Jesús kinpixtoya eyij iuampoyouaj katli itstoyaj ne Betania. Motokaxtiyayaj Lázaro, María uan Marta, eliyayaj iknimej. Se tonali, kema Jesús itstoya ne seyok nali tlen ueyatl Jordán, María uan Marta tlatitlankej ma kiiljuitij: “Lázaro tlauel mokokoua. Nimantsi xiuala”. Jesús amo nimantsi yajki. Kema panok ome tonali kiniljuik itokilijkauaj: “Ma tiakaj Betania. Lázaro kochtok, uan na nias nikixititi”. Nopa apóstoles kiiljuijkej: “Tlaj Lázaro kochtok, nopa kipaleuis ma mochikaua”. Uajka Jesús melauak kiniljuik: “Lázaro miktok”.

Kema Jesús asito Betania, ya panotoya naui tonali kitoktoyaj Lázaro. Miakej yajtoyaj kinyolchikauaj Marta uan María. Kema Marta kimatki Jesús asitoya, nimantsi kinamikito pampa kinekiyaya monojnotsas iuaya. Kiiljuik: “NoTeko, noikni amo miktoskia tlaj tiitstoskia nikaj”. Jesús kiiljuik: “Moikni moyolkuis. ¿Marta, tinechneltoka?”. Ya kinankilik: “Na nijmati kena moyolkuis kema nochi moyolkuisej”. Uajka Jesús kiiljuik: “Na nikinyolkui maseualmej uan nikinmaka yolistli”.

Uajka Marta kiiljuito María: “Jesús ya asiko”. María motlalojtejki uan yajki kampa Jesús itstoya, uan nopa maseualmej kitokilijkej. Kema asito kampa Jesús, motlankuaketski iixpa uan tlauel mochokilik. Uan kiiljuik: “NoTeko, tlaj nikaj tiitstoskia, noikni amo miktoskia”. Jesús kiitak María tlauel mokuesouayaya, uan nojkia pejki mochokilia. Kema nopa maseualmej kiitakej Jesús chokayaya, kiijtojkej: “Jesús nelia kiikneliyaya Lázaro”. Uan sekinok kiijtouayayaj: “¿Kenke amo kipaleuik iuampo?”. ¿Tlake kichiuaskia Jesús?

Jesús yajki kampa kitlalijtoyaj Lázaro itlakayo; kitlalijtoyaj ipan se tlakoyoktli tlen kiixtsaktoyaj ika se tetl. Jesús kiijtok: “Xikijkuinikaj ne tetl”. Marta kiiljuik: “Uelis ya mijyotia pampa ya kipia naui tonali”. Maske kiampa kiiljuik, kiijkuinijkej nopa tetl, uan Jesús momaijtok: “NoTata, nimitstlaskamatilia pampa tinechtlakakilia. Maske nijmati nochipa tinechtlakakilia, nama chikauak nimitsnojnotsa pampa nijneki ni maseualmej ma kimatikaj ta tinechualtitlanki”. Uajka chikauak kiijtok: “¡Lázaro, xikisa!”. Uajka panok tlen amo kema panotoya: Lázaro kiski,  uan nojua uijkontoya ika yoyomitl. Jesús kiijtok: “Xikixtilikaj nopa yoyomitl uan xijkauakaj ma yaui”.

Miakej katli kiitakej tlen panotoya, pejkej tlaneltokaj ipan Jesús, uan sekij kiniljuitoj fariseos tlen panotoya. Yeka fariseos kitemoliyayaj kenijkatsa kinmiktisej Lázaro uan Jesús. Se apóstol, Judas Iscariote, ichtakatsi kinitato fariseos uan kiniljuik: “¿Tlake innechmakasej tlaj niinmechmaktilis Jesús?”. Kiiljuijkej kimakaskiaj 30 plata tomij. Yeka Judas pejki kitemolia kenijkatsa kinmaktiliskia Jesús.