Skip to content

Skip to table of contents

 CILONGESA 42

Vati Yehova a ka mi Pangesa?

Vati Yehova a ka mi Pangesa?

“Njambi ikeye mukua ku pangela muli enu cizango na cipanga.”​—Filp. 2:13.

MUASO 104 Sipilitu Santu Vuana vua Njambi

VI TU LILONGESAMO *

1. Vika a hasa ku linga Yehova linga a puisemo vutumbe vueni?

YEHOVA a hasa ku lipuisa viose via tonda mu ku puisamo vutumbe vueni. Ca ku muenako, Yehova ua lipuisa Mulongisi, Mukua ku lembezieka, kaha na Mukua ku ambulula muzimbu ua cili. Mua vusunga, Yehova ue ku lipuisa via vingi, evi vi tu na tandanga via vindende lika. (Isaya 48:17; 2 Kol. 7:6; Ngal. 3:8) Vutuhu ngoco Yehova ue ku pangesa naua vantu linga a puisemo vutumbe vueni. (Mat. 24:14; 28:19, 20; 2 Kol. 1:3, 4) Ngeci mukemuo, Yehova a hasa ku tu hana mangana na ngolo linga tu puisemo cizango ceni. Viose evi, via muesa vika mpundu lia lomboloka lizina lia Yehova, ngue mu va nongonona vakua ku lilongesa Mbimbiliya na vutongue.

2. (a) Omo lia vika vintsimbu vimo tu hasa ku livua ngecize Yehova kesi naua na ku tu pangesa? (b) Vika tu lilongesa mu cilongesa cino?

2 Mua vusunga, tu vose tua tonda Yehova a tu pangese, vunoni vamo ka va kele na vusunga nga Yehova ali na ku va pangesa vene ni kuahi. Omo lia vika? Halumo omo lia ku livua nguavo ka vesi na ku hasa ku puisamo via vingi omo lia vukulupe, viuma vi ve ku lihita navio mu muono, ni vene ku hona vutongue. Vakuavo ve ku livua ngecize va na lingi via vingi mu cipanga ca Yehova, kaha ka ci tondeka naua ku vuezelelako. Mu cilongesa cino tu lilongesa vati Yehova a hasa ku pangesa nkala muntu a kati ketu mu ku puisamo cizango ceni. Mu nima yaco, tu ka hilula mizimbu ya mu Mbimbiliya ya muesa vati Yehova ua hele vangamba veni, va  vamala na va vampuevo, ngolo na ndzili ya ku puisamo cizango ceni. Mu ku manusula, tu ka mona vati tu hasa ku tavesa Yehova a tu pangese.

VATI YEHOVA UE KU TU HANA VIA TONDEKA MU KU PUISAMO CIZANGO CENI

3. Kuliya na Filipu 2:13, vati Yehova ue ku tu hana cizango ca ku linga vimo?

3 Tandenu Filipu 2:13. * Yehova a hasa ku tu hana cizango ca ku linga viose ovio. Mu njila ika? Ca ku muenako, halumo tu hasa ku ka tantekeya ngecize vimo vi tondeka mu cikungulukilo. Ni halumo vakuluntu mu cikungulukilo va hasa ku tanda umo mukanda ua ku tunda ku Mbetele u handeka via cimo cikungulukilo ca ha mbueli ci tondeka vukuasi. Eci ci hasa ku tu lingisa ku lihula nguetu, ‘Vika vi nji hasa ku linga nji ka kuaseko? Ni halumo va tu hana cimo cipanga ca cikalu, kaha tu hasa ku lisosomua nga tu ka ci puisamo vuino ni kuahi. Ni halumo mu nima ya ku tanda cimo cinimbu mu Mbimbiliya kaha mu lihula nguenu: ‘Vati nji hasa ku pangesa vi nja lilongesa mu cinimbu eci mu ku kuasa vakuetu?’ Yehova na limo litangua liahi a ka tu sindiya ku linga vimo. Vutuhu ngoco nga Yehova a mona ngecize tuli na cizango ca ku lihakela kapandi, a ka tu hana ndzili ya ku ci puisamo.

4. Vati Yehova a hasa ku tu hana ndzili ya ku linga vimo?

4 Yehova kasi a hasa ku tu hana ndzili ya ku linga viose ovio via tonda. (Isaya 40:29) A hasa ku pangesa sipilitu Santu yeni mu ku tu kuasa ku hotola vutongue vuetu. Vati a hasa ku lingamo? (Ezu. 35:30-35) A hasa ku pangesa lukungulukilo lueni mu ku tu longesa mua ku lingila vimo vipanga. Ngeci mukemuo, nga tangua limo mu ka livua ngecize ka mu tantekeya mua ku lingila cimo cipanga, kati mu ka likanuuele ku vundila vukuasi. Cikuavo naua, puenu na ku livua ku zituka mu ku vundila Yehova ami hane “ngolo ya ku hiana cikumakuma.” Mu ku linga Yehova ua pua cihuanga, mua vusunga a ka mi kuasa. (2 Kol. 4:7; Luka 11:13) Kaha Mbimbiliya ya handeka via malungano a vati Yehova ua kuasele vangamba veni va vamala na va vampuevo mu ku va hana cizango na ndzili ya ku vi puisamo. Omo tu hilula ha malungano aco, singaniekenu ha vati Yehova a hasa ku mi kuasa ku linga viuma vi va hasele ku linga ava vangamba veni.

CIFUA CA PANGESELELEMO YEHOVA VAMO VAMALA

5. Vika tu lilongesa kuli Yehova ku tuala ha cifua na ntsimbu ya pangeselelemo Mosesa mu ku patula vantu veni?

5 Yehova ua pangesele Mosesa ku pua mukua ku patula vaIsaleli. Ha ntsimbu ika honi Yehova ua pangesele Mosesa? Vuno ha ntsimbu ya livuile Mosesa ngecize na puho, muomu na ku lilongesa “mana ose a vakua Ingito” ni? (Vili. 7:22-25) Houe, Yehova ua pangesele Mosesa, mu nima ya ku mu kuasa ku pua muntu ua ku likehesa na ku konkama. (Vili. 7:30, 34-36) Yehova ua hanene Mosesa ku simpa ca tondekele linga a ka hase ku ka handeka na muangana ua ngolo ua ku Ingito. (Ezu. 9:13-19) Vika tu lilongesa kuli Yehova ku tuala ha cifua na ntsimbu ya pangeselelemo Mosesa? Tua lilongesa ngecize, Yehova ue ku pangesa vaze va kulahela muli ikeye kaha ve ku lihakela kapandi ka ku muesa mihako ya sipilitu.​—Filp. 4:13.

6. Vika tu lilongesa kuli Yehova ku cifua ca pangeselemo Mbalezilayi mu ku kuasa Muangana Ndaviti?

6 Ku nima ya miaka Yehova ua pangesele Mbalezilayi linga a hane viose via tondele muangana Ndaviti. Ndaviti na vantu veni va kele “mu ndzala, na mpuila, na ku katala.” Vunoni Mbalezilayi na vakuavo va hakele miono yavo mu vusonde linga va tondele Ndaviti na vantu veni via-ku-lia. Vutuhu ha ntsimbu yaco, Mbalezilayi tele na kulupa, ka li vuile ngecize Yehova ka mu hakele seho. Vunoni mu ku pua mukua vuhuanga ua pangesele viose via kele navio mu ku kuasa vakuavo. (2 Sam. 17:27-29) Vi tu lilongesaho:  Ngeci mua Mbalezilayi ambe nga tua kulupa, Yehova a hasa ku tu pangesa mu ku kuasa vamuanetu va kala mu hiehi netu ni vene va ku vifuti vieka va li na ku hita mu visoti. (Visi. 3:27, 28; 19:17) Vintsimbu vimo tue ku kala na vukovelelo vua ku kuasa vamuanetu. Vunoni nga ka tua hasele ku lingamo mu ntsimbu yaco, citava tu hane milambu mu ku kuasa cipanga mu mavu ose. Nga tu lingamo, lukungulukilo lu ka kala na vimbongo via ku puamo mu ku kuasa vamuanetu mu mavu ose.​—2 Kol. 8:14, 15; 9:11.

7. Vati Yehova ua huiminine Simione, kaha vati lungano lueni lu hasa ku tu kaniamesa?

7 Ku laza Yehova ua kulahesele umo kasinakazi ua lizina Simione mu Yelusalema ngecize, ka ka-tsi noho na mono Mesiya. Eci cikulaheso caco ca kanimesele Simione muomu ua vandamenene Mesiya miaka ya ingi. Kaha Yehova ua vezikisile lutsilielo na lukakatela lueni. Tangua limo sipilitu santu ya tuamene Simione ku ya mu tembele kaha ua ka muene Yesu tele a cili kakeke. Ngeci mukemuo, Yehova ua huiminine Simione ku handeka vupolofeto ngecize uze kakeke ikeye vene Kilistu. (Luka 2:25-35) Vutuhu Simione ci moneka ngue ua tsile tele Yesu kanda a putuke cipanga ceni ca ku ambulula, vunoni ua santselele cikuma ku civezikiso ca ku mona Mesiya, kaha ku lutue a ka tambula vivezikiso vikuavo via ku hiana evi! Simione mua ka sanguka, a ka mona vati ku sika ca Yesu ci ka neha vi vezikiso ku vakua vifuti viose. (Njen. 22:18) Ngeci mua Simione, tua pande ku muesa ku santsela kuli Yehova omo lia ku vezika ci tua kala naco mu cipanga ceni.

8. Vati Yehova ue ku tu pangesa ngue mua pangesele Mbanambasa?

8 Ku sekulu ya ku livanga T.K.N., umo yala cihuanga ua lizina Yosefe ua lihanene kuli Yehova linga a mu pangese. (Vilinga 4:36, 37) Cimoneka ngecize ua puile mu kua vutongue vua ku lembezieka vakuavo, ngeci vapostolo va mu lukile Mbanambasa, lizi Mbanambasa lia lomboloka “muana ua ku Mamuna.” Ca ku muenako, mu nima ya Saulu ku pua Mukua Kilistu, cingi ca vamuanaye va mu vuililile liova, muomu ua puile mukua ku luisa vangamba va Yehova. Vunoni Mbanambasa mu ku pua mukua ngozi ua kuasele Saulu, kaha ngeci Saulu ua mu santselele cikuma. (Vili. 9:21, 26-28) Mu ntsimbu i kuavo, vamuanetu va ku Antioka ya ku Silia va tondekele ku va kaniamesa. Mua tantekeya iya ua ileko mu ku va kaniamesa? Vakuluntu va tumineko Mbanambasa! Eci ca puile cihangula ca cili. Muomu Mbimbiliya nguayo, “kaha ua va mamuine vose, linga va kakatele kuli Muangana na cizango ca mutima.” (Vilinga 11:22-24) Na lelo lino Yehova a hasa ku tu puisa ‘vana va ku lembezieka’ linga tu kaniamese vamuanetu. Ca ku muenako, a hasa ku tu pangesa mu ku kaniamesa vaze va na tsisa ka vusoko ua ha hiehi. Ni vene a hasa ku tu pangesa ku ka meneka umo muanetu ua vavala ni ku mu sana ku telefone. Ngeci mukemuo tavesenu Yehova linga a mi pangese ngue mua pangesele Mbanambasa.​—1 Tes. 5:14.

9. Vika mu hasa ku lilongesa ku cifua ca kuaselelemo Yehova muanetu Vasily, ku pua mukuluntu ua cili mu cikungulukilo?

9 Yehova ua pangesele muanetu Vasily ku pua mukuluntu ua cili mu cikungulukilo. Vasily ua puile mukuluntu mu cikungulukilo tele ali na miaka 26. Vunoni ua kele na ku livua ngecize ka hasa ku tuamenena cikungulukilo, cikumakuma ku kuasa vamuanetu va kele na ku hita mu visoti. Vunoni vakuluntu va kuhia mu lutsilielo va mu kuasele, kaha mu nima yaco ua ile ku sikola ya vakuluntu i va tumbula nguavo: Sikola ya Vipanga Via Vuangana. Ngeci muanetu Vasily ua lihakelele kapandi ka ku pangelaho. Ca ku muenako ua sonekele mukana ua vizango via tondele ku puisamo, kaha mua vi puisilemo, ua hasele ku vula liova lia kele na ku ivua. Ngeci ua handekele ngueni: “Vize via kele na ku nji vuisa liova, hano honi vie ku nji vuisa ndzolela ya kama. Kaha naua nje ku ivua ndzolela ya kama omo Yehova ue ku nji kuasa ku uana mukanda  mu Mbimbiliya ua ku lembezieka nauo vamuanetu va li na ku hita mu visoti.” Ngeci mukemuo tu tambuluisenu lungano lua muanetu Vasily. Nga tu tambuluisa lungano lueni mu ku tavesa Yehova a tu pangese, mua vusunga a ka tu hana vutongue vua ku niunga mua cili viteli vietu mu cikungulukilo.

CIFUA CA PANGESELELEMO YEHOVA VAMO VAMPUEVO

10. Vika Avingaile ua lingile, kaha vika tu hasa ku lilongesa ku lungano lueni?

10 Ntsimbu imo Ndaviti na vamala veni, va va luisile kuli Muangana Saulu kaha va tondekele vukuasi. Ngeci va ile kuli Navale a va kuase, muomu Ndaviti na vamala veni ka va muene citanga na cimo cahi ca ku lomba via ku lia kuli Navale muomu Ndaviti ikeye ua niungile vimuna via Navale mu musenge. Vunoni Navale ka tavele ku kuasa Ndaviti. Ngeci Ndaviti ua tenukile na ku tonda ku tsiha Navale na vangamba veni vose. (1 Sam. 25:3-13, 22) Vunoni mpuevo ya Navale Avingaile ua puile mpuevo ua mana, ngeci mukemuo na ku simpa cose, ua ile kuli Ndaviti kaha ua tsikamene na ku lambelela Ndaviti linga kati a tsihe Navale, muomu ku lingamo nga ca mu kokelele mulonga ua maninga na ku pihisa vusamba vueni na Yehova. Ku likehesa na vunongotima via uze mpuevo via kuatele cikuma ku mutima ua Ndaviti. Ngeci Ndaviti ua nongonuene ngecize Yehova ikeye ua tumine Avingaile. (1 Sam. 25:23-28, 32-34) Avingaile ua kele na vifua via cili vize via ile Yehova ku mutima. Na lelo lino vene, cingi ca vandumbuetu ve ku muesa vifua via cili ngeci mua liano na vunongotima, kaha eci ce ku lingisa Yehova a va pangese mu ku kaniamesa lutsilielo lua va vusoko vuavo na vamuanetu mu cikungulukilo.​—Visi. 24:3; Tito 2:3-5.

11. Vika va lingile vana va Salumu, kaha veya ve ku kava lungano luavo?

11 Mu nima ya imo miaka, Yehova ua pangesele vana va Salumu va ka kuase ku tungulula vivumbe via Yelusalema. (Neh. 2:20; 3:12) Vutuhu va puile vana va muangana, ava vampuevo va li hanene na cizango cose mu ku linga cipanga ca cikalu. (Neh. 4:15-18) Mua vusunga ava vampuevo ka va puile ngue vamiata va ku Tekoa vaze “ka va hakele zintsingo ziavo ku cipanga!” (Neh. 3:5) Aci sanganiekenu vati va livuile vaze vana va vampuevo va Salumu, ha ku mona ngecize Yelusalema i nahu ku i tungulula mu matangua 52 lika! (Neh. 6:15) Na lelo lino vandumbuetu va vengi va kala na cizango ca ku lihana ku ka kuasa mu cimo cipanga ca ku lifuila, ngeci mua ku ka tunga na ku vuahesa Vindzivo via Vuangana. Mua vusunga vutongue vua a va vandumbuetu na vuoloke, vie ku lingisa cipanga kuya ku lutue.

12. Vati Yehova a hasa ku tu pangesa ngue mua pangesele Tambita?

12 Tambita neni ua puile lungano lua cili. Yehova ua pangesele ou “mpuevo ua sulile na vipanga via cili na vuana vua ngozi,” mu ku kuasa vantuluue ni nguetu vimbundu. (Vili. 9:36) Mu ku linga ua puile mukua ngozi, ngeci vantu va liniengele cikuma omo ua tsile. Vunoni omo Petulu ua mu sanguile va vuile ndzolela ya kama cikuma. (Vili. 9:39-41) Vika tu lilongesa kuli Tambita? Nambe nga tua pua tu vakuendze, vahumbe, ni vene tusinakazi, tu vose tu hasa ku lingako mumo mu ku kuasa vamuanetu.​—VaHe. 13:16.

13. Vati Yehova ua pangesele ndumbuetu Ruth vutuhu ua puile muekulu? Kaha vika ua handekele?

13 Ndumbuetu Ruth tele a ci li kanike ku ambulula ceni ku ndzivo na ndzivo ca puile ca vuasi-vuasi muomu ua puile muekulu, vunoni ambe ngoco ua singaniekele ku ka pua misionaliu. Kaha ua handekele ngueni: “Nja lemene cikuma ku ambulula.” Vunoni ku ambuluila muntu ca mu kaluuilile omo lia ku pua muekulu, vutuhu ngoco mua puisile miaka 18 ua kovelele mu cipanga ca vupioneiro. Kaha mu 1946 ua ka lingile sikola ya Ngileande, mu nima yaco va mu tumine ku ka pangela ku Havaí na ku Japão. Mua vusunga Yehova ua mu pangesele mu njila  ya ku komuesa mu ku ambulula muzimbu ua cili ku vihela viaco. Mu nima ya miaka i heta ku 80 mu cipanga ca ku ambulula, ndumbuetu Ruth ua handekele ngueni: “Yehova ue ku nji hana ndzili na ku nji kuasa ku vula citanga cange ca ku pua muekulu. Kaha njili na vusunga ngecize Yehova a hasa ku pangesa nkala muntu, ca kama lika nga muntu uaco kulahesa muli ikeye.”

TAVESENU YEHOVA A MI PANGESE

14. Kuliya na Kolose 1:29, nga tu tonda Yehova a tu pangese tua pande ku linga vika?

14 Fumeko, Yehova ue ku pangesa vangamba veni mu vinjila via ku liseza-seza. Yehova a hasa ku mi puisa vika? A hasa ku puisa viose-ovio via tonda nga muli na cizango ca ku lihana. (Tandenu Kolose 1:29.) Kaha, Yehova a hasa ku mi puisa naua mukua ku ambulula ua ntuima, mulongisi ua cili, mukua vutongue mu ku lembezieka, mukua vutongue ku cipanga, na kavusamba ua ngozi. Mua vusunga Yehova a hasa ku mi pangesa mu njila yose-oyo ya a tonda, mu ku puisamo cizango ceni.

15. Kuliya na cimamuna ca 1 Timoteo 4:12, 15, vukuasi vuka va pande ku vundila vakuendze kuli Yehova?

15 Vakuendze, vika mu hasa ku linga mu lukungulukilo lua Yehova? Lukungulukilo lua Yehova lue ku tondeka vakuendze va ndzili va pue vakua ku kuasa vipanga na ku niunga viteli vikuavo mu cikungulukilo. Cingi ca vikungulukilo mua kala vakuluntu va vengi ku tuvakana vakua ku kuasa vipanga. Vuno, mu ku pua mukuendze, citava mu vueze ku cizango cenu ca ku kuasa cikungulukilo ni? Vunoni vamo vamuanetu ve ku handeka nguavo: Ca cili ku pua lika mukua ku ambulula. Vunoni nga mukemuo mu mue ku singanieka, vundilenu Yehova a mi kuase ku kala na cizango ca ku pua mukua ku kuasa vipanga mu cikungulukilo na ndzili ya ku vueza ku cipanga cenu ca mi hana Yehova. (Eke 12:1) Enu vakuendze tu tonda cikuma vukuasi vuenu!​—Tandenu 1 Timoteo 4:12, 15.

16. Vukuasi vuka tua pande ku vundila kuli Yehova, kaha omo lia vika?

16 Yehova a hasa ku mi puisa viose ovio via tonda mu ku puisamo cizango ceni. Ngeci mukemuo vundilenu Yehova a mi kuase ku kala na cizango ca ku ku vueza ku cipanga ceni na ndzili i mu ka tondeka. Ambe nga mua pua vakundze ni vakuluntu, pangesenu ndzili yenu na viose vi mua kala navio mu ku sangaziala Yehova. (Ekel. 9:10) Kati mu tavese liova, visinganieka via ku pihia ku mi lingisa ku singanieka ngecize ka mu hasa ku linga na vimo viahi mu cipanga ca Yehova. Mua vusunga capua ku vezika ca kama ku pangesa viose vi tua kala navio mu cipanga ca Yehova Njambi yetu ua cilemo, uze ua fuila ku mu sangaziala!

MUASO 127 Nja Pande ku fua Muntu ua Cifua Cika

^ cin. 5 Mue ku livua ngecize ka muesi na ku hasa ku puisamo via vingi mu vipanga via Yehova ni? Ni ku livua ngecize ka muesi naua na seho kuli Yehova ni? Ni halumo mue ku singanieka nguenu ka ci tondeka mu fuitangane cikuma mu vipanga via Yehova? Mu cilongesa cino tu simutuila ha vinjila via ku liseza-seza via vati Yehova a hasa ku mi hana cizango na ndzili ya ku linga viose ovio mu ku puisamo cizango ceni.

^ cin. 3 Vutuhu Paulu ua sonekelele ou mukanda Vakua Kilistu va ku sekulu ya ku livanga, vunoni vitume viaco via kuata na ku vangamba va Yehova lelo.