Skip to content

Mue ku Viana Vantu va Puile Laza Vakua Vulombelo Vuenu ni?

Mue ku Viana Vantu va Puile Laza Vakua Vulombelo Vuenu ni?

Vose va va mbatiza ku pua Vakaleho va Yehova vunoni ka ve ku ambulula naua, cipue ku kunguluka hamo lika na vamuanaye mu lutsilielo, ka tua va vianene. Tue ku seteka ku va kuasa linga va hiluise vizango viavo via mu lutsilielo naua.

Ka tue ku va uisa ni nguetu ku tundisa muntu mu cikungulukilo oho vene nga na lingi vupi vua kama. Vunoni nga Mukaleho ua ku mbatiza a pokola vitume via Mbimbiliya ca ku hona ku liveya ni ku aluluka ku vupi vueni, tue ku tundisa ni ku mu uisa mu cikungulukilo. Mbimbiliya nguayo: “Fumisenu mukua vupi uze ha kati kenu.”—1 Kolintu 5:13.

Vatico nga yala va mu uisa mu cikungulukilo vunoni mpueyeni na vana veni kasi Vakaleho va Yehova? Kapandi keni ka ku tuamenena vusoko vueni mu via lutsilielo keku aluluka, vunoni kasi na pande ku lela vusoko. Kasi na pande ku muesa cillemo kuli mpueyeni na ku vana veni.

Vantu va ku ua mu cikungulukilo kasi va hasa ku tualelelaho ku kunguluka ku viuano vietu. Kaha nga va na zange, vakuluntu va cikungulukilo va hasa ku va kuasa na vimamuna via mu Mbimbiliya. Vutumbe vua pua ku va kuasa linga va hiluke na ku pua naua Vakaleho va Yehova. Muntu u va na uisa mu cikungulukilo nga a seza vilinga via ku pihia, kaha a muesa cizango ca ku yoya muaya masiko a Mbimbiliya, muntu uaco va ka mu tambula ku hiluka mu cikungulukilo naua.