Skip to content

Skip to table of contents

 CILONGESA 1

‘Kati u Ume Mutima, Muomu Yange Njambi Yove’

‘Kati u Ume Mutima, Muomu Yange Njambi Yove’

“Kati u ivue vuoma, muomu ange nji li nove; Kati u livete cikumba, muomu yange Njambi yove; Nji ka ku kolesa; Cili, nji ka ku kuasa.”​—ISA. 41:10.

MUASO 7 Yehova Ikeye Ngolo Yetu

VI TU LILONGESAMO *

1-2. (a) Vati mezi a ku Isaya 41:10 a kaniamesele ndokazi Yoshiko? (b) Vutumbe vuka ua kele navuo Yehova ku tuala ha mezi aco?

UMO NDOKAZI ua lizina Yoshiko ua vavala cikuma, kaha tangua limo ua tambuile muzimbu ua ku pihia. Ndotolo yeni ua mu lekele ngueni na lisupu lika na vingonde via vindende via muono. Vati ua lingile? Ivene ngueni ua vulukile cinimbu ca lema cikuma Isaya 41:10. (Tandenu.) Kaha ua lekele ndotolo ngueni “ka njesi na vuoma muomu Yehova na nji kuata ku livoko.” * Mezi a ku lembezieka a kala mu cinimbu caco a kaniamesele ndokazi yetu a kulahele muli Yehova na mutima ueni uose. Cinimbu caco netu ci hasa ku tu kuasa ku tula mutima nga tu hita mu visoti via vikalu cikuma. Linga tu ivuisise cimpande caco, tu hilulenu omo lia vika Yehova ua hanene muzimbu uaco kuli Isaya.

2 Yehova ua lekele Isaya mezi aco linga a ka lembezieke vaYundeya mu ve ku va tualele ku Mbambilone ku vundzinda. Vunoni Yehova ua tondele mezi aco a lembezieke kati lika vaYundeya vunoni vangamba veni vose tunde ku ntsimbu ize, ngeci ua tumine Isaya ku a soneka. (Isaya 40:8; Loma 15:4) Lelo lino tuli na ku yoya ku “zintsimbu zia ku kaluua” nguayo Mbimbiliya, ngeci mukemuo tua tondeka cikuma mezi a ku kaniamesa a mu livulu lia Isaya.—2 Tim. 3:1.

3. (a) Vikulaheso vika tu uana ku Isaya 41:10, mukanda ua muaka ua 2019? (b) Omo lia vika tua tondeka vikulaheso viaco?

3 Mu cilongesa cino tu hilula vikulaheso 3 via Yehova via ku  Isaya 41:10, na ku mona vati vi hasa ku kaniamesa lutsilielo luetu. (1) Yehova ali netu, (2) ikeye Njambi yetu, kaha (3) a ka tu kuasa. Tua tondeka cikuma evi vikulaheso * muomu ngeci mua ndokazi Yoshiko, tue ku hita mu vieseko muntu ku muntu. Kaha tue ku pinda naua na visoti omo lia ku pihia ca viuma ha mavu. Vamo vamuanetu va li na ku va luisa ku vanguvulu va ndzili ya kama. Tu hilulenu vikulaheso viaco cimo ku cimo.

“ANGE NJI LI NOVE”

4. (a) Cikulaheso ca ku livanga cika tu simutuila? (Talenu ha litota.) (b) Mu vinjila vika Yehova ue ku tu muesa cilemo? (c) Vati mezi a Yehova eku mi vuisa ku mutima?

4 Ha katete Yehova ua tu lembezieka ngueni: “Kati u ivue vuoma, muomu ange nji li nove.” * Yehova ue ku tu muesa ngecize ali netu mu ku tu tuala mana na ku tu muesa cilemo. Talenu vati ua tu muesa cilemo ceni ku hitila mu mezi a ku Isaya 43:4 ngueni, ua “kala na seho ku meso ange” kaha “nji na ku vumbika na ku ku lema.” Na vimo viahi, cipue via muilu ni via ha mavu, vi hasa ku lingisa Yehova a likele ku lema vaze ve ku mu pangela, lukakatela lueni kuli yetu ka ci tava ku lu zima. (Isaya 54:10) Cilemo ceni na vusamba vueni kuli yetu vie ku tu simpisa mu vutuntu. A ka tu niunga ngue mua niungile kavusamba keni Avilahama. Yehova ua mu lekele ngueni: “Kati u ivue vuoma Avilama. Yange ntelo yove.”—Njen. 15:1.

Na vukuasi vua Yehova, tu hasa ku vula nkala vieseko cipue vize vie ku tu kupula ngue mankimba a mu kalunga ni ngue likuna mu musenge (Talenu vinanga 5-6) *

5-6. (a) Vati tua tantekeya ngecize Yehova a tonda ku tu kuasa mu visoti vietu muntu ku muntu? (b) Vika tu hasa ku lilongesa ku lungano lua Yoshiko?

5 Tuli na vusunga ngecize Yehova ali na cizango ca ku tu kuasa mu visoti vietu muntu ku muntu muomu ua tu kulahesa ngueni: “Omo u pulakana vimema nji ka kala nove; na ku vandonga, ka va ka ku loveka: Omo u pulakana tuhia, ko u ka uema, cipue mulengi ka u ka suama hali ove.” (Isaya 43:2) Vika a lomboloka aa mezi?

6 Yehova ka tu kulahesele ku tundisa visoti houe, vunoni ka ka tavesa “vandonga” va visoti va tu zimike ni vieseko ngeci mua  “tuhia” vi tu nongese. Ngeci ua tu kulahesa ngueni a ka kala netu, na ku tu kuasa ku “pulakana” visoti viaco. Mu njila ika? A ka tu simpisa ku liova linga tu tualelelaho ku kakatela kuli ikeye, ku tsa ku tsa, ku yoya ku yoya. (Isaya 41:13) Ndokazi Yoshiko u tu na tumbuile ngueni mezi aco a lipuisilemo hali ikeye. Muaneni ua mpuevo ngueni: “Tua komokele ku lembama ci va muesele vanana. Ku talako, u mona vene nguove Yehova ikeye ali na ku lembamesa mutima uou muntu. Vanana va tualelelaho ku handeka via Yehova na vikulaheso vieni ku vafilimelo na vakuavo vavezi na ha litangua lia ku-tsa cavo.” Vika tu lilongesa ku lungano lua ndokazi Yoshiko? Nga tu kulahela muli aa mezi a Njambi “Nji ka kala nove” netu tu ka simpa na ku kolesa mu vieseko.

“YANGE NJAMBI YOVE”

7-8. (a) Cikulaheso cika ca mu civali tu simutuila, kaha vika ca lomboloka? (b) Vika Yehova ua lekelele vaYundeya ngueni: “Kati u livete cikumba”? (c) Vati halumo mezi a ku Isaya 46:3, 4 a lembeziekele mitima ya vangamba va Njambi?

7 Talenu naua cikulaheso cikuavo ca ku Isaya: “Kati u livete cikumba, Muomu yange Njambi yove.” Vuno aa mezi a lomboloka vika? Mu lilimi li va sonekele aa mezi, lizi “ku liveta cikumba” lia lomboloka ku tala-tala ku nima omo lia liova” ni “ku tala-tala ku mikulo yose, ngue muntu na lavelela ngecize vimo via ku pihia vi mu solokela.”

8 Vika Yehova ua lekele vaYundeya vaze va ve ku tualele ku vundzinda linga kati va “livete cikumba”? Muomu ua tantekeyele ngecize ku cihela caco vantu va kevua liova. Liova lia vika? Ku ku-hua ca miaka 70 ya vundzinda vua vaYundeya, Mbambilone ve ku i luisile ku civunga ca masualale va ngolo vakua Mende na Pelesia. (Isaya 41:2-4) Omo vakua Mbambilone va vuile nguavo vitozi va na hete va vuile liova na ku seteka ku likaniamesa umo na mukuavo nguavo: “Simpenu.” Kaha va vuezeleko ku panga tumponia vakuavo, mu ku singanieka nguavo tumponia vaco va ka va niunga. (Isaya 41:5-7) Yehova co ua simpisile mitima ya vantu veni va kele mu Mbambilone ku vundzinda ngueni: “Vunoni ove, Isaleli, [ka ua lifuile na vakuenu muomu u] ngamba yange, . . . yange Njambi yove.” (Isaya 41:8-10) Talenu mezi a Yehova, ngueni: “Yange Njambi yove.” Na mezi aco, Yehova ua kulahesele vangamba veni ngecize ka va suvile, vutuhu va kele ku vundzinda kasi ua puile Njambi yavo navo kasi va puile vantu veni. Kaha ua va lekele ngueni: “nji ka mi ambata . . . Kaha nji ka [mi] hetesa.” Mua vusunga aa mezi a ku lembezieka a kaniamesele vaYundeya va kele mu vundzinda.—Tandenu Isaya 46:3, 4.

9-10. Omo lia vika ka tua pandele ku kala na liova? Hanenu cimueso.

9 Lelo lino vantu va na ku lisosomua cikumakuma omo lia ku pihia ca viuma ha mavu. Vutuhu visoti viaco netu vie ku tu kuata, vunoni ka tu tondeka tu ivue liova. Yehova ngueni: “Yange Njambi yove.” Omo lia vika aa mezi eku kaniamesa?

10 Singaniekenu ha cimueso eci: Vantu vavali Jaime na Jorge va na londo mu ndeke, kaha ndeke yaco i na putuka ku ndenga-ndenga cikuma omo lia luhundzi lua kama. Kaha ndeke i londa i sikumuka, i londa i sikumuka, ngoco lika. Kaha vevua lizi lia mukua ku endesa ndeke mu visandzi ngueni: “Lipatenu na miva ya ha vituamo. Tuli na ku hita ha cihela ca luhundzi lua kama.” Jaime na lisosomua cikuma. Kaha mukua ku endesa a vuezako ngueni: “Kati mu lisosomue. Yange ngandi nji liko.” Kaha Jaime a pika ku mutue ngueni:  “Ku lembezieka cika oco?” Vunoni a tale kuli Jorge, you kulu na mbunge yeni yahiko. Kaha a mu ihula ngueni: “Ove mukuetu nkuma ka ua lisosomuene?” Jorge a zola ngueni: “Ka nja lisosomuene muomu ou aliko, nji mu tantekeya vuino. Vatate! Mana nji ku leke viavo nji li na vusunga nguange mu u va tantekeya, liova liose li ku hua.”

11. Vika tu lilongesa ku cimueso ca vungendzi vua Jaime na Jorge?

11 Vika tu hasa ku lilongesa ku cimueso eci? Ngeci mua Jorge ka tue ku lisosomua cikuma muomu tu tantekeya vuino Tatetu ua muilu, Yehova. Tua tantekeya nguetu a ka tu tuamenena mu mahundzi a visoti vi tue ku hita mu mavu ano. (Isaya 35:4) Mu ku linga tua kulahela muli Yehova, ka tue ku lisosomua vutuhu vantu vose ha mavu vali mu liova lia kama. (Isaya 30:15) Kaha tue ku tambuluisa naua Jorge mu ku lekako vakuetu via tu lingisa ku kulahela muli Njambi. Linga navo va kale na vusunga ngecize ambe nga va hite mu visoti via kama vati, Yehova a ka va kuasa.

“NJI KA KU KOLESA; CILI, NJI KA KU KUASA”

12. (a) Cikulaheso cika ca mu citatu ci tu simutuila? (b) Lizi “livoko” lia Yehova li tu vuluisa vika?

12 Tu hilulenu ha cikulaheso ca sonekele Isaya, ngueni: “Nji ka ku kolesa; cili, nji ka ku kuasa.” Isaya ua lomboluele laza vati Yehova a ka kaniamesa vantu veni ngueni: “Tenu, Sukulu Yehova a keza ngue mukua ngolo, na livoko lieni li ka mu suanena.” (Isaya 40:10) Vintsimbu via vingi Mbimbiliya ye ku tumbula “livoko” mu ku muesa ngolo. Ngeci mukemuo mezi “livoko lieni li ka mu suanena” a muesa ngecize Yehova ua pua Muangana ua ngolo. Ua pangesele ngolo yeni ya ku hiana mu ku kuasa na ku hakuila vantu veni ku nima, kaha na lelo lino ue ku tualelelaho ku kaniamesa na ku niunga vaze va mu tsiliela.—Ndeu. 1:30, 31; Isaya 43:10.

Na cimo citua cahi ci hasa ku puliasana livoko lia Yehova, lize lie ku tu niunga (Talenu vinanga 12-16) *

13. (a) Yehova ua kulahesa ku tu kuasa cikumakuma mu ntsimbu ika? (b) Cikulaheso cika ce ku tu kaniamesa?

 13 Cikumakuma nga vitozi va tu yandesa Yehova ue ku niunga eci cikulaheso ceni: “Nji ka ku kolesa.” Ku mitamba imo ya mavu, vitozi vetu vali na ku linga cose linga va vindike cipanga cetu ca ku ambulula ni va soke lukungulukilo luetu. Vutuhu ngoco ka tue ku lisosomua cikuma na ku luisa caco. Omo lia vika? Muomu Yehova ua tu hana vusunga vue ku tu kaniamesa na ku tu simpisa. Ua tu kulahesa ngueni: “Citua na cimo cahi ca ku ku fulila ci ka vezika.” (Isaya 54:17) Mezi aco a tu vuluisa vusunga vutatu vua seho.

14. Omo lia vika ka tue ku komoka nga vitozi vetu va tu luisa?

14 Ha katete, mu ku pua vandongesi va Yesu tua lavelela ngecize vantu va ka tu zinda. (Mat. 10:22) Muomu Yesu ua polofetele ngecize vandongesi veni va ka va yandesa cikuma ku matangua a ku kotokela. (Mat. 24:9; Yoa. 15:20) Ca mu civali, vupolofeto vua Isaya vua tu mamuinine vualumo nguavuo vitozi vetu ka va ka tu luisa lika vunoni va ka pangesa vitua via ku liseza-seza mu ku tu luisa. Vitua viaco via pua ku tu onga, ku tu vangeya, na ku tu luisa na vukenia vua kama. (Mat. 5:11) Yehova ka ka vindika vitozi vetu ku tu pangela vitua ni ku tu luisa. (Efe. 6:12; Ku-So. 12:17) Vunoni ka tua pandele ku ivua vuoma. Omo lia vika?

15-16. (a) Vusunga vuka vua mu citatu tua pande ku vuluka, kaha vati Isaya 25:4, 5 ya muesa vusunga vuaco? (b) Vati Isaya 41:11, 12 ya lombolola vi ka solokela vakua ku tu luisa?

15 Tu talenu vusunga vua mu citatu ka tua pandele ku suva. Yehova ua handekele ngueni “citua na cimo cahi” ci va ka tu luisa naco “ci ka vezika” cipue kamandende. Ngeci mua civumbe ce ku tu zikiliya ku luhundzi, Yehova ue ku tu niunga ku “cinkumba ca vakua ku zuzuisa ci veta ngue luhundzi ku civumbe.” (Isaya 25:4, 5) Vitozi vetu ka va ka hasa ku tu nongesa.—Isaya 65:17.

 16 Yehova ua vueza ku mezi a ku tu kaniamesa mu ku tu lomboluela vumanusuilo vua vaze ve ku tu ‘vuila vutenu.’ (Tandenu Isaya 41:11, 12.) Ambe nga vitozi vetu va tu luisa vati, ku hua ca ndzita yaco kasi cimo lika: Vakevo va ka nonga, muomu Mbimbiliya nguayo vakua ku luisa vangamba va Njambi va ka va puisa “ngue mupulungua” na “Cuma ca ngoco.”

VATI TUE KU VUEZA KU LUKULAHELO LUETU MULI YEHOVA

Tu hasa ku kaniamesa lukulahelo luetu muli Yehova mu ku tanda Mbimbiliya ntsimbu yose (Talenu vinanga 17-18) *

17-18. (a) Vati ku tanda Mbimbiliya ce ku kaniamesa lukulahelo luetu muli Yehova? Hanenu cimueso. (b) Vati ku singanieka ha mukanda ua muaka ua 2019 ci hasa ku tu kuasa?

17 Lukulahelo luetu muli Yehova lue ku livuezelela omo tuya na ku mu tantekeya vuino. Kaha njila imo lika i tu hasa ku tantekeyelamo vuino Yehova ya pua mu ku tanda Mbimbiliya na ku singanieka ha vize vi tue ku tanda. Mu Mbimbiliya mua kala muzimbu ua vusunga ku tuala ha vati Yehova ua niungile vantu veni ku nima. Mizimbu yaco ye ku tu hana vusunga ngecize netu Yehova a tu niunga ku matangua ano.

18 Isaya ua pangesele cimueso ca litombola vuino na cifua ce ku tu niungilamo Yehova. Ua setekesele Yehova na kaniungi, kaha vangamba veni co na vampanga. Ngueni Yehova “a ka kungulula vana va vampanga mu livoko lieni, Na ku va ambata ku ntulo yeni.” (Isaya 40:11) Mu tue ku tanda ngecize Yehova ue ku tu ambata mu mavoko eni a ngolo, ka tue ku lembama mitima ni? Linga a tu kuase ku huima mitima vutuhu tue ku hita mu visoti via kama, mukuamanda ua cili na hangula Isaya 41:10 ku pua mukanda ua muaka ua 2019, ‘Kati u Ume Mutima, Muomu Yange Njambi Yove.’ Singaniekenu ha mezi aco. A ka mi kaniamesa mu visoti vi li na ku iza ku lutue.

MUASO 38 A ka mi Kolesa

^ cin. 5 Mukanda u va na hangula ku pua mukanda ua muaka ua 2019, ua tu hana vusunga 3 vua pande ku tu lingisa ku huima mutima, ambe nga viuma via ku pihia vi soloka mu mavu ni mu muono uetu mpundu. Cilongesa ca lelo ci ka hilula ha vusunga vuaco, ku tu kuasa ku tepulula ku lisosomua cetu na ku tu lingisa tu kulahele muli Yehova. Singaniekenu ha mukanda ua muaka. U patekelenu nga citava. Muomu u ka mi kuasa mu visoti vi tua lavelela ku lutue.

^ cin. 1 Talenu mu Vutala vua Kaniungi vua Julho ya 2016, lifo 18, mu Putu.

^ cin. 3 LIZI LI VA LOMBOLOLA: Cikulaheso ca pua mezi eku sika muntu kuli mukuavo ngueni a ka mu hana ni ku mu lingila via na mu sika. Vikulaheso via tu hana Yehova vie ku tu huimisa mutima muomu tuli na vusunga vua ku sula ngandza ngecize vi ka lipuisamo vutuhu tu hasa ku hita mu visoti mu muono.

^ cin. 4 LITOTA: Lizi kati u ivue vuoma va li hilukila lutatu ku Isaya 41, ha cinimbu 10, 13, na 14. Kaha vinimbu viaco via pangesa cikuma lizi “nji” (mu ku tumbula Yehova). Omo lia vika Yehova ua huiminine Isaya ku pangesa cikuma lizi “nji”? Linga a tu muese cuma ca seho ya kama: Tu hasa lika ku litundisa liova mu ku kulahela muli Yehova.

^ cin. 52 VI LI HA VIKUPULO: Vusoko vuli na ku hita mu vieseko via cihindu, mu ku ambulula, ku vipanga na ku sikola.

^ cin. 54 VI LI HA VIKUPULO: Vakaleho va na likungulula mu vusueke kaha mu na kovela vaPulisia, vunoni vamuanetu va na simpi.

^ cin. 56 VI LI HA VIKUPULO: Ku lemesa ku sua kumo mu vusoko ce ku tu kaniamesa linga tu kolese.