Ir al contenido

Ir al índice

 TLAMACHTILI 39

Katli achtoui tlanauatik ipan Israel

Katli achtoui tlanauatik ipan Israel

Maske Jehová kintlapejpenijtoya tetlajtolsenkauanij katli kinyakanaskiaj israeleuanij, inijuantij kinekiyayaj se tlanauatijketl. Yeka kiiljuijkej Samuel: “Sekinok altepemej kipiaj inintlanauatijka, tojuantij nojkia tijnekij se tlanauatijketl”. Samuel amo kipaktik tlen inijuantij kinekiyayaj. Yeka kiiljuik Jehová tlen kiyolmatiyaya, uan Jehová kinankilik: “Inijuantij amo ta mitsuejkamajkajtokej, na nechuejkamajkajtokej. Xikiniljui kena kipiasej se inintlanauatijka, uan nopa tlanauatijketl kintlajtlanis miak tlamantli”. Uan maseualmej kiijtojkej: “¡Amo kenijki! ¡Tojuantij tijnekij se totlanauatijka!”.

Uajka Jehová kiiljuik Samuel ya kitlapejpenijtoya Saúl ma eli nopa achtoui tlanauatijketl. Kema Saúl kipaxaloto Samuel ipan altepetl Ramá, Samuel kitekilik aceite ipan itsonteko, kiampa kinextik Jehová kitlapejpenijtoya kej tlanauatijketl.

Teipa, Samuel kinsentilik nochi israeleuanij pampa kinekiyaya ma kiixmatikaj inintlanauatijka. Uan kema kinotskej Saúl, amo kipantijkej. ¿Tijmati kenke? Pampa motlatijtoya. Kema kipantijkej, kiualikakej kampa itstoyaj israeleuanij, uan kiketskej tlajtlajko. ¡Nelia tlauel uejkapantik eliyaya uan tlauel yejyektsi! Samuel kiijtok: “Ya ni katli Jehová kitlapejpenijtok”. Kema maseualmej kiitakej nopa tlanauatijketl tlauel yolpajkej.

Kema Saúl pejki tlanauatia, kichiuayaya tlen Samuel kiiljuiyaya uan kineltokayaya Jehová. Teipa ayokmo kiampa kichijki. Se tonali kema kimakaskiaj Jehová tlakajkaualistli, Samuel kiiljuik Saúl ma kichia pampa ya amo kinamikiyaya temakas nopa tlakajkaualistli. Samuel amo nimantsi asito, yeka Saúl iselti kimakak Jehová nopa tlakajkaualistli. ¿Tlake kichijki Samuel? Kiiljuik: “Kinamikiyaya tijneltokas Jehová, uan amo tijchijki”. ¿Timoiljuia Saúl motlalnamiktik?

Seyok tonali, Saúl kinteuito amaleqeuanij. Maske Samuel kiiljuijtoya ma kinmikti nochi maseualmej, Saúl amo kimiktik tlanauatijketl Agag. Uajka Jehová kiiljuik Samuel: “Saúl nechtlauelkajtok, uan ayokmo nechneltoka”. Samuel tlauel motekipachok, uan kiiljuik Saúl: “Jehová  kitlapejpenis seyok tlanauatijketl pampa ta ayokmo tijneltoka”. Kema Samuel moikankuepki, Saúl kitilanilik iyoyo, uan kitsayanki. Uajka Samuel kiiljuik: “Kej nopa Jehová mitskixtilis motlanauatijkayo”. Nopa kiijtosnekiyaya Jehová kitlapejpeniskia seyok tlanauatijketl katli kena kiikneliskia uan kineltokaskia.

“Pampa más ipati iixpa [Jehová] para tijneltokilisej, uan ax para tijmakasej [tlakajkaualistli]” (1 Samuel 15:22).