Skip to content

Skip to table of contents

Vati mu Hasa ku Uana Ndzolela ya Vusunga Lelo Lino?

Vati mu Hasa ku Uana Ndzolela ya Vusunga Lelo Lino?

TANGUA limo na umo uahi a ka vavala, cipue ku kulupa ni ku-tsa. Nenu mu ka hasa ku yoya mu ntsimbu yaco! Vunoni lelo lino, muono u na sulu na visoti na masiua a engi. Vika vi hasa ku mi kuasa ku uana ndzolela ya vusunga lelo lino? Mu Mbimbiliya mua kala vitume vi hasa ku mi kuasa ku uana muono ua cili kaha ua ndzolela mu ntsimbu ino. Tu ci hilulenu vimo visoti via mu muono na ku tala ha vati Mbimbiliya i hasa ku mi kuasa.

PUENU NA KU VIUKILILA NA VIZE VI MULI NAVIO

Cimamuna ca Mbimbiliya: “Sambuenu ku cilemo ca zimbongo; viukililenu na vize vi mu li navio.”​VaHevelu 13:5.

Lelo lino vakua mingoso ve ku tu tembesa viuma via vingi na ku handeka nguavo muntu uose na pande ku kala navio. Vunoni, Mbimbiliya nguayo tu hasa ku “viukilila na viuma vi tuli navio.” Mu njila ika?

Liniungenu “ku cilemo ca zimbongo.” Vantu ve ku linga viose-ovio omo lia “cilemo ca zimbongo” cipue nga vi va kokela mavezi, ku tsiha masoko ni vusamba vuavo, ni vene vi sahula vuntu vuavo. (1 Timoteo 6:10) Mua vusunga, ve ku fueta ndando ya kama cikuma! Kaha helu lia viose evi, Mbimbiliya nguayo mukua ku lema vupite ni nguetu palata “ka li ka kuta.”—Ekelesiaste 5:10.

Puenu na ku haka seho ku vantu kati ku viuma. Viuma ni vitenga vi hasa ku tu kuasa. Vunoni ka vi hasa ku tu lema ni ku tu santsela, ku vanga vantu lika va hasa ku lingamo. Cili vene, ku kala na ‘kavusamba ua vusunga’ cikeco ci hasa ku tu kuasa ku kala na ndzolela mu muono.—Visimo 17:17.

TU HASA KU UANA NDZOLELA MU NTSIMBU INO MU KU ONONOKA KU VITUME VIA MU MBIMBILIYA

KU PINDA NA VISOTI VIA CIHINDU

Cimamuna ca Mbimbiliya: “Mutima ua ku santsuka ukeuo cihemba ca ku viuka.”​Visimo 17:22.

Ngeci mua ‘cihemba ca cili’ ndzolela i hasa ku tu kuasa ku kolesa nga tu vavala. Vunoni vati honi tu hasa ku ivua ndzolela nga tu vavala?

Puenu na ku muesa ku santsela: Nga ntsimbu yose tu pua na ku singanieka lika ha visoti vietu kaha “matangua ose” a ka soloka ngue a ku vihia kuli yetu. (Visimo 15:15) Ngeci mukemuo, Mbimbiliya nguayo “santselenuko.” (Kolose 3:15) Lilongesenu ku haka seho ku viuma via cili mu muono, cipue nga via vindende cikuma. Viuma ngeci mua, ku-ca ca litangua, luhundzi lua cili, na vizolo via muntu u tua lema, vie ku tovalesa muono.

Puenu na ku lingila vakuenu viuma. Ambe nga tua vavala, “ku-hana ca hiana ku-tambula mu ku vezika.” (Vilinga 20:35) Nga vakuetu va muesa seho ku kapandi ka tue ku lihakela, tue ku ivua ndzolela, kaha eci ce ku tu lingisa kati tu singanieke cikuma ha visoti vietu. Mua vusunga, ku kuasa vakuetu ce ku tu kuasa netu vavene.

KU KANIAMESA VULO

Cimamuna ca Mbimbiliya: “Mu tantekeye viuma vize via hiana ku viuka.”​Filipu 1:10.

Vampuevo na yala ka ve ku uana ntsimbu ya cili ya ku kala hamo ve ku haka ku likata cavo mu vusonde. Ngeci mukemuo, vaze va liambata va ka muesa mana nga va tuameka vulo vuavo. Muomu vulo vua pua cimo ca viuma via seho ya kama mu muono uavo.

Puenu na ku lingila viuma hamo lika. Puenu na ku likuminia ku pangela hamo. Mbimbiliya nguayo: “Vavali va hiana umo.” (Ekelesiaste 4:9) Mu hasa ku likuasa ku teleka, ku lingila hamo lika vueho vua ku lihondolola muvila, ku nua mumo tuvisangua, ni kuya mu ku meneka vavusamba hamo lika.

Puenu na ku muesa cilemo mu vilinga. Mbimbiliya ya kaniamesa vaze va liambata ku limuesa cilemo na kasingimiko umo na mukuavo. (Efeso 5:28, 33) Viuma ngeci mua ku zola na mukua ndzivo yenu, ku livumbatela, ku lihana tumo tuvuana, vi hasa ku kaniamesa vulo vuenu. Kaha ku limona ku mivila ca pande ku kala lika hali va yala na mpuevo va liambata muaya masiko.—VaHevelu 13:4.