Ir al contenido

Ir al índice

 TLAXELOLI 5

¿Kenijkatsa uelis kuali timouikas ininuaya mochampoyouaj?

¿Kenijkatsa uelis kuali timouikas ininuaya mochampoyouaj?

‘Xitechiuilikaj tlen kuali, ximoiknonekikaj, xitekamanaljuikaj ika yamanik uan xijpiakaj inmoyolo.’ (Colosenses 3:12)

Kema timosenkaua peua tijpia mochampoyouaj. Uan maske nojua tikiniknelia uan tikintlepanita motatauaj, moneki tlauel tijpatiitas san mosiua o moueue. Uelis sekij mochampoyouaj amo kinpaktis. Maske kiampa panos, tlen Biblia tetlajtolmaka uelis mitspaleuis xiitsto ika tlayolseuilistli ininuaya mochampoyouaj uan kuali ximouika iuaya mosiua o moueue.

 1 XIMOUIKA ININUAYA MOCHAMPOYOUAJ KEJ KINAMIKI

TLEN KIIJTOUA BIBLIA: ‘Xijtlepanita motata uan monana’ (Efesios 6:2). Maske uelis ya tiueyi, nochipa xikinpatiita uan xikintlepanita motatauaj. Nojkia moneki tikilnamiktos mosiua o moueue moneki itstos ininuaya itatauaj. Amo ximoyolkoko tlaj tikita kuali mouika ininuaya ichampoyouaj, pampa Biblia kiijtoua katli teiknelia amo tekualankaita (1 Corintios 13:4; Gálatas 5:26).

TLEN UELISKIA TIJCHIUAS:

  • Amo kema xikijto ni: “Mochampoyouaj nochipa nechtlaijiljuiaj” o “Monana amo kema kipaktia tlen nijchiua”

  • Xijchiua kampeka tijkuamachilis tlen kiyolmati mosiua o moueue

 2 XIJCHIUA TLEN TIMOSENTLALIJTOK

TLEN KIIJTOUA BIBLIA: “Se tlakatl kikauas itata uan inana para mosejkotilis iuaya isiua uan nopa omej mochiuasej san se inintlakayo” (Génesis 2:24). Maske ya timosenkajtos, uelis motatauaj moiljuisej nojua kinamiki mitsmokuitlauisej, uan uelis kinekisej inmechiljuisej kenijkatsa kinamiki initstosej.

Moneki inkiijtosej ipan tlake tlamantli kinamikiskia inmechtlajtolmakasej uan ipan tlake amo. Xikiniljuikaj ika tlaiknelili uan ika tlatlepanitakayotl (Proverbios 15:1). Tlaj amo tikualanis, amo timoueyimatis uan tijpias moyolo, mitspaleuis kuali ximouika ininuaya mochampoyouaj uan nojua ‘tikinijiyouis’ pampa tikiniknelia (Efesios 4:2).

TLEN UELISKIA TIJCHIUAS:

  • Tlaj mitstekipachoua pampa mochampoyouaj nochipa kinekij mitstlajtolmakasej, xikiljui mosiua o moueue kema amo tikualantos tlake uelis inkichiuasej

  • Xikitakaj kenijkatsa uelis inkisenkauasej ni kuesoli