Ir al contenido

Ir al índice

 TLAMACHTILI 75

Diablo kiyejyekok Jesús

Diablo kiyejyekok Jesús

Kema Jesús ya moatsonpoliuiltijtoya, toTeotsij itonal kichijki ma yaui kampa uaktok tlali. Amo tlakuajki 40 tonali, yeka tlauel mayanayaya. Uajka nopa Diablo yajki kampa Jesús itstoya uan kiyejyekok. Achtoui kiiljuik: “Tlaj nelia tiikone toTeotsij uajka xijchiua ni tetl ma mokuepa pantsi”. Uan Jesús kinankilik: “Ijkuilijtok ipan toTeotsij iTlajtol: ‘Amo san pantsi moneki para itstosej tlakamej. Nojkia moneki kineltokasej nochi tlen kiijtoua Jehová’”.

Teipa nopa Diablo sampa kiyejyekok Jesús, uan kiiljuik: “Tlaj nelia tiikone toTeotsij, xiuitoni tlen itsonpak ni teokali. Pampa ijkuilijtok, toTeotsij kintitlanis iiluikaejkauaj ma mitsmanauikaj”.

Teipa Satanás kinextilik “nochi tlanauatianij ipan nochi tlaltinij ipan Tlaltipaktli uan nochi ininricojyo”, uan kiiljuik: “Nochi ni tlamantli nimitsmakas tlaj sampatsi tinechueyichiuas”. Uan Jesús kinankilik: “¡Xinechtlalkaui Satanás! Pampa ijkuilijtok, san Jehová kinamiki tijueyichiuasej”.

Uajka Satanás kitlalkauik, uan iluikaeuanij kiitatoj Jesús uan kitlamakakej. Teipa, Jesús pejki kimoyaua nopa kuali tlamachtili tlen toTeotsij iTlanauatijkayo. Jehová kinauatijtoya ma kichiuaki nopa tekitl. Maseualmej tlauel kinpaktiyaya tlen Jesús tlamachtiyaya yeka kampa ueli kitokilijtinemiyayaj.

“[Diablo] senkistok istlakatitinemi pampa keja nopa iyolo. Yajaya se istlakatiketl uan nochi istlakayotl peua ika ya” (Juan 8:44).