Skip to content

Skip to table of contents

 CIMPANDE CA HELU | TUNGELO​—KU VA KALA MPUNDU? VIKA ECI CIMPANDE CA PUILA CA SEHO?

Vuno kua Kala Tungelo va Vapi Ni?

Vuno kua Kala Tungelo va Vapi Ni?

Eyo, ku va kala mpundu. Kulihi va tunda nkuma? Vulukenu nguenu Njambi mua tangele tungelo ua va hanene vuana vua ku lihanguila. Mu nima ya ku tanga ca yala na mpuevo va katete, Andama na Eva, kua kele umo kangelo ka pangesele mua cili vuana vueni vua ku lihanguila mu ku lingisa vantu ha mavu va muese lisino kuli Njambi. Ua hasele ku lingisa Andama na Eva va muese lisino kuli Njambi. (Njenisisi 3:1-7; Ku-Solola 12:9) Mbimbiliya ka ya tumbuile lizina liou kangelo uaco na citeli cika ua kele naco muilu, tele kanda a alulukile Njambi. Vunoni mu nima ya ku muesa lisino lieni, Mbimbiliya ya mu luka honi lizina lia Satana, lia lomboloka “Mukua Nkole” na Ndiavu, lia lomboloka “Mukua Visaki.”​—Mateo 4:8-11.

Ca vusiua ku tantekeya ngecize ku muesa lisino kuli Njambi ka ca lengelele hali Satana lika. Ku matangua a Noa, tungelo va vengi-vengi “va fumine ku vukalo vuavo” mu vusoko vua Njambi vua muilu. Va sulukile ha mavu na ku zala mivila ya vuntu linga va ku puisemo matumbe avo a api, mu ku pihisa vutumbe vua va tangelele Njambi.​—Yunda 6; Njenisisi 6:1-4; 1 Petulu 3:19, 20.

Vika via solokelele vaze tungelo va vapi? Omo Njambi ua kombele ha mavu na livazi lia kama, vaze tungelo vaco va sile mivila ya vuntu na ku hilukila muilu. Vunoni, Njambi ka va tavesele ku hilukila ha “vuangana vuavo,” ni nguetu ha vipanga vi va kele navio laza muilu. Ngeci ua va sokela mu “vina via milima [via mu cimbembesi]” ni nguetu mu milima ya ku hona ku tantekeya vutumbe vua Njambi. (Yunda 6; 2 Petulu 2:4) Ava vandemone va likundika kuli Satana Ndiavu mu ku va sika, muomu ikeye ua pua “muangana ua vandemone” kaha ue ku “lifuisa ngue kangelo ua ceke.”​—Mateo 12:24; 2 Kolintu 11:14.

Mbimbiliya nguayo Vuangana vua Njambi vua hana kuli Mesiya, va vu tumbika mu 1914. * Kaha mu nima yaco, Satana na vandemone veni va va tundisa muilu na ku va lundumuina ha vukambuila ha hiehi na mavu. Ku lana ca vupi na vupangala, vi li na ku pihisa ngeci ano mavu, vi muesa ku lingula na litoto vi va li navio tungelo vaco.​—Ku-Solola 12:9-12.

Vunoni, ku livuezelela ca vukenia na vupi ci muesa ngecize ku kotoka ca ku sika cavo ci li mu hiehi. Vuovuno, ava tungelo va vukenia va ka va kuta. Kaha Vuangana vua Njambi vu ka sika mu miaka 1.000, mu nima yaco, va ka va hana vumo vukovelelo vua ntsimbu ya indende mu ku eseka vantu naua. Mu nima yevi, va ka va nongesa ku miaka yose.​—Mateo 25:41; Ku-Solola 20:1-3, 7-10.

^ cin. 6 Nga mu tonda ku tantekeya vikuavo ku tuala ha Vuangana vua Njambi, talenu mu kapitulu 8 ka livulu Vika Mpundu Vi I Longesa Mbimbiliya? li va tuhula Vakaleho va Yehova. Mu hasa naua ku li uana mu saiti www.jw.org.