Skip to content

Skip to table of contents

Vika tue ku Kulupila na Ku-tsa?

Vika tue ku Kulupila na Ku-tsa?

KU-TSA ka ca kele mu vutumbe vua Njambi mua tangele vantu. Visemi vetu va katete, va Andama na Eva va va tangele na visinganieka na mivila ya ku tantuluka; na lelo lino nga kasi va ci yoya. Evi tu vi muena ku viuma via lekele Yehova kuli Andama ku tuala hali umo muti ua kele mu citungu ca Endene.

Yehova ua lekele Andama ngueni: “Ku litangua olio omo u ka liako [ku muti],” u ka tsa cili vene.” (Njenisisi 2:17) Nga Njambi ua tangele Andama na vutumbe vua ku kulupa na ku-tsa, nga ka ca tondekele ku mu hana eli lisiko. Andama ua tantekeyele ngecize nga kali ku citi caco, ka tsi.

KU-TSA KA CA KELE MU VUTUMBE VUA NJAMBI MUA TANGELE VANTU

Andama na Eva ka va tondekele ku lia kuze ku muti mu ku tina ku landuka ku ndzala houe, muomu mu citungu mua sulile miti ya yingi ya vusuka vua ku liseza-seza. (Njenisisi 2:9) Mu ku viana ku lia kuze ku muti, va Andama na Eva nga va muesele ngecize ve ku ononoka kuli Uze ua va hanene muono. Ve ku muesele naua ngecize Njambi ikeye lika ua kele na mpoko ya ku va leka vize vi va pandele ku linga na vize ka va pandele.

VIKA VIA LILE VA ANDAMA NA EVA?

Linga tu ivuisise vika via lile va Andama na Eva tua pande ku hilula cimo cimpande ca kuata ku vantu vose. Satana Ndiavu ua pangesele linoka mu handeka amo makuli a kama. Vati viendele? Mbimbiliya nguayo: “Vuno linoka ua zangamene mu ku hiana tusitu vose va ku musenge va a na pangele Yehova Njambi. Kaha ikeye ua handekele na mpuevo ngueni, ‘Cili Njambi na handeka ngueni, kati mu ka lie ku miti yose ya muihia ni?’”—Njenisisi 3:1.

Kaha Eva ua kumbuluile ngueni: “Ku vusuka vua miti ya muihia tu hasa ku lia: vunoni ku vusuka vua muti uze uli mu kati ka lihia, Njambi na handeka ngueni, ‘Kati mu ka lieko, cipue ku vu saleka livoko, ku tina mu tse.’” Kaha linoka ua lekele mpuevo ngueni, “Ka mu ka tsa cili vene: Muomu Njambi na tantekeya ngecize ku litangua olio mu ka liako amba vuose meso enu a kemuka, nenu mu ka pua ngue Njambi mu ku tantekeya nevi via viuka nevi via vipi.” Na mezi aa, Satana ua muesele ngecize Yehova ua pua mukua makuli muomu ua suekelele viuma via cili kuli va Andama na Eva.—Njenisisi 3:2-5.

Eva ua tavele via vuile. Kaha ua talele toma ku muti uaco. Na ku mona ngecize ua puile ua cili mu ku tala, na ku u makela. Ngeci uoluele livoko lieni na ku helako, kaha ua lile. Mbimbiliya nguayo: “Kaha ua hele naua kuli yalieni hamo neni, kaha ikeye ua lile.—Njenisisi 3:6.

Njambi ua lekele Andama ngueni: “Ku litangua olio omo u ka liako u ka tsa cili vene.”​—NJENISISI 2:17

Mua vusunga Njambi ua vuile vusiua vua kama mua muene vana veni va lemene cikuma, va muesa lisino ku cizango cavo! Vati ua lingile Njambi? Kuli Andama ua mu lekele ngueni: “U ka hiluka ku livu; muomu kukekuo ku ua fumine: muomu u na pu mpumputa na ku mpumputa u ka hiluka.” (Njenisisi 3:17-19) Tunde oho, “matangua ose a a yoyele Andama a puile vihita vitanu na viuana via miaka na makumi atatu” ni nguetu 930 “kaha ua tsile.” (Njenisisi 5:5) Andama ka tualeleleho ku ka yoyela muilu ni  ku cihela ceka houe. Andama ka keleko tele kanda va mu tange ku livu. Ngeci mua tsile, ua nongele naua ngue mu ntsimbu ize tele kanda va mu tange, ua himpukile mpumputa. Ka keleko naua. Luvinda lua kama!

VIA TU LINGISA KU HONA KU TANTULUKA

Omo lia lisino liavo, va Andama na Eva va zimbalesele vutantuluke na lulavelelo lua ku yoya miaka ya ya-ye. Mivila yavo ya alulukile; va putukile ku sevuka-sevuka na ku pua vakua vupi. Vunoni vupi vueza ku lisino liavo ka vua kuatale kuli vakevo lika. Va tambuisileko vupi vuaco ku vana vavo vose. Loma 5:12 nguayo: “Ngoco vene ngue hali yala umo lika, vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose muomu vose va na lingi vupi:”

Mbimbiliya ya tumbula vupi na ku-tsa ngue “cifuiko cize ca fuika ha vantu vose, na ntanga ize i va na vuva ha miyati yose.” (Isaya 25:7) Cifuiko caco ce ku fuika vantu vose ngue muisi ua vusungu, vua ku linga na umo muntu a hasa ku vu tina uahi. Cili vene, “muli Andama vose va li na ku tsa.” (1 Kolintu 15:22) Ngeci mukemuo, vantu vose ve ku lihula ngue mua lihuile kapostolo Paulu, ngueni: ‘Iyandzo a hasa ku nji ovola ku ku-tsa eci?’ Vuno kua kala mpundu ni?—Loma 7:24.