Elcana eliyaya se israelejketl katli kinpixtoya omej isiuajuaj: Ana uan Penina. Elcana tlauel kiikneliyaya Ana. Penina kinpixtoya miakej ikoneuaj, uan Ana amo ueliyaya konepia, yeka Penina kipinajtiyaya. Sejse xiuitl, Elcana kinuikayaya ichampoyouaj ipan altepetl Silo, uan nopaya kiueyichiuayayaj Jehová ipan tabernáculo. Se tonali, kema yajkej Silo, Elcana kiitak Ana tlauel mokuesouayaya, yeka kiiljuik: “Amo xichoka, Ana. Na niitstok mouaya. Na tlauel nimitsiknelia”.

Teipa, Ana yajki iselti momaijtoto. Tlauel mochokiliyaya, uan kiiljuik Jehová ma kipaleui. Kiiljuik: “Jehová, tlaj tinechmakas se pilkonetsi, na nimitsmaktilis, uan ya nochipa mitstekipanos”.

Nopa sumo sacerdote Elí kiitak Ana mochokiliyaya uan ichtakatsi kamatiyaya, yeka moiljuik iuintitoya. Ana kiiljuik: “Amo, noteko, amo niiuintitok. Nijpia se ueyi kuesoli uan nikiljuiyaya Jehová nokuesol”. Elí kiitak mokuapolojtoya, uan yeka kiiljuik: “Jehová ma mitsmaka tlen tijtlajtlanik”. Ana achi kuali kiyolmatki uan yajki ichaj. Teipa, kipixki se pilkonetsi uan kitokaxtlalik Samuel. ¿Timoiljuia Ana tlauel yolpaktoya?

 Ana amo kiilkajki tlen kitenkauilijtoya Jehová. Yeka kema Samuel ayokmo chichiyaya, Ana kiuikak ipan tabernáculo kampa kitekipanoskia toTeotsij. Ana kiiljuik Elí: “Nikiljuik Jehová ma nechmaka ni pilkonetsi, uan nama nijualika uan nijmaktilia Jehová pampa nijneki nochipa ma kitekipano”. Sejse xiuitl Ana uan Elcana kipaxalouayayaj ininkone Samuel, uan kiuikiliyayaj se yankuik ipilyoyo mangaxkototik. Teipa, Jehová nojua kiteochijki Ana, uan kinpixki eyij ipilokichpiljuaj uan omej ipilsiuapiljuaj.

“Xijtlajtlanikaj toTeko tlen inmechpoloua uan yajaya inmechmakas. Xijtemokaj para inkiixmatisej toTeko uan inkipantisej” (Mateo 7:7).