmechmaka nochi tlen moneki uan xijtlaskamatikaj para nochi tlen inmechchiuilijtok” (Filipenses 4:6).