Skip to content

Skip to table of contents

 CILONGESA 29

“Hamenu . . . Puisenu Vantu Vose Vandongesi”

“Hamenu . . . Puisenu Vantu Vose Vandongesi”

“Ngoco vene hamenu puisenu vantu vose vandongesi vange na ku va mbatiza mu lizina lia Ise na Muana na sipilitu santu.”​—MAT. 28:19.

MUASO 60 Hakeho Hemana ku Ovoka Cavo

VI TU LILONGESAMO *

1-2. (a) Kuliya na lisiko lia Yesu lia ku Mateo 28:18-20, cipanga cika ca kama ci va kala naco Vakua Kilistu? (b) Vihula vika tu hilula mu cilongesa cino?

MU NIMA ya ku sanguka Yesu ua sikile vandongesi veni ku ka likunguluila ku mukulo ua muncinda. Mua vusunga, va lavelele cikuma cize ciuano. (Mat. 28:16) Ha ciuano eci, halumo hakeho ha “limuesele ntsimbu imo lika kuli [vamuanetu] va ku hiana vihita vitanu.” (1 Kol. 15:6) Vika Yesu ua lanienene vandongesi veni ku ciuano eci? Linga a va hane cipanga ca ku tovala, ngueni: “Ngoco vene hamenu puisenu vantu vose vandongesi vange.”—Tandenu Mateo 28:18-20.

2 Vaze vandongesi va Yesu vakevo va puile mutamba ua katete ua Vakua Kilistu ku sekulu ya ku livanga. Kaha cipanga cavo ca kama ca puile ku puisa vantu veka vandongesi, linga va lipandakane kuli vakevo. * Lelo lino kua kala makulukazi a engi a vikungulukilo mu mavu ose, kaha cipanga ca kama cevi vikungulukilo ka ca alulukile. Mu cilongesa cino, tu hilula ha vihula viuana: (1) Omo lia vika cipanga ca ku puisa vantu vandongesi ca pua ca seho? (2) Vika ca lomboloka ku puisa vantu vandongesi? (3) Vuno Vakua Kilistu vose va kala na mutamba mu cipanga ca ku puisa vantu vandongesi ni? kaha (4) Omo lia vika ku linga eci cipanga ca tondeka lukakatela?

 OMO LIA VIKA CIPANGA CA KU PUISA VANTU VANDONGESI CA PUA CA SEHO?

3. Kuliya na Yoano 14:6 na 17:3, omo lia vika cipanga ca ku puisa vantu vandongesi ca pua ca seho ya kama?

3 Omo lia vika cipanga ca ku puisa vantu vandongesi ca pua ca seho ya kama? Muomu vaze lika va pua vandongesi va Kilistu vakevo va hasa ku pua vavusamba va Njambi. Cikuavo naua, vandongesi va Kilistu muono uavo ue kuya ku lutue mu ntsimbu ino vene na ku lavelela muono ka ue ku-hua. (Tandenu Yoano 14:6; 17:3.) Mua vusunga, Yesu ua tu sila citeli ca seho ya kama, vunoni cipanga caco ka tue ku ci linga lika ku ndzili yetu. Kapostolo Paulu ua sonekele ku tuala hali ikeye ivene na vaze va pangele neni, ngueni: “Etu tu vangamba kumo na Njambi.” (1 Kol. 3:9) Mua vusunga eci ca pua civezikiso ca kama-kama ci va kundika Yehova na Kilistu ku vantu va ku hona ku tantuluka!

4. Vika tu lilongesa ku cimona ca muanetu Ivan na mpueyeni Matilde?

4 Cipanga ca ku puisa vantu vandongesi ce ku vuisa ndzolela ya kama. Halakanenu ku cimona ca muanetu Ivan na mpueyeni Matilde, va ku Colombia. Tangua limo, va ambuluilile umo mukuendze ua lizina Davier, kaha ikeye ua va lekele ngueni: “Nji tonda ku alulula muono uange, vunoni ka njesi na ku hasa.” Davier ua puile mukua ku linga vueho vua ku litingula na vinkome, vu va luka nguavo Boxing. Ua puile naua cipenda, mukua ku fuenia vidroga kaha ua yoyele na lipangala, lizina lieni Erika. Muanetu Ivan ua lomboluele ngueni: “Tua putukile ku linga mangendzi a ku hilukila kuli Davier, vunoni ua kele ku limbo lia ku laako. Kaha tua kele na kuyako ha vikinga, mu vitapalo via vicapi-capi. Kaha Erika mua muene ngecize Davier na putuka ku aluluka, ua lipandakanene neni mu ku lilongesa Mbimbiliya.” Mu nima ya ntsimbu Davier ua likelelele vidroga, ku nua, na boxing. Kaha va liambatele muaya masiko na Erika. Ndumbuetu Matilde ngueni: “Omo Davier na Erika va va mbatizile mu 2016, tua vulukile via kele na ku handeka Davier ngueni, ‘Nji tonda ku alulula muono uange, vunoni ka njesi na ku hasa.’ Tua vuile masozi a ndzolela ha meso.” Ou muzimbu ua muesa ha toma ngecize, ku kuasa vantu ku pua vandongesi va Kilistu ce ku tu vuisa ndzolela ya ku hiana.

VATI VE KU LINGA CIPANGA CA KU PUISA VANTU VANDONGESI?

5. Cinanga ca katete mu ku puisa vantu vandongesi ca pua cika?

5 Cinanga ca katete mu ku puisa vantu vandongesi ca pua ku lengeya ni nguetu ‘ku tonda’ vaze vali na cizango ca ku lilongesa via Yehova. (Mat. 10:11) Tue ku muesa ngecize cili veni tua pua tu Vakaleho va Yehova mu ku hana vukaleho ku vose va tue ku liuana navo. Tue ku muesa ngecize tu Vakua Kilistu va vusunga mu ku puisamo lisiko lia Kilistu lia ku ambulula.

6. Vati tu hasa ku kuasa vantu mu lihia?

6 Vamo vantu ve ku muesa cizango ca ku lilongesa vusunga. Vunoni vavengi ka ve ku muesa cizango caco ha katete. Ngeci ce ku tondeka ku sambeya cizango cavo ca ku lilongesa. Linga tu hase ku kuasa vantu vavengi, tua pande ku liviukisila vuino. Hangulenu vimpande vize vi mu mona ngecize vi kaya ku mitima ya vantu va mu ka liuana navo. Kaha liviukisilenu vati mu ka sangumuka cimpande caco.

7. (a) Vati mu hasa ku putuka ku simutuila na muntu? (b) Vika ca puila ca seho ku halakana muntu na ku mu singimika?

7 Ca ku muenako, mu hasa ku hula muntu nguenu: “Citava tu mi hule vimo? Lelo lino vantu mu mavu ose vali na ku hita mu visoti. Mu ku mona cenu, visoti viaco vi hasa ku hua nga mu mavu ose mu kala nguvulu imo lika ni?” Kaha mu hasa ku simutuila neni ha Ndaniele 2:44. Ni mu hasa ku handeka na muntu ua lihata nenu, ngueni: “Mu ku mona cenu, lihungu lika li hasa ku kuasa visemi ku lela vuino vana, linga  kati va ka pue vilinge via ngoco?” Kaha simutuilenu neni ha Ndeutelonomi 6:6, 7. Nkala cimpande ci mu hangula, ha katete singaniekenu ha vantu va mu ka ci leka. Setekenu ku hilula vukuasi vu va ka uana mu ku lilongesa Mbimbiliya. Mu ku handeka navo, ca pua ca seho ku va halakana na ku singimika cikumbululo cavo. Nga mu lingamo, mu ka uana njila ya cili ya ku va kuaselamo, kaha navo va kevua cizango ca ku mi halakana.

8. Omo lia vika ku linga mangendzi a ku hilukila ca tondeka ntsintsa?

8 Vamo, linga va tave ku lilongesa Mbimbiliya, halumo ce ku tondeka ntsimbu ya kama na ku lihakela kapandi ka ku linga mangendzi a ku hilukila. Omo lia vika? Muomu vamo mu nima ya ku simutuila navo, ce ku kaluua ku liuana navo naua. Kaha halumo ce ku tondeka ku hilukila vintsimbu via vingi ku muntu, amba a li ivue ku zituka na ku tava ku lilongesa netu Mbimbiliya. Vunoni vulukenu ngecize, muti linga u kole ue ku tondeka ku u tukumuina mema ku sua kumo. Na vuno vene, linga cilemo ca muntu kuli Yehova na Yesu ci kole, ce ku tondeka ku simutuila neni via Lizi lia Njambi ku sua kumo.

VUNO VAKUA KILISTU VOSE VA KALA NA MUTAMBA MU KU PUISA MUNTU NDONGESI NI?

Vakaleho va Yehova mu mavu ose va lihaka mu cipanga ca ku tonda vaze vali na cizango ca ku ka tambula muono (Talenu vinanga 9-10) *

9-10. Vika tu hasa ku handekela nguetu nga muntu napu ndongesi ya Yesu, uose mukua Kilistu neni na kuaseleko?

9 Mukua Kilistu uose ua kala na mutamba mu ku kuasa vantu vali na cizango ca ku tantekeya Yehova. Tu hasa ku setekesa cipanga caco, na cipanga ca ku tonda kanike na zimbala. Mu njila ika? Halakanenu via umo kanike ua miaka itatu ua zimbalele ku Wisconsin, Estados Unidos. Vantu va ku pua 500 va putukile ku mu tonda. Ngeci, mu nima ya viola 20 viose via ku tonda lika, umo yala ha kati kavo ua mu uanene mu lihia lia lipungu. Vunoni yala uaco ua vianene ku mu sangala, ngueni: “Muomu kati lika liange nji na mu tondo ku na kala vihita via vantu.”

 10 Vantu vavengi va tonda ku tantekeya Yehova, vunoni ve ku livua ku zimbala ngue uze kanike. Ka va kele na lulavelelo, kaha va tondeka ku va kuasa. (Efe. 2:12) Ngeci etu Vakaleho va Yehova tua tuvakana 8 milhões, tua lihaka mu cipanga ca ku va tonda. Citava, halumo ka mue ku hasa ku uana na umo uahi, ua tava ku lilongesa Mbimbiliya nenu. Vunoni vamo vamuanetu ve ku ambuluila ku cihela ci mua kala ve ku uanako vamo ve ku tava ku lilongesa Mbimbiliya. Ku tsiha mpanga, nga muanetu na kuasa umo ku pua ndongesi ya Kilistu, vakua ku ambulula vose, vali na vusunga vua ku ivua ndzolela. Muomu cipanga caco tue ku ci linga mbunga.

11. Ambe nga ka muesi na cilongesa ca Mbimbiliya, vinjila vikuavo vika mu hasa ku linga mu ku kuasa ku cipanga ca ku puisa vantu vandongesi?

11 Cipue nga ka muesi na cilongesa ca Mbimbiliya, mu hasa ku linga cipanga ca ku puisa vantu vandongesi mu vinjila vieka. Ca ku muenako, mu hasa ku tambula na ndzolela vantu va vaha ku Ndzivo ya Vuangana na ku mu kuasa. Ku lingamo, ci ka mu kuasa ku mona ngecize cilemo cikeco citantekeyeso cetu Vakua Kilistu va vusunga. (Yoa. 13:34, 35) Cikuavo naua, vikumbululo vi mue ku hana ku viuano, vutuhu mu vuihi, vunoni vi hasa ku longesa vaze va vaha mua ku lomboluela lutsilielo luavo ku vakuavo na kasingimiko. Mu hasa naua, ku tuhuka na mukua ku ambulula ua muha mu lihia na ku mu longesa mua ku pangesela Mbimbiliya mu ku simutuila na vantu. Ku lingamo, ci ka mu longesa ku tambuluisa Kilistu.—Luka 10:25-28.

12. Vuno tua tondeka ku kala na vutongue vua ku lifuila amba tu linge cipanga ca ku puisa vantu vandongesi ni? Lombololenu

12 Na umo uahi ha kati ketu, na pande ku singanieka ngecize tua tondeka vutongue vua ku lifuila, amba tu hase ku longesa vakuetu va pue vandongesi va Yesu. Vika ka tua pandele ku singanieka ngoco? Tu hilulenu ha lungano lua ndumbuetu Faustina ua ku Bolivia. Mua putukile ku likata na Vakaleho va Yehova tele ka tantekeya ku tanda. Vunoni mu nima ya ntsimbu ua lilongesele ku tanda kamandende. Lelo lino va mu mbatiza, kaha ua lema ku longesa vakuavo vusunga. Nkala simano ue ku endesa vilongesa via Mbimbiliya vitanu. Vutuhu ndumbuetu Faustina ka tantekeya ku tanda vuino kaha cingi ca vandongesi veni ve ku tanda vuino ku hiana ikeye, vunoni ua kuasa vantu va ku pua 6 ku heta ku mbatizimu.—Luka 10:21.

13. Ambe nga tua kala na via vingi via ku linga, vukuasi vuka tu hasa ku uana mu ku linga cipanga ca ku puisa vantu vandongesi?

13 Vamuanetu vavengi ve ku fuitangana mu ku puisamo viteli via seho. Vutuhu ngoco, va hangula ntsimbu ya ku endesa vilongesa via Mbimbiliya kaha ku endesa vilongesa viaco ce ku va vuisa ndzolela ya kama. Ivuenu muzimbu ukuavo, ua ndumbuetu Melanie ua ku Alaska. Ua kele na ku lela muaneni ua miaka 8 lika lieni.  Kaha ua kele naua na cipanga ca ntsimbu yose, oku a niunga ise ua vavala cancer. Kambonge kavo ka lisondoloka cikuma na vikuavo, kaha ikeye lika ua puile Mukaleho mu mbonge yose. Ua kele na ku vundila ngolo ya ku tuhuka mu lihia muomu ku cifuti cavo kua kala lisika lia kama cikuma. Kaha na ku vundila ku uana muntu a tonda ku lilongesa Mbimbiliya. Mu nima ya ntsimbu, ua uanene Sara, uze ua viukilile ku lilongesa ngecize Njambi ua kala na lizina. Mu nima ya ntsimbu Sara ua tavele ku lilongesa Mbimbiliya. Ndumbuetu Melanie ngueni: “Ku vinguezi via Lia mu Citanu, nja kele na ku zeya cikuma, vunoni ku endesa cilongesa caco ca nji kuasele cikuma hamo lika na munange. Tua lemene ku tondesesa vihula via kele na ku nji linga Sara, kaha tua vuile ndzolela ya kama ya ku mu mona a pua kavusamba ka Yehova.” Sara ua kolesele na ku simpa cose mu va kele na ku mu luisa, kaha ua sezele igreja, ngeci va mu mbatizile.

OMO LIA VIKA KU PUISA VANTU VANDONGESI CA TONDEKA LUKAKATELA

14. (a) Vati cipanga ca ku puisa vantu vandongesi ca lifua na cipanga ca ku tsiha vantsi? (b) Vati mezi a Paulu a ku 2 Timoteo 4:1, 2, eku mi vuisa ku mutima?

14 Cipue nga tu mona ngecize ka tuesi na ku hasa ku kuasa muntu na umo uahi a pue ndongesi ua Kilistu, kati tu likele ku tonda. Vulukenu ngecize Yesu ua setekesele cipanga ca ku puisa vantu vandongesi na cipanga ca ku tsiha vantsi. Vintsimbu vimo vakua ku tsiha vantsi ve ku fuitangana viola via vingi, vunoni ka ve ku lavula intsi na umo uahi. Cipanga caco, ve ku ci linga cikuma-kuma ku vutsiki ni ku vandemba, kaha vintsimbu vimo ce ku tondeka kuya ku laako. (Luka 5:5) Na vuno vene, vamo vakua ku ambulula ve ku tuhuka mu lihia ha viola via ku  liseza-seza na ku vihela via ku liseza-seza. Omo lia vika? Linga va hase ku uana vantu vavengi. Vakua ku fuitangana mu ku ambulula, ve ku vezika mu ku liuana na vantu ve ku muesa seho ku muzimbu uetu. Nenu citava mu pue na ku ambulula ha ntsimbu i ve ku kala vantu hembo na ku vihela vikuavo ni?—Tandenu 2 Timoteo 4:1, 2.

Na lukakatela, kuasenu vandongesi venu va kole mu lutsilielo (Talenu vinanga 15-16) *

15. Omo lia vika ku endesa vilongesa via Mbimbiliya ce ku tondeka lukakatela?

15 Omo lia vika ku endesa vilongesa via Mbimbiliya ce ku tondeka lukakatela? Vumo vusunga vua pua muomu ku endesa cilongesa ca Mbimbiliya ka ca lengelele lika ha ku kuasa muntu a tantekeye na ku lema vilongesa via mu Mbimbiliya, houe. Tua pande naua ku mu kuasa a hete ha ku tantekeya na ku lema ivene Mbimbiliya, Yehova. Cikuavo naua, tua pande ku mu kuasa a tantekeya vika via tonda Yesu ku vandongesi veni, na ku tantekeya vati na pande ku yoya mu ku pua Mukua Kilistu. Tua pande ku mu kuasa na lukakatela omo a lihakela kapandi ka ku ononoka vitume via mu Mbimbiliya mu muono ueni. Vamo vandongesi ve ku hasa ku aluluka mu vingonde lika. Vunoni vakuavo ve ku ambata ntsimbu ya kama.

16. Vika tu lilongesa ku muzimbu ua Raúl?

16 Umo misionaliu ua ku Peru ua lihitile na vimo via muesa seho ya ku kala na lukakatela. Ua handekele ngueni: “Umo ndongesi yange ua lizina Raúl, nja manusuile ku lilongesa neni mavulu avali ose. Vunoni kasi ua kele na vitanga via kama via mu kaluuisile ku kola mu lutsilielo. Ua kele na visoti mu vulo, kaha ua puile mukua ku tuka, ngeci vana veni ka va mu singimikile omo lia vuntu vueni. Vunoni ua kele na ku iza mu ku kunguluka ntsimbu yose, ngeci nange nja tualeleleho ku mu endela linga nji ka mu kuase hamo lika na vusoko vueni. Mua hitile miaka itatu yose, amba vuose ua hetele ha mbatizimu.”

17. Vika tu ka lilongesa mu cilongesa ci na hatako?

17 Yesu ua tu sikile ngueni “hamenu, puisenu vantu vose vandongesi vange.” Linga tu puisemo lisiko liaco, halumo tue ku tondeka ku simutuila na vantu ve ku singanieka mu njila ya litepa na yetu. Vamo ka va kele na vulombelo, vakuavo ka va tsilielele nguavo Njambi kua kala. Mu cilongesa ci na hatako tu ka simutuila vati tu hasa ku ambuluila vantu va ku liseza-seza.

MUASO 68 Ku Kuva Vimbuto via Vuangana

^ cin. 5 Vutumbe vua kama cikuma vua Cikungulukilo ca Vakua Kilistu vua pua ku kuasa vantu va pue vandongesi va Kilistu. Mu cilongesa cino tu uanamo vinguli vi tu kuasa ku puisamo mu vutuntu cipanga cetu.

^ cin. 2 LIZI LI VA LOMBOLOLA: Vandongesi va Kilistu ka va puile lika vakua ku lilongesa vize via longesele Yesu houe. Vunoni ve ku vi ononoka naua. Kaha ve ku seteka ku kava vuino vinanga via Yesu, ni nguetu lungano lueni.—1 Pet. 2:21.

^ cin. 52 VI LI HA VIKUPULO: Umo yala ali ku vutulilo vua vindeke, a lingila kuya vungendzi mu matangua eni a ku huima kaha na tambula umo mukanda ku Vakaleho va Yehova. Kaha mu nima ya ntsimbu omo ali ha matangua a ku huima ku cifuti ceka, na mono naua vamo Vakaleho va ambuluila ku mbunga. Kaha omo na hiluka ku vungendzi vueni, Vakaleho vakuavo naua va neza ku ndzivo yeni.

^ cin. 54 VI LI HA VIKUPULO: Yala uaco na tava honi cilongesa ca Mbimbiliya. Kaha mu nima ya ntsimbu vali na ku mu mbatiza.