Skip to content

Skip to table of contents

 CIMPANDE CA HELU | MBIMBILIYA​—YOVOKA MU KU I

Vika Mbimbiliya yovokela?

Vika Mbimbiliya yovokela?

Mbimbiliya yovoka, ngeci mukemuo matangua ano mu hasa ku uana kopia imo na ku i tanda. Nga mu hangula Visoneka vi va langulula mua cili, mu ka kala na vusunga ngecize muli na ku tanda kopia ya visoneka mpundu via ku laza. * Kaha omo lia vika Mbimbiliya yovokela ku ku takiua, ku i luisa na ku i seteka ku alulula muzimbu uayo mu ku i nongesa? Muzimbu uka ua seho ya kama ku tuala ha Mbimbiliya?

“Vuovuno nja tava nguange Mbimbiliya i nji li nayo ya pua vuana vua ku tunda kuli Njambi”

Cingi ca vakua ku lilongesa Mbimbiliya va na hete ha ku tantekeya vusunga ngeci mua kapostolo Paulu ua sonekele ngueni: “Visoneka viose via na tumbula Njambi na muku ueni.” (2 Timoteo 3:16) Va tsiliela ngecize Mbimbiliya yovoka muomu ikeyo lika ya pua Lizi lia Njambi, kaha Njambi ua i niunga na ku matangua ano. Faizal u tu na tumbula mu cimpande ca ku livanga, ua tondesesele vusunga vuaco mu ku lilongesa Mbimbiliya eni ivene. Via lilongesele via mu komuesele cikuma. Ua tantekeyele ngecize cingi ca vilongesa via vakua Malombelo ka via kele mu Mbimbiliya. Mu ku tantekeya vutumbe vua Njambi ku tuala ha mavu ngue mu vua soloka mu Lizi Lieni, vua mu hetele cikuma ku mutima.

Ua handekele ngueni, “Vuovuno nja tava nguange Mbimbiliya i nji li nayo ya pua vuana vua ku tunda kuli Njambi. Nga Njambi a hasa ku panga melu na mavu, nkuma kesi na ngolo ya ku tu hana livulu na ku tu niungilalio ni? Ku handekamo ci ka pua ngue ku paya ngolo ya Njambi. Yange iya nji paye ngolo ya Mukua ku Hiana viose?”​—Isaya 40:8.

^ cin. 3 Talenu cimpande “Vati mu Hasa ku Hangula Mbimbiliya i va Langulula Mua Cili?” mu Vutala vua Kaniungi vua 1 ya Maio 2008 mu putu.