Skip to content

Skip to table of contents

Muesenu Cikeketima ku Vantu ‘va Vifua Viose’

Muesenu Cikeketima ku Vantu ‘va Vifua Viose’

OMO Yesu ua longesele vandongesi veni ku ambulula muzimbu ua cili, ua va lekele ngueni vamo ka va ka tondo ku va halakana. (Luka 10:3, 5, 6) Netu vikevio vi tue ku lihita navio mu ku ambuluila cetu. Vamo vantu va tue ku ambulula ve ku tu handeka mua ku pihia ni vene ku katula mbuanja. Kaha nga va lingamo, ce ku tu kaluila ku va muesa cikeketima na ku va ambuluila.

Vuno cikeketima ca pua cika? Ca pua ku tala ku visoti via vakuetu na vize via tondeka kuli vakevo, ku va vuila ngozi kaha na ku tonda ku va kuasa. Vika vi ka soloka nga tu zimbalesa cikeketima ci tue ku vuila vantu mu lihia? Mua vusunga, tu ka zimbalesa ntuima yetu, ni nguetu ka tu ka kala na cizango ca ku va ambuluila kaha ka tu ka hasa ku va kuasa. Ntuima ya ku linga cimo cipanga, tu hasa ku i setekesa na tuhia. Tuhia tua tondeka luhundzi linga tu suame cikuma. Na vuno vene, ntuima yetu ya tondeka cikeketima, linga i kaniame!—1 Tesalonika 5:19.

Vati tu hasa ku lilongesa ku muesa cikeketima, ambe ha vintsimbu vi ce ku kaluua ku lingamo? Tu simutuilenu ha malungano atatu a tu hasa ku tambuluisa: Yehova, Yesu na kapostolo Paulu.

TAMBULUISENU CIKEKETIMA CA YEHOVA

Vantu va vangeya Yehova viuma via ku pihia cikuma mu miaka ya ingi. Vunoni ikeye kasi ue ku “linga ngozi na vakua ku zela ku santsela na vakua vipi.” (Luka 6:35) Vati Yehova ue ku muesa ngozi yaco? Ue ku muesa lukakatela ku vantu vose, muomu a tonda “vantu vose” va kovoke. (1 Timoteo 2:3, 4) Mua vusunga, vutuhu Njambi ua zinda vupi vunoni ka tondo na umo mukua vupi a ka nonge uahi, muomu vantu vose va kala na seho ya kama kuli ikeye.—2 Petulu 3:9.

Yehova a tantekeya ngecize Satana ua kala na vutongue vua ku suangeleya vantu linga va tsiliele mu viuma via makuli. (2 Kolintu 4:3, 4) Vantu vavengi va va longesa via makuli ku tuala hali Njambi tunde ku vunike vuavo. Ngeci mukemuo, visinganieka viavo na cifua ci ve ku livuilamo, ce ku va kaluuisa ku tava vusunga. Vunoni Yehova a li na cizango ca ku va kuasa. Vati tua tantekeyamo?

Aci singaniekenu ha vati Yehova ua livuile ku tuala ha vantu va kele mu mbonge ya Ninivayi. Vutuhu vakua Ninivayi va puile vikenia, Yehova ua lekele Yona ngueni: ‘Ka nja pandele ku tetela mbongue ya kama ya Ninivayi, muze mua kala vantu va tuvakana 120.000 vaze ka va tantekeya vuviuke na vuhenge ni?’ (Yona 4:11) Yehova ua vuilile ngozi vaze vantu ka va tantekeyele vusunga ku tuala hali ikeye. Ngeci ua tumine Yona a ka va mamune.

Netu tua haka seho ku vantu ngue mua va haka Yehova. Ngeci mua Yehova, netu tua kala na cizango ca ku kuasa vantu linga va lilongese via Yehova, ambe nga va soloka ngue va viana vusunga.

TAMBULUISENU CIKEKETIMA CA YESU

Ngeci mua Ise, Yesu neni ua vuilile vantu cikeketima “muomu va kele na ku yandangela na ku sanduoka ngue vampanga ka vesi na kaniungi.” (Mateo 9:36) Yesu uevuisisile omo lia vika vantu va kele mu visoti viaco. Va kelemo, muomu vakuluntu va malombelo avo va kele na ku va pakesa na ku va longesa makuli. Kaha vutuhu Yesu ua tantekeyele ngueni vavengi vakua ku mu halakana ka va ka pu vandongesi veni omo lia viuma via ku liseza-seza, kasi ua va longesele via vingi.—Mako 4:1-9.

Kati mu hilukile mu nima nga muntu ka mi halakanene ha katete

Vantu va hasa ku tava vusunga, nga muono uavo u aluluka

Nga vantu va viana muzimbu uetu, tua pande ku seteka ku lihakela kapandi ka ku ivuisisa omo lia  vika vali na ku vianena. Halumo ka va lemene Mbimbiliya ni Vakua Kilistu muomu ve ku mona vamo ve ku litumbula nguavo Vakua Kilistu va linga viuma via ku pihia. Vamo va va leka makuli ku tuala ha viuma vi tua tsiliela. Vakuaco ve ku ivua vuoma nguavo vavusoko ni vantu va muimbo liavo va ka va paya, omo lia ku handeka netu.

Vamo vantu va tue ku liuana navo halumo va hita mu visoti via ku linga na ha meso vui. Kim umo ndokazi ua pua missionaliu ua handekele ngueni cingi ca vantu va ku cihela ce ku ambuluila vovoka ku ndzita kaha va zimbalesa viose vi va kele navio. Kaha ka va kele na lumo lulavelelo luahi. Va lava ku mitima kaha ka va kulahelele na umo uahi. Vintsimbu via vingi vantu va ku cihela caco ve ku vindika Vakaleho ku ambulula. Tangua limo ndokazi Kim va mu pupile tele ali mu lihia.

Vika vie ku kuasa Kim ku tualelelaho ku muesa cikeketima, vutuhu vantu ve ku mu linga viuma via ku pihia? Ntsimbu yose ue ku vuluka Visimo 19:11: “Liano lia muntu li mu vandekesa ku vutenu.” Kaha ku singanieka ha lamba li va hitile vantu mu ndzita, ce ku mu kuasa ku va vuila ngozi. Kati vose ve ku mu muesa vukenia, nga ali mu lihia, vamo ve ku mu tambula mua cili. Ua kala na mangendzi a cili a ku hilukila.

Tu lihulenu nguetu: ‘Nga ka nja tantekeyele vusunga, vati nje ku lingile nga Vakaleho va seteka ku nji ambuluila?’ Ca ku muenako, vati tue ku lingile, nga tua vuile makuli a engi ku tuala ha Vakaleho va Yehova? Halumo nga tua vianene muzimbu ua cili, na ku tondeka ku tu muesa cikeketima. Yesu ua handekele ngueni tua pande ku lingila vakuetu vize vi tua tonda va tu lingilevio etu. Ngeci mukemuo tua pande ku seteka ku ivuisisa vati ve ku livua vakuetu na ku va muesa lukakatela, ambe nga ca cikalu ku lingamo.—Mateo 7:12.

TAMBULUISENU CIKEKETIMA CA PAULU

Kapostolo Paulu ua muesele cikeketima na ku vantu va mu muesele vukenia. Omo lia vika? Muomu ua vulukile ngueni neni mua fuile laza. Ua handekele ngueni: ‘Laza nja puile mukua ku popolola Njambi, na mukua ku yandesa, na mukua ku pihisa; vunoni va nji muesele ngozi, muomu nja vi lingile ku ndzimba te kanda nji tsiliele.’ (1 Timoteo 1:13) Paulu ua tantekeyele ngecize Yehova na Yesu va mu muesele cikeketima ca kama. Uevuisisile vantu va kele na ku mu vindika ku ambulula, muomu neni ua lingilemo.

Vintsimbu vimo, Paulu ua liuanene na vantu va tsilielele cikuma mu vilongesa via makuli. Vati ua vuile ku mutima? Vilinga 17:16, ya muesa nguayo Paulu mua kele ku Atena, “ua lavele ku mutima mu ku mona nganda ya sulu na tumponia.” Vunoni  Paulu ua pangesele vize vene via mu lavesele ku mutima linga a longese vantu. (Vilinga 17:22, 23) Ua aluluile cifua ceni ca ku ambulula, kaha ua handekele mu vifua via ku liseza-seza na vantu va ku visemua via ku liseza-seza linga ‘nevi viose a kovoleko vamo.’—1 Kolintu 9:20-23.

Mu tue ku ambulula ku vantu ve ku viana, ni va tsiliela via makuli, tu puenu na ku lihakela kapandi ka ku tambuluisa kapostolo Paulu. Tu hasa ku pangesa mizimbu i tua tantekeya ku tuala hali vakevo linga tu va kuase ku lilongesa ‘muzimbu ua cili’ ua viuma via ku hiana. (Isaya 52:7) Umo ndokazi ua lizina lia Dorothy ngueni: “Mu cihela cetu, vavengi va va longesa nguavo Njambi ua pua ua mu kalu kaha mukua ku hisa vantu. Nje ku sangala vantu vaco momo lia ku tsiliela cikuma muli Njambi na ku va kokela ku viuma vi ya handeka Mbimbililya ku tuala ha vifua via cili via Yehova na vikulaheso vieni via ku lutue.”

‘VULENU VIA VIPI NEVI VIA CILI’

Omo tu ya na ku suena ku hiehi na ku kotoka ca mavu, vantu va tualelelaho “ku hiana vupi.” (2 Timoteo 3:1, 13) Vunoni ka tua pandele ku zimbalesa cikeketima ni ndzolela yetu nga vantu vaco va viana muzimbu uetu. Yehova ue ku tu hana ndzili linga tu vule ‘eci ca cipi neci ca cili.’ (Loma 12:21) Ndokazi Jessica ua pua pioneiru ngueni ntsimbu yose ue ku liuana na vantu vakua ku lihalesa kaha ve ku tu tsopa na muzimbu uetu. Ua vuezeleko ngueni: “Viuma viaco vie ku vuisa ku pihia. Mu nje ku putuka ku simutuila na muntu, nje ku vundila mu mutima kuli Yehova a nji kuase ku mu mona ngue mue ku mu muenamo ikeye.” Eci ce ku kuasa Jessica ku tuala mana ku ku kuasa vantu kati ku ku pihia ce ku ivua ku mutima.

Tualelenuho ku tonda vaze va li na ku lengeya vusunga

Mu nima ya ntsimbu, vamo va hasa ku tava vukuasi vuetu na ku lilongesa vusunga

Tua pande naua ku kaniamesa vamuanetu omo tu panga navo mu lihia. Jessica ngueni nga ali mu ku ambulula kaha vakuavo va handeka vati va na va tambula mua ku pihia, ke ku vi tuala cikuma mana. Vunoni ue ku seteka ku handeka via cili, ngeci mua viuma via cili vie ku iza mu ku ambulula cetu vutuhu vamo ve ku viana.

Yehova a tantekeya vuino ngecize vintsimbu vimo ku ambulula ce ku tu kaluuila. Vunoni ue ku vuahelela cikuma nga tu tambuluisa cikeketima ceni! (Luka 6:36) Mua vusunga, Yehova ka ka tualelaho ku muesa cikeketima na lukakatela ku vantu mu mavu ano ku miaka yose. Tuli na vusunga nguetu Yehova a tantekeya ntsimbu ika mpundu a ka nongesa mavu. Mua vusunga, ku ambulula cetu ci na pu ca vuasi-vuasi. (2 Timoteo 4:2) Ngeci mukemuo tu tualelenuho ku ambulula na ntuima yose kaha na ku vuila “vantu vose” cikeketima.