Skip to content

Skip to table of contents

 CILONGESA 17

“Nji na mi Tumbula Vavusamba”

“Nji na mi Tumbula Vavusamba”

“Nji na mi tumbula vavusamba; muomu viose vi nji nevu kuli Tata, nji na mi zimbuilavio.”—YOA. 15:15.

MUASO 13 Kilistu, Lungano Luetu

VI TU LILONGESAMO *

1. Vati ve ku likuata vusamba na muntu?

VINTSIMBU via vingi, cuma ca katete ci tue ku linga, mangana tu likuate vusamba na muntu u tu na tantekeya, ca pua ku uana ntsimbu ya ku kala hamo lika neni na ku simutuila. Omo mu simutuila neni mu ku lileka visinganieka vienu na viuma vi mua lihita navio mu muono, vusamba vuenu vu ka kuata. Vunoni ku likuata vusamba na Yesu kati ca casi. Vitanga vika tu hasa ku liuana navio?

2. Citanga ca katete ci tue ku liuana naco cika?

2 Citanga katete, ca pua muomu kanda tu ci limone na Yesu cito na meso. Vakua Kilistu vavengi va ku sekulu ya ku livanga navo va hitile mu cisoti caco. Vutuhu ngoco, kapostolo Petulu ua handekele ngueni: “Cipue ikeye intsa ka mua muene, i mu lema; cipue intsa ka mu mono, kasi mua mu tsiliela.” (1 Pet. 1:8) Ngeci mukemuo, citava ku likuata vusamba na Yesu vutuhu kanda tu mu mone.

3. Citanga ca mu civali ci tue ku liuana naco cika?

3 Citanga ca mu civali, ca pua muomu ka tu hasa ku handeka na Yesu. Kaha ambe mu tue ku vundila, vutuhu tue ku tumbula lizina lia Yesu, vunoni tue ku handeka na Yehova kati na Yesu. Kaha Yesu ka tondele tu pue na ku vundila kuli ikeye. Omo lia vika? Muomu ku vundila ca pua cifua ca ku lemesa, kaha Yehova ikeye lika u tua pande ku lemesa. (Mat. 4:10) Vutuhu ngoco tu hasa ku muesa ngecize tua lema Yesu.

4. Citanga ca mu citatu ci tue ku liuana naco cika, kaha vika tu simutuila mu cilongesa cino?

4 Citanga ca mu citatu ca pua muomu Yesu ua kala muilu, ka  citava ku sikama neni. Vutuhu ngoco kasi tu hasa ku tantekeya via vingi ku tuala hali Yesu, vutuhu ka tue ku kala neni. Mu cilongesa cino tu simutuila ha viuma viuana vi tu hasa ku linga mangana tu kaniamese vusamba vuetu na Yesu. Vunoni ntsimbu kanda tu lingemo, tu ci talenu vika ca puila ca seho ku likuata vusamba na Kilistu.

OMO LIA VIKA TUA TONDEKA KU LIKUATA VUSAMBA NA YESU?

5. Omo lia vika tua pande ku likuata vusamba na Yesu? (Talenu naua vikasa “ Ku pua Kavusamba ka Yesu ce ku Tuala ku ku Likuata Vusamba na Yehova” na “ Puenu na ku Mona Cipanga ca Yesu mu Njila ya Cili.”)

5 Tua pande ku pua vavusamba va Yesu, amba tu hase ku pua vavusamba va Yehova. Omo lia vika? Talenu vusunga vuvali. Ha katete, Yesu ua lekele vandongesi veni ngueni: “Tata ivene a mi lema, muomu mua nji leme ange.” (Yoa. 16:27) Ua handekele naua ngueni: “Na umo uahi eza kuli Tata, ku vanga hali ange.” (Yoa. 14:6) Ku seteka ku likuata vusamba na Yehova ca ku hona ku pua kavusamba ka Yesu, ci na pu ngue ku seteka ku kovela mu ndzivo ca ku hona ku kovelela ku mbelo. Muomu Yesu ua handekele ngueni: “Yange cikolo ca vampanga.” (Yoa. 10:7) Vusunga vua mu civali vua pua muomu Yesu ua tambuluisile mu vutantuluke vifua via Ise. Ngeci ua lekele vandongesi veni ngueni: “Ou na nji mono ange, na mono Tata.” (Yoa. 14:9) Ngeci mukemuo, njila ya seho i tu hasa ku tantekeyelamo Yehova ya pua mu ku lilongesa via muono ua Yesu. Omo tu ka tualelelaho ku lilongesa via Yesu, cilemo cetu kuli ikeye ci ka livuezelela. Kaha mu vu ka kola vusamba vuetu na Yesu, cilemo cetu kuli Yehova naco ci ka livuezelela.

6. Vusunga vukuavo vuka tua pande ku likuatela vusamba na Yesu? Lombololenu.

6 Tua pande ku likuata vusamba na Yesu, amba Yehova evue vivundilo vietu. Ku puisamo evi, ka ca lengelele lika ha ku handeka nguetu  “ku hitila mu lizina lia Yesu” ku ntsongo ya nkala civundilo, houe, kua tondeka vikuavo naua. Tua pande ku ivuisisa vati Yehova ue ku pangesa Yesu mu ku kumbulula vivundilo vietu. Yesu ua lekele vapostolo ngueni: “Kaha nkala cuma ci mu ka vundila mu lizina liange, nji ka ci linga.” (Yoa. 14:13) Vutuhu Yehova ikeye ue ku ivua na ku kumbulula vivundilo vietu, vunoni ua hana Yesu ngolo ya ku puisamo vihangula via Yehova. (Mat. 28:18) Ngeci mukemuo, mu tue ku vundila Yehova a tu ecele ku vipi vietu, ntsimbu kanda a tu ecele, Yehova ue ku tala nga tue ku niunga cimamuna ca Yesu ca ku ecela vakuetu. Ca ku muenako, Yesu ua handekele ngueni: “Nga mu ecela vantu ku vivulumuna viavo, Isuenu ua muilu a ka mi ecela enu naua. Vunoni nga ka mu ecela vantu ku vivulumuna viavo, Isuenu ua muilu naua ka ka mi ecela ku vivulumuna vienu.” (Mat. 6:14, 15) Ngeci mukemuo, ca pua ca seho ku linga ku vakuetu vize vi ve ku tu lingila kuli Yehova na Muaneni Yesu.

7. Veya ve ku uana vukuasi ku nkombelo ya Yesu?

7 Vaze lika va kala na vusamba vua cili na Yesu vakevo ve ku tambula vukuasi ku nkombelo yeni. Vati tua tantekeyamo? Yesu ua handekele ngueni, a ka “tulila vavusamba veni muono ueni.” (Yoa. 15:13) Vantu vakua lutsilielo va yoyele tele Yesu kanda eze ha mavu, noho tangua va ka lilongese via Yesu na ku mu lema. Vantu ngeci mua Avilahama, Sala, Mosesa na Lahave, va ka sanguka. Vutuhu va puile vangamba va Yehova va lutsilielo, noho va ka likuate vusamba na Yesu amba va ka suane muono ua ya-ye.—Yoa. 17:3; Vili. 24:15; VaHe. 11:8-12, 24-26, 31.

8-9. Ngue mu ya lombolola Yoano 15:4, 5, ku likuata vusamba na Yesu ce ku tu kuasa ku linga vika, kaha vika ca puila ca seho?

8 Tua kala na civezikiso ca ku pangela hamo na Yesu mu ku ambulula na ku longesa muzimbu ua cili ua Vuangana. Yesu mua kele ha mavu, ua puile mulongisi. Kaha tunde ha hilukila muilu, Yesu ua pua mutue ua cikungulukilo kaha ali na ku tualelelaho ku tuamenena cipanga ca ku ambulula na ku longesa muzimbu ua cili. Ue ku mona na ku haka seho ku kapandi ka mue ku lihakela mu ku kuasa vantu va mu tantekeye na ku tantekeya Ise. Mua vusunga, eci cipanga caco tu hasa ku ci puisamo lika na vukuasi vua Yehova na Yesu.—Tandenu Yoano 15:4, 5.

9 Lizi lia Njambi lia longesa ha toma ngecize tua pande ku lema Yesu na ku kaniamesa cilemo caco amba tu hase kuya Yehova ku mutima. Ngeci mukemuo, tu hilulenu ha viuma viuana vi tu hasa ku linga, mangana tu pue vavusamba va Yesu.

MUA KU LIKUATELA VUSAMBA NA YESU

Mu hasa ku pua kavusamba ka Yesu, (1) Mu ku mu tantekeya vuino, (2) ku tambuluisa cifua ce ku singaniekelamo na vilinga vieni, (3) mu ku kuasa vamuanaye ya Kilistu, kaha (4) mu ku ononoka ku vihangula vi lue ku linga lukungulukilo (Talenu vinanga 10-14) *

10. Cinanga ca katete cika tua pande ku puisamo mu ku likuata vusamba na Yesu?

10 (1) Lihakelenu kapandi ka ku tantekeya Yesu. Tu hasa ku lingamo, mu ku tanda mavulu a Mateo, Mako, Luka na Yoano. Omo tu hilula ha mizimbu ya mu Mbimbiliya ya handeka via muono ua Yesu, tu ka heta ha ku lema Yesu na ku mu singimika omo lia cifua ca yoyelelemo na vantu. Ca ku muenako, vutuhu ua puile ntuamena ua vandongesi veni, ka va puisile vandungo. Vunoni ua kele na ku va leka matumbe eni na visinganieka vieni. (Yoa. 15:15) Mu va kele na ku ivua vusiua, Yesu neni ua lilile navo. (Yoa. 11:32-36) Nambe vitozi veni navo va tavele ngecize Yesu ua puile kavusamba ka vose va tavele muzimbu ueni. Mu tue ku tambuluisa cifua ca yoyelelemo Yesu na vandongesi veni, vusamba vuetu na vakuetu vue ku ya ku lutue, kaha tue ku pua vantu va ndzolela, kaha naua na vusamba vuetu na Kilistu vue ku kola.

11. Cinanga cika ca mu civali tua pande ku puisamo linga tu pue vavusamba va Yesu, kaha omo lia vika cinanga caco capua ca seho?

 11 (2) Puenu na ku Tambuluisa cifua ce ku singaniekelemo Yesu na cifua ce ku lingilamo viuma. Nga tu lihakela kapandi ka ku mu tantekeya vuino na ku tambuluisa cifua ce ku singaniekelemo, na vusamba vuetu neni navuo vu ka kola. (1 Kol. 2:16) Vati tu hasa ku tambuluisa Yesu? Tu ci talenu lika lungano lumo lika. Yesu ua kele na ku tuala cikuma mana ku ku kuasa vakuavo ku tuvakana ku livuisa ikeye ivene ndzolela. (Mat. 20:28; Loma 15:1-3) Mu ku kala na visinganieka ngeci muevi, Yesu ua puile mukua ku lihana ivene omo lia vakuavo na mukua ku ecela. Yesu ka kele na ku niengua vuasi omo lia viuma vi va kele na ku mu handeka vantu. (Yoa. 1:46, 47) kaha ka kele na ku tavesa visevuka via vantu vize vi va kele na ku linga laza, vi mu lingise ku va mona mu njila ya ku vihia. (1 Tim. 1:12-14) Yesu ua handekele ngueni: “Vose va ka tantekeya ngecize mu vandongesi vange, nga mu lilema umo na mukuavo.” (Yoa. 13:35) Ngeci mukemuo, capua ca cili ku lihula nguetu: “Vuno njili na ku kava lungano lua Yesu mu ku linga viose vi nji hasa linga nji kale mu ciyulo na vamuanetu ni?

12. Cinanga cika ca mu citatu ca tondeka linga tu pue vavusamba va Yesu, kaha vati tu hasa ku ci puisamo?

12 (3) Puenu na ku kuasa vamuanaye ya Kilistu. Yesu ue ku mona vize vitue linga mu ku kuasa vamuanaye va ku vuavesa ngue tuli na ku vilingila mpundu ikeye. (Mat. 25:34-40) Njila ya kama i tue ku kuaselamo va ku vuavesa yapua, mu ku ambulula muzimbu ua vuangana na ku puisa vantu vandongesi, ngue muze mua sikile Yesu ku vandongesi veni. (Mat. 28:19, 20; Vili. 10:42) Vamuanaye ya Kilistu va hasa lika ku puisamo eci cipanga ca ku ambulula ci tuli na ku linga mu mavu ose na vukuasi vua vampanga veka. (Yoa. 10:16) Nga nenu mua pua umo ua vampanga veka, ntsimbu yose i mue ku linga eci cipanga mue ku muesa ngecize ka mua lemene lika vamuanetu va ku vuavesa vunoni mua lema na Yesu.

13. Vati tu hasa ku puisamo cimamuna ca ku Luka 16:9?

13 Tue ku likuata naua vusamba na Yehova na Yesu mu ku pangesa vupite vuetu, mu ku kuasa cipanga ci ve ku tuamenena. (Tandenu Luka 16:9.) Ca ku muenako tu hasa ku hana milambu yetu ku cipanga ca mu mavu ose, cize ca ambatesela kumo na ku ambulula muzimbu ua cili ku vihela via ku lahako, ku tunga na ku niunga vindzivo vie ku tuala ku lutue ku lemesa ca vusunga, na ku kuasa vaze ve ku hita mu viyovo. Kaha naua tue ku hana milambu mu cikungulukilo cetu mpundu, kaha na ku kuasa vaze va tu tantekeya nguetu vali na ku hita mu visoti. (Visi. 19:17) Viose evi, via pua vinjila vi tu hasa ku kuaselamo vamuanaye ya Kilistu.

14. Ngue mu va muesa ku Efeso 4:15, 16, cinanga cika ca mu ciuana ci tua pande ku puisamo linga tu pue vavusamba va Kilitu?

14 (4) Puenu na ku hakuila cifua ci lue ku lingilimo viuma lukungulukilo lua Yehova. Tue ku kaniamesa vusamba vuetu na Yesu uze ua pua mutue ua cikungulukilo, mu ku ononoka vaze va tu hanguila mu ku tuniunga. (Tandenu Efeso 4:15, 16.) Ca ku muenako, matangua ano tu li na ku linga cose linga vindzivo via Vuangana va vi pangese mu vutuntu. Linga tu vi puisemo vimo vikungulukilo va vi pandakana, kaha na vimo vihela via ku ambuluila naua tua vialulula-alulula. Evi, via tepulula ku vimbongo via vingi vi tue ku vihisila mu cipanga caco, kaha naua via kuasa lukungulukilo ku zokotueya vimbongo. Vutuhu ngoco vamo Vakua Kilistu va tondekele ku alulula cifua cavo, omo lieci ku alulula ci lu na lingi lukungulukilo. Vamuanetu vaco halumo va kele mu cimo cikungulukilo mu miaka ya ingi, kaha halumo va likuata vusamba vua kama na vamuanetu va  ku cikungulukilo caco. Vunoni ha ntsimbu ino ve ku va vundila ku ka pangela mu cikungulukilo ceka. Mua vusunga Yesu ue ku ivua ndzolela ya kama mu ku mona ava vandongisi va ku ononoka va pangela hamo lika neci ku aluluka ci lua linga lukungulukilo!

TU KA PUA VAVUSAMBA VA YESU KU MIAKA YOSE

15. Vati vusamba vuetu na Yesu vu ka livuezelela ku lutue?

15 Vamuanetu va ku vuavesa na sipilitu santu va kala na lulavelelo lua ku ka kala hamo na Yesu, omo va ka sika hamo neni mu Vuangana vua Njambi. Vamuanetu vaco va ka kala mpundu hamo na Kilistu, va ka mu mona na ku handeka neni, kaha na ku kala neni. (Yoa. 14:2, 3) Vunoni Yesu a ka muesa naua cilemo ceni kuli vaze va ka kala ha mavu na ku va niunga. Vutuhu ka va ka limono cito na meso na Yesu, vunoni vusamba vuavo neni vu ka tualelelaho ku kola omo va ka yoya muono ua ndzolela uze u va ka puisamo kuli Yehova na Yesu. (Isaya 9:6, 7)

16. Vivezikiso vika tue ku tambula omo lia ku likuata vusamba na Yesu?

16 Mu tue ku tava cilanio ca Yesu ca ku likuata vusamba neni, tue ku tambula vivezikiso via vingi. Ca ku muenako, mu ntsimbu ino vene tue ku vezika omo lia cilemo ceni na vukuasi vue ku tu hana. Kaha naua va tu hana lulavelelo lua ku ka yoya miaka yose vunoni helu lia viose evi, ku likuata vusamba na Yesu ci ka tuala ku civezikiso ca kama ku hiana viose, civezikiso va ku likuata vusamba vua kama na Ise ya Yesu Yehova. Mua vusunga, tua vezika cikuma omo lia ku pua vavusamba va Yesu!

MUASO 17 “Nji na Zange”

^ cin. 5 Vapostolo va kele na ku panga na Yesu na ku simutuila neni, ngeci va puile vavusamba va cili. Yesu a tonda netu tu pue vavusamba vueni, vunoni mu ku lingamo tu hasa ku liuana na vimo vitanga ka va uanene vapostolo. Cino cilongesa ci simutuila ha vimo vitanga viaco na ku muesa vimo vinguli vi tu hasa ku kava linga tu likuate vusamba na Yesu na ku vu kaniamesa.

^ cin. 55 VI LI HA VIKUPULO: (1) Mu ku lemesa ca mu vusoko. tu hasa ku lilongesa via muono ua Yesu na cipanga ceni ca ku ambulula. (2) Mu cikungulukilo tu hasa ku lihakela kapandi ku ku kala mu ciyulo na vamuanetu. (3) Mu ku puisamo cipanga ca ku ambulula na ntuima yose tuli na ku kuasa vamuanaye ya Kilistu. (4) Nga vikungulukilo va vi pandakana tu hasa ku pangela hamo lika na lukungulukilo mu ku ononoka vi hangula via vakuluntu.