“Yajaya kichijki tlakatl uan siuatl.” (Mateo 19:4)

ToTeotsij Jehová * kichijki ma itstokaj sansejko nopa achtoui tlakatl uan nopa achtoui siuatl. Biblia kiijtoua kichijki nopa achtoui siuatl “uan kiuikak kampa nopa tlakatl”. Adán tlauel yolpajki, yeka kiijtok: “Ya ni san se ika na, pampa inakayo kiski nonakayotipa, uan iomiyo kiski noomiyotipa” (Génesis 2:22, 23). Jehová kineki nochipa ma yolpaktokaj katli mosenkajtokej.

Maske kema se tlakatl uan se siuatl mosenkauaj moiljuiaj nochipa kuali itstosej, moneki kimajtosej nojkia kipiasej kuesoli maske tlauel moikneliaj (1 Corintios 7:28). Ipan ni pilamochtsi tikitas kenijkatsa toTeotsij techtlajtolmaka, uan tlaj tijneltokas, tiyolpakis iuaya mosiua o moueue uan mokoneuaj (Salmo 19:8-11).

 1 XIJCHIUA TLEN JEHOVÁ MITSTEKIMAKATOK

TLEN KIIJTOUA BIBLIA: Se tlakatl kinyakana ichampoyouaj (Efesios 5:23).

Jehová kineki xijmokuitlaui mosiua ika tlaiknelili (1 Pedro 3:7). Ya kichijki mosiua kej motlapaleuijka uan toTeotsij kineki xikikneli uan xijtlepanita (Génesis 2:18). Moneki tlauel tikiknelis uan tikitas tlake kipoloua uan amo san tlen ta mitspoloua (Efesios 5:25-29).

Jehová kineki tlauel xijtlepanita moueue uan xijpaleui ma kichiua nopa tekitl tlen toTeotsij kimakatok (1 Corintios 11:3; Efesios 5:33). Xijtlepanita kema kiijtos tlake mochiuas uan xijpaleui ika nochi moyolo (Colosenses 3:18). Tlaj kej nopa tijchiuas, moueue uan Jehová tlauel mitspatiitasej (1 Pedro 3:1-6).

TLEN UELISKIA TIJCHIUAS:

  • Xijtlajtlani mosiua o moueue tlake nojua ueliskia tijchiuas. Kuali xijtlakakili uan xijchiua kampeka tijchiuas tlen mitsiljuis

  • Xijpia moyolo, pampa amo nima uelis tijchiuas tlen mosiua o moueue kipaktia

2 XIJNEXTI MITSTEKIPACHOUA TLEN KIYOLMATI MOSIUA O MOUEUE

TLEN KIIJTOUA BIBLIA: Moneki kuali tikitas tlake kipoloua mosiua o moueue (Filipenses 2:3, 4). Jehová kineki kuali ma monojnotsakaj itekipanojkauaj, yeka amo xijyolkoko mosiua o moueue (2 Timoteo 2:24). Kuali ximoiljui tlake tikiljuis, pampa Biblia kiijtoua: “Itstokej sekij [maseualmej] tlen tekokouaj ika inintlajtol keja eliskia se machete tlen tlateki. Pero inintlajtol tlalnamikinij eltok keja se pajtli” (Proverbios 12:18). Jehová mitspaleuis ika itonal titenojnotsas ika tlaiknelili (Gálatas 5:22, 23; Colosenses 4:6).

TLEN UELISKIA TIJCHIUAS:

  • Xikiljui Jehová ma mitsmaka tlalnamikilistli uan ma mitspaleui amo tikualantiuetsis kema monekis inkisenkauasej se tlenijki tlen tlauel ipati

  • Kuali ximoiljui tlake tikijtos uan kenijkatsa tikijtos

 3 XIKILNAMIKI AYOKMO TIITSTOK MOSELTI

TLEN KIIJTOUA BIBLIA: Kema inmosenkauaj inmochiuaj “keja san se in[mo]tlakayo” (Mateo 19:5). Maske kiampa kiijtoua Biblia, kemantika amo sanse inkiitasej se tlenijki. Yeka, xijchiuakaj kampeka sanse inmoiljuisej uan sanse inkiyolmatisej (Filipenses 2:2). Moneki sansejko inkitlapejpenisej tlake inkichiuasej. Biblia kiijtoua: “Amo xijtlamisenkaua tlen tijchiuas [...] hasta [tikintlajtlanisok] sekinok [...] ma mitsconsejomakakaj” (Proverbios 20:18). Xijkauakaj Biblia ma inmechyakana kema inkitlapejpenisej tlake inkichiuasej (Proverbios 8:32, 33).

TLEN UELISKIA TIJCHIUAS:

  • Amo xikiljui mosiua o moueue san tlen moneki inkichiuasej, nojkia xikiljui tlen tijyolmati

  • Kema tijnekis tijchiuas se tlamantli, achtoui xijtlajtlani mosiua o moueue kenijkatsa kiita

^ párr. 4 Biblia kiijtoua toTeotsij itoka Jehová.