Skip to content

Skip to table of contents

 CIMPANDE CA HELU | VATI MU HASA KU UANA VUKUASI MU KU TANDA MBIMBILIYA

Vati Mbimbiliya i Hasa ku nji Kuasa mu Muono?

Vati Mbimbiliya i Hasa ku nji Kuasa mu Muono?

Mbimbiliya ka ya puile livulu lia ngoco. Mua kala vimamuna via tunda kuli Sakatanga. (2 Timoteo 3:16) Mizimbu yaco i hasa ku tu alulula mpundu. Mbimbiliya nguayo: “Lizi lia Njambi li li na muono, lia takama.” (VaHevelu 4:12) Ya kala na ngolo ya ku alulula muono uetu mu vinjila vivali​—i hasa ku tu tuamenena tangua na tangua ntsimbu ino na ku tu kuasa ku tantekeya Njambi na vikulaheso vieni via ku lutue.​—1 Timoteo 4:8; Tiango 4:8.

Ku kuasa ku muono uenu ntsimbu ino. Mbimbiliya i hasa ku mi kuasa na mu visoti vienu mpundu. Mua kala vimamuna vi hasa ku mi kuasa ntsimbu yose

  • Ku yoya vuino na vakuenu.​—Efeso 4:31, 32; 5:22, 25, 28, 33.

  •   Mua ku liniungila ku muvila na mu visinganieka.​—Visamo 37:8; Visimo 17:22.

  • Yoyesi ya cili.​—1 Kolintu 6:9, 10.

  • Ku pangesa mua cili vimbongo.​—Visimo 10:4; 28:19; Efeso 4:28. *

Umo yala na mpuevo va liambata vuovuno, ku Asia ve ku viukilila cikuma omo lia seho ya vimamuna via mu Mbimbiliya. Ngue mu ca fua ku vose va liambata vuovuno, navo ka va hasele ku litombola vuino mu vulo mu ku simutuila mua cili. Vunoni va putukile ku niunga vize vi va kele na ku tanda mu Mbimbiliya. Kaha vika viezilemo? Yala, ua lizina Vicent, ngueni: “Viuma vi nja tandele mu Mbimbiliya via nji kuasele ku lua na vitanga na ku muesa cilemo mu vulo. Ku yoya muaya Mbimbiliya ce ku tu vuisa ndzolela mu muono.” Na mpuevo yeni, Annalou, ngueni: “Mu tua tandele malungano a mu Mbimbiliya ca tu kuasele. Vuovuno nje ku ivua ndzolela na ku viukilila mu vulo na mu matumbe a tua kala nao mu muono.”

Ku tantekeya Njambi. Mu ku vueza ku mezi eni ku tuala ha vulo, Vicent ua handekele naua ngueni: “Mu ku tanda Mbimbiliya, nje ku suena mu hiehi-hiehi na Yehova vuovuno ku hiana vintsimbu via ku nima.” Mezi a Vicent a muesa cuma ca seho ya kama—Mbimbiliya i hasa ku mi kuasa ku tantekeya vuino Njambi. Nga mu lingamo, ka mu ka vezika lika omo vimamuna vieni vunoni mu ka nongonona ngecize ci tava mu mu tantekeye a pue kavusamba kenu. Kaha mu ka mona ngecize ikeye ue ku solola mua cili viuma via ku lutue, ntsimbu ize mu ka hasa ku vuahelela omo lia “muono uze u na pu muono ua vusunga”​—uze u ka kalako miaka yose ya ya-ye. (1 Timoteo 6:19) Ka kua kele livulu ngeci mueli li hasa ku hana ovu vuana.

Nga mu putuka ku tanda Mbimbiliya na ku niunga vi ya handeka, nenu naua mu hasa ku uana evi vivezikiso​—vukuasi mu muono uenu hamo na ku tantekeya Njambi. Ngeci, omo mu tanda Mbimbiliya, mu ka singanieka ha vihula via vingi. Omo mu lingamo, vulukenu lungano lua cili lua umo kaEtiopia, mukua ngolo, ua yoyele miaka 2.000 ku nima. Ua kele na vihula via vingi ku tuala ha Mbimbiliya. Mu va mu hulile nga ua kele na ku ivuisisa vize via kele na ku tanda ni kuahi, ikeye ngueni: “Nji hasa vatindzo, ku vanga umosi a nji tuamene?” * Kaha ikeye ua tavele vukuasi vua umo mulongisi ua cili ua Mbimbiliya, ua lizina Filipu, umo ua vandongesi va Yesu va ku livanga. (Vilinga 8:30, 31, 34) Nenu vene, nga mu tonda ku lilongesa via vingi ku tuala ha Mbimbiliya, tua mi lania mu tume umo muzimbu mu internete ha www.jw.org ni ci tava mu sonekele ha imo ya vikoloyi vi li mu mukanda uno. Ci tava naua mu handeke na Vakaleho va Yehova va kala ha mu hiehi nenu ni co yenu ha Ndzivo ya Vuangana ya kala mu hiehi na ndzivo yenu. Nonenu Mbimbiliya lelo vene, kaha i tavesenu i mi tuamenene ku muono ua cili.

Nga ka muesi na vusunga ku tuala ha ku tsiliela mpundu Mbimbiliya, sukulukambu talenu video Vati tu Hasa ku Kala na Vusunga Ngecize Mbimbiliya Ya Pua ya Vusunga? Mu hasa ku i uana mu jw.org, mu ku niata ha ku Tondesesa, na ku soneka lizina liaco

^ cin. 8 Nga mu tonda ku mona vimamuna vikuavo via mu Mbimbiliya, kovelenu mu site yetu, jw.org. niatenu muintsi lia VILONGESA VIA MBIMBILIYA > VIKUMBULULO VIA MU MBIMBILIYA KU VIHULA VI VE KU LINGA.