Skip to content

Skip to table of contents

 CIMPANDE CA HELU | VATI MU HASA KU UANA VUKUASI MU KU TANDA MBIMBILIYA

Kulihi Nji Putukila?

Kulihi Nji Putukila?

Vati mu hasa ku tovalesa ku tanda Mbimbiliya na ku lilongesa via vingi? Mu hasa ku kava evi vinanga vitanu via kuasa vavengi.

Tondenu cihela ca cili. Kalenu ku cihela ca ku holoka. Tundisenu viose vi hasa ku mi tangula mu ku tanda. Kalenu kuze ku li ceke ca cili kaha ku hita luhundzi linga mu ivue vuino vi mu tanda.

Likehesenu mu visinganieka. Mbimbiliya ya tunda kuli Tatetu ua muilu, kaha nga mu tonda ku lilongesa via vingi lipuisenu ngue kanike a tonda ku mu longesa ku cisemi ceni. Nga mue ku singanieka vimo kati vikevio ku tuala ha Mbimbiliya, suvenu visinganieka viaco linga Njambi a mi longese.​—Visamo 25:4.

Vundilenu ntsimbu kanda mu tande. Mu Mbimbiliya mua kala visinganieka via Njambi, ngeci tua pande ku lomba vukuasi vueni linga tu ivuisise. Njambi ua likuminia ku hana “sipilitu santu kuli vaze ve ku mu vundila.” (Luka 11:13) Sipilitu santu i hasa ku mi kuasa ku ivuisisa visinganieka via Njambi. Nga mu lingamo, i ka mi kuasa ku sokolola mutue linga mu ivuisise “vize via ku lova via Njambi.”—1 Kolintu 2:10.

Ivuisisenu vi mu tanda. Kati mu tandele ku manusula vuasi-vuasi amo mafo. Vunoni singaniekenu vuino ha vize vi mu tanda. Lihulenu nguenu: ‘Vifua vika nja mono mu muntu u nji na tanda? Vati nji hasa ku vi pangesa mu muono uange?’

Kalenu na vutumbe. Nga mu tonda ku lilongesa via vingi mu ku tanda Mbimbiliya, hangulenumo vimo vi hasa ku mi kuasa mu muono. Mu hasa ku linga vutumbe vuenu ngeci mua: ‘Nji tonda ku lilongesa via vingi ku tuala hali Njambi mpundu.’ ‘Nji tonda ku pua muntu ua cili, yala ni mpuevo ua cili.’ Kaha hangulenu imo mitamba ya Mbimbiliya i ka mi kuasa ku puisamo vutumbe vuaco. *

Evi vinanga vitanu vi hasa ku mi kuasa ku putuka. Vunoni vati mu hasa ku tovalesa ku tanda Mbimbiliya? Cimpande ci na hatako ci ka muesa vimo vinanga.

^ cin. 8 Nga ka muesi na vusunga ha mutamba uka ua mu Mbimbiliya u ka litombola nenu, Vakaleho va Yehova va ka viukilila ku mi kuasa.