Skip to content

Skip to table of contents

Vuno Nange Vene Yesu ua Nji Tsililile Ni?

Vuno Nange Vene Yesu ua Nji Tsililile Ni?

MBIMBILIYA ya sula na mezi a vantu va “vifua ngue vietu.” (Tia. 5:17) Ca ku muenako, netu vintsimbu vimo citava tue ku livua ngue mua livuile Paulu, mu mezi a handekele ku Loma 7:21-24, ngueni: “Omo ange nji na zange ku linga via cili, ambe, oho vene vupi vuovu. . . . Yange mukua luvinda vene!” Mua vusunga, ce ku tu kaniamesa ku tantekeya ngecize mu Mbimbiliya va tumbulamo vamo vantu va pindile na ku hona ku tantuluka, ngeci muetu.

Paulu ua handekele naua ha viuma vikuavo via cili via kele na ku ivua ku mutima. Ku Ngalata 2:20, Paulu ua kele na vusunga ngecize Yesu “ua liecele ivene [mu ku mu tsila]” ikeye mpundu! Vunoni nenu mue ku livua ngecize Yesu ua mi tsililile mpundu ni? Halumo ka mue ku livua ngoco ntsimbu yose.

Nga mue ku pinda na visinganieka via ku livua vungoco omo lia vupi vu mua lingile ku nima, ce ku pua ca cikalu ku tava ngecize Yehova ua mi lema kaha ua mi ecela. Ca cikalu naua ku tava ngecize cikombelo ca Yesu ca pua vuana vua mi hana mpundu Njambi. Vuno Yesu a tonda mpundu mu mone cikombelo ceni ku pua vuana ni? Nga mukemuo, vika vi hasa ku mi kuasa ku mona cikombelo mu cifua eci? Tu hilulenu hali evi vihula vivali.

CIFUA CE KU MUENAMO YESU CIKOMBELO CA LINGILE

Cili vene Yesu a tonda mu mone cikombelo ceni ku pua vuana vua hanene kuli yenu mpundu. Vika vi tu hana vusunga vuaco? Tandenu ngue muli na ku mona via lingikile ku Luka 23:39-43. Yala va na mu sukika ha citi ku mukulo ua Yesu. Kaha na litavela ngueni na lingile vupi. Citava vupi vua lingile yala uaco vua puile vua kama, muomu kasitiku ka ku sukika ka puile ka vantu vakua ku vulumuna milonga ya kama. Yala uaco ua lisosomuene cikuma, ngeci ua vundilile Yesu ngueni: “Nji vuluke omo u keza mu vuangana vuove.”

Vati Yesu ua mu kumbuluile? Aci singaniekenu Yesu a seteka ku tengulula mutue linga a tale kuli yala uaco, vutuhu ku lingamo ci mu vuisa ku vavala ca kama. Kaha vutuhu ali na ku ivua ku vavala ca ku hiana, vunoni a linga cose mu ku tala na ndzolela kuli yala uaco na ku mu leka ngueni: ‘Mua vusunga nji ku leka lelo nguange, u ka kala hamo lika nange mu citungu ca Njambi.’ Yesu nga ua tondele, nga ua vuluisile uze yala mezi a ku (Mateo 20:28) ngueni, “Muana muntu . . . [uezile mu] ku hana muono ueni ku kula va vengi” vunoni houe, ua tuvakanene honi muomu nga mu talaho vuino, Yesu ua muesele ngecize cikombelo ceni ca pua vuana vua muntu ku muntu. Ua muesele vusamba mu ku pangesa mezi “u ka kala” na mezi “hamo lika nange.” Kaha mu ku kulahesa uze yala lika lieni ngecize a ka kala mu citungu ha mavu, Yesu ua muesele ngecize cikombelo ceni ca muntu ku muntu.

Aa mezi a muesa ha toma ngecize Yesu ua tondele uze yala a tave ngecize cikombelo ceni ca pua vuana vua muntu ku muntu. Vika tu lilongesaho? Nga Yesu ua livuile ngecize ku tuala hali uze mukua vuhenge, uze ua ku linga na Njambi vene ka mu pangelele, eci ka ci tu hana vusunga ngecize Yesu ua tonda nkala Mukua Kilistu ua ku mbatiza a mone cikombelo ku pua vuana vu va hana kuli ikeye mpundu. Vika honi vi hasa ku mi kuasa ku kala nevi visinganieka via cili cipue nga ku nima mua lingile vipi?

 VIA KUASELE KAPOSTOLO PAULU

Paulu uevuisisile naua ngecize Yesu ua mu tsilile, omo lia cipanga ca ku ambulula ca mu hanene Yesu. Mu njila ika? Ivene ua lomboluele ngueni: “Nji mu santsela uze na nji hasesa, ikeye Kilistu Yesu Muangana uetu, omo ikeye ua nji yonguele mukua cili, na ku nji hangula ku vipanga vieni; cipue nga yange nja puile laza mukua ku popolola Njambi, na mukua ku yandesa, na mukua ku pihisa.” (1 Tim. 1:12-14) Cipanga ca ku ambulula ca tambuile Paulu, ca mu hele vusunga ngecize Yesu ua mu vuililile cikeketima, cilemo na ku mu kulahela. Netu Yesu ua tu kundika muntu ku muntu cipanga ca ku ambulula. (Mat. 28:19, 20) Nkuma nenu eci cipanga ka ca pandele ku mi vuisa ngecize Yesu ua mi tsililile ni?

Muanetu Albert, tunde ha uililile mu cikungulukilo mu na hiti miaka 34, kaha vuovuno na hiluka. Ua handekele ngueni: “Ka nje ku suva vupi vu nja lingile. Vunoni nga nji li mu lihia, nje ku livua ngeci mua kapostolo Paulu, muomu nange Yesu ua nji kundika cipanga ca ku ambulula. Kaha cipanga caco ce ku nji kaniamesa na ku nji kuasa nji limone seho ange ivene, na muono uange, kaha na viuma vi nja lavelela ku lutue.—Visa. 51:3.

Omo mu pua na ku lilongesa na vantu va vifua viose, puenu na ku va hana vusunga ngecize Yesu ua va lema kaha ue ku va vuila cikeketima

Muanetu Allan, tele kanda a lilongese vusunga ua yoyele muono ua vumbanditu na vukenia, ua handekele ngueni: “Kasi nje ku singanieka ha tuyando tuose tu nja kele na ku kokela vantu. Kaha vintsimbu vimo, visinganieka viaco vie ku nji vuisa vusiua. Vunoni nje ku santsela Yehova mu ku tavesa mukua vupi ngeci muange, nji tuale muzimbu ua cili ku vakuetu. Mu nje ku mona cifua ci ve ku tavelamo vantu muzimbu ua cili, nje ku vuluka vucili vua Yehova na cilemo ceni. Nje ku livua ngecize Yehova ali na ku nji pangesa linga nji kuase vakuetu ve ku linga viuma via ku pihia ngue mu nja fuile ange.”

Ku ambulula ce ku tu kuasa ku tuala mana ku visinganieka na vilinga via cili. Ce ku tu hana vusunga ngecize Yesu ue ku tu vuila cikeketima, ua tu lema kaha ua tu kulahela.

YEHOVA UA HIANA MITIMA YETU

Omo mavu ano a Satana kanda a ci nonge, mitima yetu i ka tualelelaho ku tu paya omo lia vupi vu tua lingile laza. Vika vi hasa ku tu kuasa ku vula visinganieka viaco?

Ndumbuetu Jean, ua yoyele muono ua vuongono tele aci li muanampuevo, lelo lino ue ku pinda na visinganieka via ku livua vungoco. Ua handekele ngueni “Nja lema ku tantekeya ngecize ‘Njambi ua hiana mitima yetu’.” (1 Yoa. 3:19, 20) Netu, ku tantekeya ngecize Yehova na Yesu va tu tantekeya vuino, ku hiana netu vavene, ku hona ku tantuluka ci tue ku pinda naco, ci hasa ku tu lembezieka. Vulukenu ngecize omo lia cilemo cavo, va hana vuana vua cikombelo, kati ku vantu va ku tantuluka vunoni, ku vakua vupi vaze ve ku liveya.—1 Tim. 1:15.

Tue ku lingisa mitima yetu i tave ovu vusunga, mu ku vundila na ku hilula ha cifua ca yoyelelemo Yesu na vantu ka va tantulukile, kaha na ku puisamo cipanga ca ku ambulula ca tu kundika. Nga tu lingamo, tu livua ngue mua livuile Paulu, nguetu: Yesu ‘ua nji lema kaha ua liecele ivene mu ku nji tsila yange.